ФК ЮАС Жыткавічы

ЮАС — былы беларускі футбольны клуб з горада Жыткавічы, які існаваў у 2014—2019 гадах.

ЮАС
Поўная назва	ТАА Футбольны клуб «ЮАС»
Заснаваны	2014
Расфарміраваны	2019
Горад	Жыткавічы, Беларусь
Стадыён	«Цэнтральны»
Галоўны трэнер	Андрэй Гарбар
Чэмпіянат	Другая ліга
2018	10 месца ў Першай лізе
Асноўная форма Гасцявая форма

Гісторыя

Футбольная каманда «ЮА-Строй», якая фінансавалася аднайменным прадпрыемствам, была заснавана ў 2014 годзе і заявілася ў Другую лігу чэмпіянату Беларусі. Склад каманды быў сфарміраваны пераважна з мясцовых футбалістаў, да якіх далучыўся шэраг іншагародніх (пераважна з Мазыра). У сезоне 2014 «ЮА-Строй» заняў апошняе 12-е месца ў групе, і, перамогшы ў стыкавых матчах СКВІЧ, атрымаў выніковае 23-е месца ў лізе. На наступны год каманду прадстаўлялі выключна мясцовыя ігракі, пачалося супрацоўніцтва з мясцовай ДЮСШ, ад чаго клуб атрымаў назву ЮАС-ДЮСШ. Жыткавіцкая каманда зноў стала апошняй у сваёй групе, атрымаўшы за ўвесь сезон толькі адну перамогу.

У пачатку 2016 года ЮАС-ДЮСШ пацвердзіла свой удзел у новым сезоне^[1]. У сувязі са спыненнем супрацоўніцва з ДЮСШ каманда скараціла назву да ЮАС^[2]. Сезон для каманды атрымаўся яшчэ горшым за папярэдні — каманда цярпела паражэнні за паражэннямі, найбуйнейшым стала гасцявое 0:14 ад «Маладзечна-ДЮСШ-4». Улетку каманда нават заявіла аб зняцці з чэмпіянату, але пасля перамоў з АБФФ вырашыла працягнуць удзел. У выніку каманда набрала сваё адзінае ачко ў апошнім туры, з агульнай розніцай мячоў 8−124.

У пачатку 2017 года склад каманды істотна ўзмацніўся, папоўніўшыся вопытнымі ігракамі з такіх клубаў, як «Баранавічы» і «Рагачоў-МК». Галоўным трэнерам быў прызначаны Вадзім Бяленка, вядомы па працы з пінскай «Хваляй». У выніку жыткавіцкі клуб пачаў сезон ужо не ў якасці аўтсайдара, а як адзін з фаварытаў. З самага пачатку захапіўшы лідарства, ЮАС не страціў яго да самага заканчэння чэмпіянату, у выніку за некалькі тураў да фінішу забяспечыў сабе выхад у Першую лігу.

Сезон 2018 каманда пачала пад кіраўніцтвам Уладзіміра Гольмака. Амаль поўнасцю змяніўся склад каманды, былі запрошаны ігракі з Першай і Вышэйшай ліг. Пасля першай паловы сезона ЮАС ішоў у сярэдзіне табліцы. Аднак, у ліпені Гольмак пакінуў клуб, значна змяніўся таксама склад каманды. Выканаўцам абавязкаў галоўнага трэнера стаў памочнік Гольмака Андрэй Свіркоў, аднак у верасні і ён пакінуў клуб, да канца сезона кіраўніцтва ажыццяўляў дырэктар Андрэй Мінчук. Сезон ЮАС скончыў на 10 месцы з 15.

У студзені 2019 года новым галоўным трэнерам стаў Канстанцін Чахаў, які з верасня 2018 года ўваходзіў у трэнерскі штаб. Каманда стала ўзмацняцца ігракамі, якія мелі вопыт выступлення ў Вышэйшай лізе. Аднак, у сакавіку 2019 года ЮАС з-за фінансавых праблем не атрымаў ліцэнзію на ўдзел у Першай лізе (з лістапада 2018 года клуб не выплачваў грошы ігракам). У красавіку апеляцыя была клуба была адхілена, і ён канчаткова быў выключаны з Першай лігі^[3]. Большасць ігракоў тым часам пакінула клуб, знайшоўшы новыя каманды ў Першай і Другой лігах. Аднак, неўзабаве ЮАС далучыўся да ліку ўдзельнікаў Другой лігі^[4]. Галоўным трэнерам замест пакінуўшага клуб Канстанціна Чахава быў прызначаны нядаўні ігрок каманды Андрэй Гарбар^[5]. У каманду прыйшлі новыя ігракі, большасць з іх мела вопыт выступлення ў Першай лізе. У табліцы ЮАС быў серадняком, аднак каманду зноў хутка сталі пераследаваць праблемы. У чэрвені з-за недахопу ігракоў ЮАС адмовіўся праводзіць хатні матч Кубка Беларусі супраць НФК і атрымаў тэхнічнае паражэнне, а неўзабаве абвясціў аб зняцці з Другой лігі з-за фінансавых праблем. Паколькі ЮАС не паспеў згуляць палову сваіх матчаў, то ён быў выключаны з турніру, а вынікі сустрэч з яго ўдзелам ануляваны.

У пачатку 2020 года склад Другой лігі папоўніў новы клуб з Жыткавічаў — «Меліяратар», да якога далучыліся многія ігракі ЮАС, а ўзначаліў новую каманду былы трэнер ЮАС Андрэй Гарбар.

Папярэднія назвы

• 2014: «ЮА-Строй»
• 2015: ЮАС-ДЮСШ
• 2016—2019: ЮАС

Статыстыка выступленняў

Чэмпіянат і Кубак Беларусі

Сезон	Ліга	М	Г	В	Н	П	Галы	Ачкі	Кубак	Заўвагі
2014	Другая — Б (Д3)	12	22	4	3	15	21–53	15	1/64 фіналу
	Матчы за 23 месца1	23	2	2	0	0	6–2
2015	Другая — Б (Д3)	10	18	1	0	17	9–89	3	1/64 фіналу
	Матчы за 20 месца2	19-20	2	1	0	1	3–3
2016	Другая (Д3)	13	24	0	1	23	8–124	1	1/32 фіналу
2017	Другая (Д3)	1	26	20	5	1	63–12	65	1/16 фіналу	Выхад у Першую лігу
2018	Першая (Д2)	10	28	6	10	12	23–38	28	1/16 фіналу	Неатрыманне ліцэнзіі, пераход у Другую лігу
2019	Другая (Д3)	Зняўся з чэмпіянату							1/32 фіналу

• ¹ Стыкавыя матчы супраць мінскага СКВІЧа, які заняў 12 месца ў групе А (3:2, 3:0).
• ² Стыкавыя матчы супраць верхнядзвінскага «Прыазёр’я», якое заняла 10 месца ў групе А (3:0, 0:3 — абодва тэхнічных выніка).

Галоўныя трэнеры

• Уладзімір Саўчыц (2014—2015)
• Андрэй Мінчук (2016)
• Вадзім Бяленка (2017)
• Уладзімір Гольмак (студзень—ліпень 2018)
• Андрэй Свіркоў (в.а. у ліпені—верасні 2018)
• Андрэй Мінчук (в.а. у верасні—снежні 2018)
• Канстанцін Чахаў (студзень—красавік 2019)
• Андрэй Гарбар (красавік—чэрвень 2019)

Зноскі

1. ЮАС-ДЮСШ (Житковичи): "У нас свой рецепт побед"(недаступная спасылка)
2. Команда правильно называется ЮАС (Житковичи) Архівавана 17 красавіка 2018.
3. В первой лиге сыграет 15 команд. ЮАС не получил лицензии
4. В сезоне-2019 ЮАС сыграет во второй лиге
5. ЮАС возглавил Андрей Гарбар