Юзаф Кунц

У Вікіпедыі ёсць артыкулы пра іншых людзей з прозвішчам Кунц.

Юзаф Кунц (ням.: Johan Kunz, польск.: Józef Kunc, руск.: Осип Матвеевич Кунц; 1831, Ракіцаны — 6 кастрычніка 1907, Гродна) — гродзенскі прадпрымальнік, заснавальнік Гродзенскага піўзавода.

Юзаф Кунц
Johan Kunz
Род дзейнасці	прамысловец
Дата нараджэння	1831
Месца нараджэння	Рокіцаны[d], Каралеўства Багемія, Землі багемскай кароны, Аўстрыйская імперыя
Дата смерці	6 (19) кастрычніка 1907
Месца смерці	Гродна, Гродзенскі павет, Гродзенская губерня, Літоўскае генерал-губернатарства, Расійская імперыя
Месца пахавання	Фарныя могілкі
Грамадзянства	Аўстрыйская імперыя Расійская імперыя
Жонка	Францішка Кунц
Дзеці	Ігнацій, Вацлаў, Франц, Францішак, Юлія
Месца працы	Гродзенскі піўзавод

Біяграфія

Нарадзіўся ў горадзе Ракіцаны ў Аўстрыйскай імперыі (сёння ў Пльзенскім краі Чэшскай Рэспублікі). Быў аўстрыйскім падданым, скончыў піваварскія курсы ў Празе^[1].

Пераехаў у Расійскую імперыю і ў 1868 або 1870 годзе запусціў у Гродне ўласны бровар. Для гэтага ён выкупіў былы палац Агінскіх, які ў дзесяцігоддзі пасля падзелаў Рэчы Паспалітай мясцовыя купцы выкарыстоўвалі як склад тавараў^[2].

Юзаф Кунц прывёз у Гродна чэшскія традыцыі, рэцэпты і тэхналогіі варкі піва. Ён быў адным з першых, хто варыў у Гродне класічны еўрапейскі лагер. Акрамя піўзавода, Кунц валодаў у Гродне двума тракцірамі. У 1897 годзе перадаў кіраванне броварам сынам Ігнацію і Францу^[3].

У 1888 годзе заснаваў бровар у горадзе Сувалкі^[1]. Спачатку ім кіраваў Пётр Кунц, хутчэй за ўсё, яго пляменнік, а з 1900 года ўладальнікам піваварнага завода пад назвай «W. Kunc» стаў сын Юзафа Вацлаў^[4].

Кунц быў актыўны ў грамадскім і палітычным жыцці горада. У 1890 годзе быў кандыдатам у губернскую падатковую інспекцыю. У 1902 годзе — ужо ў складзе Гродзенскай падатковай інспекцыі, а таксама чалец праўлення добраахвотнай пажарнай дружыны. У 1906 годзе — у складзе гарадскога савета.

Памёр у 1907 годзе. Пахаваны на Фарных могілках у Гродне ў сямейным склепе разам з жонкай Францішкай і сынам Францішкам.

Сям’я

Ажаніўся з Францішкай Кунц (1840 — 18.06.1903). Яны мелі не менш за пецярых дзяцей:

• Ігнація (1867 — 19.10.1911), які кіраваў піўзаводам з 1897 года пасля адыходу бацькі ад спраў;
• Франца, кампаньёна Ігнація ў кіраванні піваварскім бізнесам;
• Вацлава (13.09.1870 — 12.01.1957), кіраўніка бровара «W. Kunc» у Сувалках^[5], які актыўна ўдзельнічаў у дзейнасці прадпрыемстваў буйнога беластоцкага прымыслоўца Антонія Іпаліта Вячоркі пасля яго смерці;
• Юлію, другую жонку беластоцкага прамыслоўца Антонія Іпаліта Вячоркі;
• Францішка (1868 — 16.04.1937), касіра гродзенскага магістрата, гаспадара летняга клуба, чальца таварыства «Муза», камітэта рэстаўрацыі Фары Вітаўта (1922) і камітэта па барацьбе з дарагавізнаю (1923).