Aerococcus

Aerococcus é un xénero de bacterias do filo Bacillota (Firmicutes).^[1] O xénero foi inicialmente identificado en 1953 en mostras de aire e po como un coco catalase negativo, grampositivo que crecía formando pequenos grupos.^[2] Foron despois atopados en ambientes hospitalarios e en salmoiras para a curación de carne.^[3] Sempre foi difícil de identificar, xa que é moi semellante ao Streptococcus alfa-hemolítico en placas de ágar sangue e é difícil de identificar por medios bioquímicos.^[4] A secuenciación do seu ARNr 16S converteuse no método estándar para a súa identificaicón, pero outras técnicas como a MALDI-TOF tamén foron útiles para a identificación do xénero e as especies.^[4]

Aerococcus
Clasificación científica
Dominio: Bacteria Filo: Bacillota (Firmicutes) Clase: Bacilli Orde: Lactobacillales Familia: Aerococcaceae Xénero: Aerococcus Williams et al., 1953
Especie tipo
A. viridans Williams et al., 1953

Etimoloxía

O nome Aerococcus deriva do grego aer, aeros (ἀήρ, ἀέρος), aire; e do latín científico coccus (á súa vez procedente do grego kokkos (κόκκος)), unha baga, polo que significa 'coco do aire'.^[5] Este nome déuselle debido á súa forma redonda e a que foi inicialmente descuberto en mostras de aire.^[2]

Especies

O xénero comprende estas especies:^[5]

• A. christensenii Collins et al., 1999, nomeada en honra do microbiólogo danés Jens J. Christensen.^[6]
• A. sanguinicola Lawson et al., 2001 do latín 'habitante do sangue'.^[7]
• A. suis Vela et al., 2007, do latín 'porco'.^[8]
• A. urinae Aguirre & Collins, 1992, do latín 'da urina'.^[9]
• A. urinaeequi (Garvie, 1988) Felis et al., 2005, do latín "da urina dos cabalos", que foi a fonte para o illamento da cepa tipo.^[10]
• A. urinaehominis Lawson et al., 2001, do latín 'da urina humana', da cal se illou a capa tipo.^[11]
• A. viridans Williams et al., 1953. É a especie tipo do xénero e o nome procede do latín 'facer verde', xa que produce esa cor.^[12] Axente causante da gaffkemia, unha doenza dos lumbrigantes.^[13]