Станіслаў Шпакоўскі

У Вікіпедыі ёсць артыкулы пра іншых людзей з прозвішчам Шпакоўскі.

Станіслаў Шпакоўскі (18 студзеня 1868, Пінск — 11 сакавіка 1926, Татры) — польскі інжынер-архітэктар, звязаны з Келецкім рэгіёнам.

Станіслаў Шпакоўскі
Дата нараджэння	18 студзеня 1868(1868-01-18)[1]
Месца нараджэння	Пінск, Пінскі павет, Мінская губерня, Расійская імперыя
Дата смерці	11 сакавіка 1926(1926-03-11)[1] (58 гадоў)
Месца смерці	Татры, Славакія
Месца пахавання	Закапанэ
Грамадзянства	Польшча
Альма-матар	Інстытут грамадзянскіх інжынераў (1892)

Біяграфія

У 1892 годзе скончыў Інстытут грамадзянскіх інжынераў у Пецярбургу, атрымаўшы прафесійнае званне інжынера-будаўніка па архітэктуры. Пасля атрымання дыплома ён заняў пасаду павятовага інжынера-архітэктара ва Улашчове. Праз год яго перавялі на аналагічную пасаду ў Стапніцу. У 1901 годзе ён пасяліўся ў Кельцах, атрымаўшы пасаду памочніка інжынера ў архітэктара Келецкай губерні. Праз чатыры гады быў прызначаны інжынерам-архітэктарам губерні. Пасля пачатку Першай сусветнай вайны разам з губернскім начальствам эвакуіраваўся ў Маскву. У жніўні 1918 года вярнуўся ў Польшчу. Праз некалькі месяцаў ён заняў пасаду інжынера ў Келецкім павеце, з якой праз паўгода звольніўся з-за хваробы. У 1920-я гады кіраваў будаўнічай арганізацыяй. Памёр у славацкіх Татрах, пахаваны ў Закапанэ.

Разам з жонкай Барбарай мелі трое дзяцей.

Завершаныя праекты

• касцёл Святога Мікалая (цяпер гарнізонны касцёл Найсвяцейшай Панны Марыі Каралевы Польскай у Кельцах  (польск.)) — 1902;
• Сінагога ў Кельцах  (польск.) — 1902;
• Касцёл Святога Крыжа ў Кельцах  (польск.) — 1903;
• праваслаўная багадзельня на вуліцы Капітульнай у Кельцах (цяпер дзіцячы садок);
• Касцёл Нараджэння Найсвяцейшай Панны Марыі ў Шраняве  (польск.) — 1903—1909^[2];
• палац на вуліцы Славацкага, 16 у Кельцах (уласная рэзідэнцыя) — 1906;
• мураваны бабінец у неараманскім стылі пры драўляным касцёле Святога Эгідыя  (польск.) ў Збарувеку  (укр.) — 1906—1908;
• дом святароў на пенсіі — 1925.