Esperanto estas...

Esperanto estas... estas filmoprojekto de E@I. Temas pri informa filmo pri Esperanto, kiu dum 43 minutoj kaj dividita en 6 partojn informas pri la lingvo, ĝia historio, kulturo kaj movado. Unuopaj partoj estas spekteblaj aŭ prezenteblaj ankaŭ tute aparte, ĉiu de ili traktas Esperanton kaj la Esperanto-movadon per iom alia maniero kaj prezentas aliajn flankojn de ĝi. Ĉiuj partoj de la filmo estas nun jam spekteblaj (en malpli alta kvalito) ankaŭ en interreto – ĝis julio 2012 la tuta kvanto de unuopaj spektoj estis 773.778^[1] – kaj tiaj ili aperis ankaŭ en la tria (2011) kaj kvara (2012) eldonoj de la DVD Esperanto Elektronike.

Esperanto estas...
Kovrilo de la DVD
filmo
Originala titolo	Esperanto estas...
Produktadlando	Brazilo, Slovakio
Originala lingvo	Esperanto, 10 dublaĵoj kaj 29 subtekstigoj
Kina aperdato	29-a de novembro 2008
Daŭro	60 minutoj (tuta)
Ĝenro	dokumenta filmo
Reĝisoro(j)	Rogener Pavinski
Produktisto(j)	Rogener Pavinski
Scenaro	Hokan Lundberg
Filmita en	Brazilo, Finnlando, Hungario, Francio, Rusio, Pollando, Germanio, Litovio, Italio, Svedio
Muziko de	FreePlayMusic.com kaj Vinilkosmo
Produktinta firmao	Kosmuzik, E@I
Distribuo	Espero
v • d • r

Historio

Kreado de la filmo daŭris 3 jarojn, ekde 2005 ĝis 2008. Celo de la filmo estas montri, ke Esperanto estas viva, uzata kaj tre ŝatata lingvo de multaj homoj. La espero estas, ke la filmo informos milojn da homoj pri la taŭgeco de Esperanto en internacia komunikado kaj ke la filmo donos tiom bonan impreson, ke multaj ankaŭ volos eklerni la lingvon. Frapfrazo de la filmo estas: ”Esperanto estas... lingvo lerninda!”.

Originala plano de la kreintoj estis produkti DVD-on de la filmo por la 93-a Universala Kongreso de Esperanto en Roterdamo (julio 2008), sed la lanĉo prokrastiĝis ĝis la 29-a de novembro kiam la DVD estis oficiale prezentita dum la Malferma tago de la Centra oficejo de UEA en Roterdamo.^[2]

Enhavo

La filmo konsistas el 6 partoj kaj ekstraĵoj (fotoj, intervjuoj kaj koncerteroj), tiel ke entute temas pri 60 minutoj da filma materialo.

Sekvas resumoj de ĉiuj 6 partoj de la filmo:

Parto 1: Esperanto estas taŭga por ĉio

Esperanto estas lingvo taŭga por Internacia komunikado, vojaĝoj, interreto, interkultura lernado, trovi novajn amikojn, internaciaj kongresoj, senpaga gastado en fremdaj landoj kaj multo pli.

Parto 2: Esperanto estas lingvo kun multaj trajtoj

Esperanto estas lingvo. Ĝi estas neŭtrala ĉar ĝi ne apartenas al iu aparta popolo aŭ lando. Ĝi estas internacia kaj ĉefe utila por komunikado inter homoj el pluraj landoj. Ĝi estas egaleca kaj pli facile lernebla ol naciaj lingvoj. Ĝi evoluas kaj vivas simile kiel aliaj lingvoj kaj per ĝi eblas esprimi ĉiujn aspektojn de homa pensado kaj sentado. Ĝi estas relative juna, iniciata de Ludoviko Lazaro Zamenhof en 1887. Unika, riĉa kaj vivanta lingvo, ĝi estas tre ŝatata de multaj homoj tra la mondo. Esperanto estas ankoraŭ ne tre konata, jen la kialo de tiu ĉi filmo.

Parto 3: Esperanto estas lingvo uzata plurmaniere

Se oni simpligas iom eblas dividi la Esperanto-parolantojn en diversaj kategorioj:

• "la idealistoj" – kredas je Esperanto kiel helpilo por estonta mondpaco
• "la vivĝuantoj" – ĝuas la internaciajn festojn kaj aranĝojn
• "la lingvemuloj" – tuj kiam eblas parolas pri diversaj lingvaĵoj
• "la aktivuloj" – ŝatas organizi seminariojn, trejnadon, paĝarojn ktp
• "la familiuloj" – uzas Esperanton en siaj internaciaj familioj

Kompreneble multaj apartenas al pluraj el tiuj kategorioj. Kiu kategorio plej allogas vin?

Parto 4: Esperanto estas lingvo lernebla kaj lerninda por ĉiuj

En tiu ĉi parto Esperanto-parolantoj el diversaj landoj respondas al la demandoj:

• Kial vi lernis Esperanton?
• Ĉu estis facile por vi lerni Esperanton?
• Ĉu Esperanto estas utila por vi?

Krome vi vidos prezenton de la lingvo kaj ankaŭ povos lerni kelkajn frazojn en Esperanto.

Parto 5: Esperanto estas lingvo kun bunta movado

E@I, TEJO, ILEI, EEU, UEA, AdE – jen kelkaj el la mallongigoj kiuj konsistigas la internacian Esperanto-movadon. Eksciu pli pri ili ĉi-parte.

Parto 6: Esperanto estas lingvo de la estonteco

Nur "frenezuloj" kredis ke la tero ĉirkaŭiras la sunon aŭ ke iam homoj povos flugi per aviadiloj. Nur "frenezuloj" kredas ke iam ĉiuj popoloj vivos en paco kaj havos komunan internacian lingvon krom siajn naciajn, regionajn kaj lokajn lingvojn. Sed kiom "freneza" estas tiuj ideoj? Kiom "freneza" estas vi? Ni estas tre "frenezaj" kaj fieras pri tio.

Formo kaj aŭtoroj

La filmo sur DVD uzas la sistemon NTSC kaj la uzita ekranproporcio estas 4:3.

Ĉefaj kunlaborintoj

• Rogener Pavinski - muntado, filmado kaj teksto
• Hokan Lundberg - ideo, teksto kaj kunordigado
• Petro Baláž - enhav-konsiloj kaj filmado
• Arono Chapman kaj Karlina Daley - bazaj voĉoj

Voĉrakontistoj

Por la filmo ekzistas voĉa komentario en 10 diversaj lingvoj. Jen la lingvoj kaj la personoj kiuj registris la voĉojn:

• Esperanto kaj angla: Arono Chapman, Karlina Daley
• Germana: Thomas Bormann
• Portugala: Mirna Marino Duarte
• Pola: Gabriela Kosiarska, Maciej Jaskot
• Itala: Francesca Ruggieri kaj Leonardo Pampaloni
• Franca: Guillaume Nénuphar kaj Emelyne Bigot
• Ĉeĥa: Daniel Mrázek
• Slovaka: Stano Marček
• Ĉina: Wang Shanshan (王珊珊)

Divido de la DVD

La filmo, danke al granda kunlaboro de volontulaj tradukantoj, reviziantoj kaj voĉlegantoj, havas 29 subtekstajn lingvojn kaj 10 voĉajn lingvoversiojn. Pro tiom granda nombro da lingvoj, necesis dividi la filmon je 2 DVD-diskoj, ĉar unusola disko ne sufiĉus por ĉiuj lingvoj. Jen la divido kun numeroj de la sontraktoj kaj subteksttrakoj:

Disko A Sontrakoj esperanto angla slovaka ĉeĥa pola ĉina Subteksttrakoj esperanto angla slovaka ĉeĥa pola ĉina slovena kroata serba litova rusa japana korea vjetnama persa hebrea

Disko B Sontrakoj esperanto angla franca germana itala portugala Subteksttrakoj esperanto angla franca germana itala portugala hispana kataluna okcitana nederlanda dana sveda finna hungara greka

Kuriozaĵoj

• En la unua versio de la du unuaj partoj de la filmo aperigitaj en la jaro 2006 en la DVD Esperanto Elektronike la esperanto-voĉon registris slovaka esperantisto kaj eks-volontulo de TEJO Martin Minich.
• Je la tempo 3m:39s de la 6-a parto ("Esperanto estas lingvo de la estonteco") la knabino kiu aperas estas Apsana Giri, nepala esperantistino kiu pereis la 2-an de januaro 2008 per aŭtomobila akcidento en Usono. Ŝi partoprenis en la 61-a IJK en Zakopane per la subvencio Partoprenu IJK-n – la sama subvencio kiu ebligis al la kreinto de la filmo Rogener Pavinski veni al la IJK kaj registri tie la scenojn kiuj aperas en la filmo, inkluzive de tiu en kiu ŝi aperas.^[3]