Ганна Мартынаўна Базыленка

У Вікіпедыі ёсць артыкулы пра іншых людзей з прозвішчам Базыленка.

Ганна Мартынаўна Базыленка (4 красавіка 1908, в. Арахі, Аршанскі павет, цяпер гарадскі пасёлак Арэхаўск, Аршанскі раён — 19 студзеня 1980, Мінск) — беларуская мовазнаўца.

Ганна Мартынаўна Базыленка
Дата нараджэння	4 красавіка 1908(1908-04-04)
Месца нараджэння	Арэхі, Аршанскі павет, Магілёўская губерня, Расійская імперыя
Дата смерці	19 студзеня 1980(1980-01-19) (71 год)
Месца смерці	Мінск, Беларуская ССР, СССР
Месца пахавання	Паўночныя могілкі
Род дзейнасці	паэтэса, мовазнаўца, пісьменніца, linguistics teacher
Навуковая сфера	мовазнаўства
Месца працы	Інстытут літаратуры, мастацтва і мовы АН БССР філалагічны факультэт БДУ
Альма-матар	літаратурна-лінгвістычнае аддзяленне педагагічнага факультэта БДУ[d] (1931)
Медыяфайлы на Вікісховішчы

Біяграфія

У 1920-я гады ў зборніках Віцебскай маладнякоўскай філіі «Пачатак» і «Світанне», а таксама ў перыядычным друку змяшчала вершы, апавяданні, аднаактовыя п’есы пад сваім прозвішчам і пад псеўданімам Ганна Арахоўская.

Закончыла ў 1931 годзе Беларускі дзяржаўны ўніверсітэт. У 1933—1938 гадах працавала ў Інстытуце мовы, літаратуры і мастацтва АН Беларусі, у 1944—1970 гадах старшым выкладчыкам, дацэнтам, у 1949—1955 гадах намеснік дэкана філалагічнага факультэта БДУ.

Памерла 19 студзеня 1980 года ў Мінску^[1]. Пахаваная на Паўночных могілках Мінска (Паўночныя-1, 45/19/8)^[2].

Навуковая дзейнасць

Прымала ўдзел у стварэнні «Руска-беларускага слоўніка» 1937 года і «Практычнага беларуска-рускага слоўніка» (рукапіс загінуў падчас Вялікай Айчыннай вайны), абараніла кандыдацкую дысертацыю «Устойлівыя словазлучэнні ў мове твораў Якуба Коласа» (1952), манаграфія даследчыцы «Пабочныя і ўстаўныя словы, словазлучэнні і сказы ў беларускай літаратурнай мове» (1964) да сённяшняга дня не страціла навуковага значэння.

Г. Базыленка — аўтар шэрагу навуковых артыкулаў па праблемах сучаснай беларускай мовы, у тым ліку па пытаннях моўнага майстэрства Якуба Коласа, сааўтар падручніка «Курс сучаснай беларускай літаратурнай мовы: Марфалогія» (1957), першага тома акадэмічнай «Граматыкі беларускай мовы» (1962).

Зноскі

1. Базыленка Ганна – Белліт  (бел.) (6 ліпеня 2023). Праверана 20 ліпеня 2024.
2. Аблажэй — Брыль – Белліт  (бел.) (14 ліпеня 2023). Праверана 20 ліпеня 2024.