MAT 49

Ar MAT 49, anvet en ur mod ofisiel Pistolet mitrailleur de 9 mm Modèle 1949 en arme c’hall^[1], zo ur bistolenn-vindrailher ijinet e Bro-C’hall goude an Eil Brezel-bed hag implijet eno betek ar bloavezhioù 1990.

Arabat eo droukveskañ gant MAS 49.

MAT 49
Ur bistolenn-vindrailher MAT 49
Kinnig
Bro	Bro-C'hall
Doare	Pistolenn-vindrailher aotomatek
Mont en-dro	Tennata dre argil
Munision	9 × 19 mm Parabellum
Produer	Manufacture d'Armes de Tulle Manufacture d'Armes de Saint-Étienne (adalek kreiz ar bloavezhioù 1960)
Mare produiñ	1949 - 1973
Pouez ha muzulioù
Mas (hep kartouchenn)	3,5 kg
Mas (gant ur c'harger 32 gartouchenn karget)	4,2 kg
Hirder	460 mm (lamm pleget) 720 mm (lamm dibleget)
Hirder ar c'hanol	230 mm
Perzhioù all
Hed-tenn pleustrek	100 m
Tizh mont e-maez ar boledoù	350 m/s
Lusk-tennañ	600 tenn/mn
Endalc'h	Karger-fiñv 32 gartouchenn e div golonenn Karger-fiñv 20 kartouchenn en ur golonenn
Lezenn
Rummad e Bro C'hall	A

Deskrivadur

Un arm simpl da broduiñ ha marc'hadmat e oa ar MAT 49^[1]. Gellet a ra tennañ e mod aotomatek nemetken. Kambret eo evit kartouchennoù 9 mm Parabellum. Savet e oa bet evit kemer an nebeutañ ar gwellañ a blas : he lamm koulz ha puñs he c'harger a c'hall bezañ pleget a-hed he c'hanol hag he boestad-kulasenn^[2]. Soñjet e oa bet an arm evit bezañ gwarezet diouzh al loustoni a c'hallje mont e-barzh^[3]. Uhel eo endalc'h he c'harger 32 gartouchenn a-drugarez d'e ziv golonenn, met kizidik eo ouzh al loustoni, hag ur c'harger 20 kartouchenn en ur golonenn a voe savet evit gellet implijout an arm en endroioù enne traezh evel an dezerzhioù.

Stummoù disheñvel a voe savet, en o zouez ar MAT Mle 54 SB dezhi ul lamm-koad^[4], pe ar MAT 49/54 dezhi ul lamm-koad hag un eil draen evit gellet tennañ tenn-ha-tenn^[5].

Istor

Goude fin an Eil Brezel-bed e oa pourvezet an arme c'hall gant pistolennoù-mindrailher diamzeriet o munisionoù, evel ar MAS 38 gall kambret e 7,65 mm Long, pe gant armoù a bep seurt deuet eus stokoù stadunanat, saoz pe alaman. E 1944 e voe divizet boulc'hañ ur programm reneveziñ an armoù. Ar c'halibr 9 mm Parabellum, galloudusoc'h hag aesoc'h da gavout evit ar 7,65 mm Long, a voe dibabet evit ar bistolenn hag ar bistolenn-vindrailher a oa da vezañ ijinet^[1].

Labouradegoù-stad Saint-Étienne, Tulle ha Châtellerault a ginnigas tri fimpatrom pistolenn-vindrailher disheñvel : mont a reas ar maout gant ar MAT, ha goude un nebeud gwelladennoù e voe lakaet da arm standart e miz Even 1949 ha lesanvet MAT 49 en arme. Implijet e voe en holl vrezelioù kaset gant Frañs e-pad 50 vloaz, en o zouez reoù Indez-Sina hag Aljeria. Hervez e oa un arm solut ha fiziapl^[1], hag a blije d'ar soudarded^[3]. Servijout a reas ivez etre daouarn ar polis pe ar valtouterien c'hall, hag e armeoù meur a vro all^[1].

Levrlennadur

• (en) GUILLOU Luc, The MAT-49 Submachine Gun: And Preceding French Submachine Gun Designs, Including the MAS-35, ‎ Schiffer Publishing Ltd, 2022, 80 p., ISBN 9780764362927