Андрэй Яўгенавіч Крывашэеў

У Вікіпедыі ёсць артыкулы пра іншых людзей з прозвішчам Крывашэеў.

Андрэ́й Яўге́навіч Крывашэ́еў (нар. 2 снежня 1981, Валгаград) — беларускі журналіст, тэлевядучы, палітычны аглядальнік, грамадскі дзеяч, прапагандыст рэжыму Лукашэнкі. Генеральны дырэктар інфармацыйнага агенцтва «Мінск-Навіны» (з 2021). Старшыня праўлення Беларускага саюза журналістаў (з 2020). Дэпутат Мінскага гарадскога Савета дэпутатаў 29-га склікання (з 2024).

Андрэй Яўгенавіч Крывашэеў
дэпутат Мінскага гарадскога Савета дэпутатаў[d] з 2024
Нараджэнне	2 снежня 1981(1981-12-02) (44 гады) Валгаград, Валгаградская вобласць, РСФСР, СССР[1]
Грамадзянства	Беларусь
Партыя	Белая Русь
Адукацыя	факультэт гуманітарнай адукацыі і кіравання БНТУ (2001)[1]
Месца працы	Беларускі саюз журналістаў Нацыянальная дзяржаўная тэлерадыёкампанія Рэспублікі Беларусь Мінск-Навіны
Узнагароды	Прэмія «За духоўнае адраджэнне» Выдатнік тэлебачання і радыё[d]

Біяграфія

Нарадзіўся 2 снежня 1981 года ў Валгаградзе (Расія)^[2].

Скончыў факультэт гуманітарнай адукацыі і кіравання Беларускага нацыянальнага тэхнічнага ўніверсітэта^[3].

З 2002 па 2007 год працаваў карэспандэнтам і спецыяльным карэспандэнтам Белтэлерадыёкампаніі. З 2007 года — палітычны аглядальнік, стваральнік і вядучы аўтарскіх праектаў Нацыянальнай дзяржаўнай тэлерадыёкампаніі Рэспублікі Беларусь. Аўтар тэлепраектаў «Дыялогі пра цывілізацыю», «Праект І», «24 пытанні», «Спецыяльны рэпартаж», аналітычных праграм «Галоўны эфір», «У цэнтры ўвагі», «Панарама», «Дзелавое жыццё», «Навіны» і іншых, якія выходзілі ў эфіры тэлеканала «Беларусь 1»^[2].

У лютым 2020 года выбраны старшынёй праўлення Беларускага саюза журналістаў^[2].

21 снежня 2021 года распараджэннем старшыні Мінгарвыканкама прызначаны генеральным дырэктарам УП «Агенцтва «Мінск-Навіны»^[2].

У 2024 годзе абраны дэпутатам Мінскага гарадскога Савета дэпутатаў 29-га склікання па Малінаўскай выбарчай акрузе^[4]. Член партыі «Белая Русь»^[5].

З'яўляецца суарганізатарам супольнасці журналістаў і блогераў Расіі і Беларусі «Друзья — Сябры»^[2].

Узнагароды

• Спецыяльная прэмія Прэзідэнта Рэспублікі Беларусь «За духоўнае адраджэнне» (2005) — за цыкл дакументальных фільмаў «Была вайна…» да 60-годдзя Перамогі ў Вялікай Айчыннай вайне^[3];
• Медаль «За працоўныя заслугі»^[3];
• Нагрудны знак Міністэрства інфармацыі Рэспублікі Беларусь «Выдатнік тэлебачання і радыё»^[3].