Essa

Essa — гурт крыўскага рытуальнага фальклору з Мінска. Створаны ў 2006 годзе Тодарам Кашкурэвічам.

Essa
Жанры	этна-авангард
Гады	з 2006
Краіна	Беларусь
Горад	Мінск
Мовы песень	беларуская
Склад	Тодар Арленавіч Кашкурэвіч

Назва гурта паходзіць ад ракі Эсы, якая цячэ на поўначы Беларусі, што з’яўляецца сакральным цэнтрам балцкай зямлі Крыўі. Творчасць гурта ёсць імкненне да традыцыйнай манеры спеву і грання, якое, аднак, больш імправізацыя, чым дакладнае капіраванне аўтэнтычных узораў. Такім чынам музыкі перадаюць сваё разуменне сакральнай музычнай традыцыі этнасу. Essa прэзентуе музычную традыцыю аднаго этнакультурнага рэгіёна — паўночнай Беларусі (Крыўя, Нальшчаны) і ўсходняй Літвы (Аўкштайція, Дзукія). Асноўны аўтэнтычны рэпертуар гурта грунтуецца на спевах адной вёскі — Велеўшчына Лепельскага раёна, на беразе Эсы.

Вось як бачаць сэнс сваёй творчасці самі музыкі: «Мы — вернікі старой, дзядоўскай веры. Мы вызнаем пракаветную тутэйшую традыцыю, што засталася спадчынай ад продкаў. Вера, вернасць — не з’яўляецца прамінулымі слядамі ў гісторыі, дух зямлі, дух народу будзе жыць датуль, дакуль будзе гучаць гэтая музыка. Essa — гэта наша рэлігія!»

Essa з’яўляецца «жывым» гуртам. Першы выступ адбыўся на прэзентацыі слоўніка «Беларуская міфалогія». 15 красавіка 2004 года гурт браў удзел у першым Zlocie Dudziarzy Europy (2004, Познань, Польшча), міжнародных музычных фэстах Regioo (2006, Тарту, Эстонія), MJ (2008, Зарасай, Літва) і інш. Essa з’яўляецца пастаянным удзельнікам міжнароднага фестывалю этнічнай і неафолкавай музыкі Crivia Aeterna. Гурт актыўна выступае ў Літве, Эстоніі. Выступ гурта таксама можна было пабачыць 24 студзеня 2009 года на прэзентацыі другога нумара альманаху DRUVIS, які выдаецца цэнтрам этнакасмалогіі «Крыўя», у мінскім Палацы мастацтва. Таксама Тодар Кашкурэвіч быў лідарам і адным з заснавальнікаў цэнтра этнакасмалогіі «Крыўя».

У 2016 годзе выдадзены дэбютны альбом «Niamiha».^[1] У запісе ўдзельнічаў саксафаніст з Вільні Петрас Вішняўскас.^[2]

Дыскаграфія

• Niamiha (2016)

Склад гурта

• Тодар Кашкурэвіч — дуда
• Вольга Дзядовік-Кашкурэвіч — спеў, жалейка

Былыя ўдзельнікі

• Святлана Клепікава — спеў, жалейка, канклес

Зноскі

1. Гурт Essa выдаў дэбютны альбом «Няміга» Архівавана 31 студзеня 2017. / Радыё Рацыя
2. Essa выдала сумесны альбом зь легендай летувіскага джазу (+слухаць) / Experty.by