Мікалай Іванавіч Дземянцей

Мікала́й Іва́навіч Дземянце́й (25 мая 1930, вёска Хотліна, Чашніцкі раён, Віцебская вобласць — 10 ліпеня 2018, Ждановічы, Мінскі раён) — беларускі дзяржаўны дзеяч, Старшыня Вярхоўнага Савета БССР (1990—1991).

Мікалай Іванавіч Дземянцей
Старшыня Прэзідыума Вярхоўнага Савета БССР 28 ліпеня 1989 — 15 мая 1990
Папярэднік	Георгій Таразевіч
Пераемнік	пасада скасавана
Старшыня Вярхоўнага Савета БССР 18 мая 1990 — 25 жніўня 1991
Папярэднік	Іван Навуменка
Пераемнік	Станіслаў Шушкевіч
Нараджэнне	25 мая 1930(1930-05-25) Хотліна, Чашніцкі раён, Віцебская акруга, БССР, СССР
Смерць	10 ліпеня 2018(2018-07-10) (88 гадоў) Ждановічы, Ждановіцкі сельсавет, Мінскі раён, Мінская вобласць, Беларусь
Месца пахавання	Усходнія могілкі
Партыя	КП(б)Б, КПСС
Адукацыя	Беларуская дзяржаўная сельскагаспадарчая акадэмія
Узнагароды	Ордэн Айчыны 3 ступені, Беларусь Медаль «У азнаменаванне 100-годдзя з дня нараджэння Уладзіміра Ільіча Леніна» Юбілейны медаль «60 год вызвалення Рэспублікі Беларусь ад нямецка-фашысцкіх захопнікаў» Медаль «60 гадоў Перамогі ў Вялікай Айчыннай вайне 1941—1945 гг.» Медаль «Ветэран працы»

У Вікіпедыі ёсць артыкулы пра іншых асоб з прозвішчам Дземянцей.

Біяграфія

Нарадзіўся 25 мая 1930 года ў в. Хотліна Чашніцкага раёна Віцебскай вобласці.

Скончыў Беларускую сельскагаспадарчую акадэмію (1959) і Вышэйшую партыйную школу пры ЦК КПСС (1964).

Працаваў галоўным аграномам і дырэктарам МТС у Полацкім раёне. У 1957 годзе ўступіў у КПСС. У 1958—1962 гадах інструктар Віцебскага абкама, 2-і сакратар Віцебскага райкама КПБ, старшыня Віцебскага райвыканкама. З 1964 года інструктар, намеснік загадчыка, загадчык сельскагаспадарчага аддзела Віцебскага абкама КПБ, 1-ы сакратар Ушацкага райкама КПБ. З 1970 года інспектар ЦК КПБ, з 1974 года сакратар Віцебскага абкама КПБ. З 1977 года — загадчык сельскагаспадарчага аддзела, у 1979—1989 гады — сакратар ЦК КПБ. У 1989—1990 гады быў старшынёй Прэзідыума Вярхоўнага Савета БССР, намеснікам старшыні Вярхоўнага Савета СССР, членам Савета Федэрацыі СССР.

У пачатку 1990 года ўзначальваў Вярхоўны Савет БССР 12-га склікання. Пад яго старшынствам Вярхоўны Савет 27 ліпеня 1990 года прыняў Дэкларацыю аб дзяржаўным суверэнітэце Беларускай ССР. У 1991 годзе, у перыяд Жнівеньскага путчу ў Маскве, выступіў у падтрымку ДКНС (пасля Мікалай Дземянцей сцвярджаў, што з яго боку аніякай падтрымкі не было). 25 жніўня 1991 года заявіў аб сваім сыходзе на пенсію.

У 1997—2000 гадах — член Савета Рэспублікі па прэзідэнцкай квоце.

Памёр 10 ліпеня 2018 года ў Ждановічах Мінскага раёна^[1]. Пахаваны ў Мінску на Усходніх могілках.

Зноскі

1. Памёр былы кіраўнік Вярхоўнага Савету БССР Мікалай Дземянцей

Літаратура

• Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — 576 с. — 10 000 экз. — ISBN 985-11-0035-8. — ISBN 985-11-0106-0 (т. 6).

Спасылкі

• Урокі жыцця Мікалая Дземянцея — Звязда
• Дземянцей: той, хто не жадаў быць першым — Радыё Свабода