Касцёл Унебаўзяцця Маці Божай (Скідзель)

Касцёл Унебаўзяцця Маці Божай — каталіцкі храм у горадзе Скідзелі (Гродзенскі раён). Размешчаны ў парку, па адрасе вул. Зарэчная, 40. Занесены ў Дзяржаўны спіс гісторыка-культурных каштоўнасцей Рэспублікі Беларусь як аб'ект гісторыка-культурнай спадчыны рэгіянальнага значэння.

Касцёл
Касцёл Унебаўзяцця Маці Божай
53°35′46,94″ пн. ш. 24°15′49,51″ у. д.HGЯO
Краіна	Беларусь
Горад	Скідзель
Канфесія	каталіцтва
Епархія	Гродзенская дыяцэзія
Благачынне	Дэканат Гродна-Усход
Архітэктурны стыль	неаготыка
Дата заснавання	1870
Дата пабудовы	1870 год
Статус	Гісторыка-культурная каштоўнасць Беларусі, шыфр 413Д000217шыфр 413Д000217

Гісторыя

Касцёл у стылі неаготыкі быў пабудаваны ў 1870-х гадах^[1][2] сям’ёй князёў Чацвярцінскіх на тэрыторыі свайго сядзібнага комплексу, які знаходзіўся на паўночна-ўсходняй ускраіне мястэчка. Да 1939 года быў прыдворным касцёлам гэтай сям’і, Мясцовыя жыхары называлі яго «княжацкі касцёл». Пад тытулам Унебаўзяцця Найсвяцейшай Панны Марыі і як капліца святыня далучана да парафіі Кашубінцы.

Падчас вайны быў зачынены. Пасля 1945 года у ім доўгі час размяшчаліся ваенкамат і курсы кіроўцаў. У 1980-х гадах будынак не выкарыстоўваўся. У 1990 годзе прыхаджане касцёла правялі касметычны рамонт будынка^[3]. Плябанія, аднапавярховы будынак з чырвонай вонкавай цэглы, была перабудавана пад жылы дом. У 1991 годзе будынак святыні нарэшце вярнулі парафіянам, аб чым сведчыць мемарыяльная дошка пад хорамі. У 1993 годзе ў адбудаванай святыні ўрачыста прайшла першая служба.

Архітэктура

Прамавугольная ў плане святыня з пяціграннай апсідай. Касцёл каменны з чырвонай цэглы, аднанефны з трохбаковай алтарнай часткай. Галоўны фасад неатынкаваны, фланкаваны дзвюма круглымі вежамі-званіцамі. З паўночнага боку пазней прыбудавана сакрысція. Касцёл накрыты двухсхільным бляшаным дахам з вальмамі над апсідай. Залавы інтэр’ер перакрыты зоркавымі неагатычнымі скляпеннямі. У галоўным алтары ізноў змешчаны тытульны абраз Унебаўзяцця Найсвяцейшай Панны Марыі, намаляваны ў 1991.

Перад уваходам у касцёл размяшчаецца тэраса з трынаццаццю прыступкамі. Дзве цагляныя вежы ўпрыгожаны металічнымі крыжамі^[3].

Гл. таксама

• Касцёл Святога Іосіфа Рамесніка (Скідзель)

Зноскі

1. Касцёл Унебаўзяцця Маці Божай (Скідзель) на сайце Radzima.org
2. Касцёл Унебаўзяцця Маці Божай (Скідзель) на сайце Глобус Беларусі (руск.)
3. Костел Внебовзятия Божьей Матери в г. Скидель (руск.)

Спасылкі

Аб’ект Дзяржаўнага спіса гісторыка-культурных каштоўнасцей Рэспублікі Беларусь, шыфр 413Д000217

• Касцёл Унебаўзяцця Маці Божай (Скідзель) на сайце Radzima.org
• Касцёл Унебаўзяцця Маці Божай (Скідзель) на сайце Глобус Беларусі (руск.)
• Костёл Вознесения Девы Марии в Скиделе: шестой выпуск видеопроекта «Нулевой километр» Архівавана 11 ліпеня 2014. (руск.)
• slowo.grodnensis.by