Democracia Ourensana

Democracia Ourensana é un partido político ourensán de ámbito provincial dirixido por Gonzalo Pérez Jácome.^[1] Dende o 2019 ostenta a alcaldía da cidade de Ourense.

Democracia Ourensana
Instancia de	partido político galego
Ideoloxía política	rexionalismo, liberalismo económico, localismo, personalismo e populismo de dereita
Posición política	centrismo
Persoas e organizacións
Fundador/a	Gonzalo Pérez Jácome
Data
Fundación	2001
Localización
País	España
Sede	Ourense
Fontes e ligazóns
Páxina WEB	democraciaourensana.es
Redes
[ Wikidata ] [ C:Commons ]

Ideoloxía

O partido rexeita a adscrición á dereita ou á esquerda convencionais ("D.O. no es de derechas ni de izquierdas, sino de Ourense").^[2] Con todo, Natalia Puga caracterízao como "populismo de dereitas" e Onda Cero como "localista".^[3]

A pesar do seu proclamado carácter transversal,^[4] o seu histórico na política municipal, provincial e galega caracterizouse polas alianzas máis ou menos consistentes co Partido Popular: en 2014, favoreceu o acceso á alcaldía do candidato popular Jesús Vázquez; en 2019, obtivo a alcaldía sendo a terceira forza do consistorio ourensán, pasando a integrar os populares no goberno, até a súa ruptura en xullo de 2022, despois de favorecer igualmente a continuidade de José Luís Baltar á fronte da Deputación. Logo das municipais de 2023, DO e PP alcanzaron un acordo para accederen ao mando do Concello da capital e da Deputación, respectivamente, en solitario. Finalmente, após as eleccións ao Parlamento de Galicia de 2024, o seu único representante, Armando Ojea, abstívose na votación de investidura de Alfonso Rueda.

Por outro lado, o seu líder Gonzalo Pérez Jácome ten desacreditado publicamente os seus adversarios de esquerdas, como o PSdG-PSOE ou o BNG, afirmando sobre este último que "é un partido soviético e Pontón unha radical que defendía terroristas".^[5]

Por outro lado, DO renega do galego como lingua vehicular no ámbito público, non sendo usada habitualmente polo seu líder nin de forma sistemática a través das súas canles de comunicación, o que coloca este partido fóra do consenso da normalización lingüística do período autonómico.^{[6][7] [8][9]}

Historia

2001-2011: primeiros anos

Fundación do partido e a canle de televisión

O partido fundouse e 2001^[10] en torno á canle de televisión local Auria TV^[11] por Gonzalo Pérez Jácome xunto a Armando Ojea, Manuel Álvarez. Rebeca Santos e Juan Carlos Frasero.^[12]

Primeiros anos na oposición

Gonzalo Pérez Jácome foi o candidato de Democracia Ourensana á alcaldía de Ourense nas eleccións de 2003 e 2007, pero non logrou representación. En 2011 o partido entrou na corporación municipal ó lograr dous concelleiros: Gonzalo Pérez Jácome e Susana Gómez Valencia.

Resultados electorais de Democracia Ourensana

Data	Tipo	Cabeza de lista	Votos	Escanos	Lugar
Eleccións municipais de 2003	Municipais	Gonzalo Pérez Jácome	284	0	Ourense
Eleccións ao Parlamento de Galicia de 2005	Autonómicas		638	0	Galicia
Eleccións municipais de 2007	Municipais	Gonzalo Pérez Jácome	1757	0	Ourense
Eleccións ao Parlamento de Galicia de 2009	Autonómicas		1023	0	Galicia
Eleccións municipais de 2011	Municipais	Gonzalo Pérez Jácome	4529	2	Ourense
Eleccións ao Parlamento de Galicia de 2012	Autonómicas	Rafael Martínez Cachafeiro	4245	0	Galicia
Eleccións municipais de 2015	Municipais	Gonzalo Pérez Jácome	13.679	8	Ourense
		Serafina Varelas Vieira	630	2	Barbadás
		Ana Fernández Iglesias	437	2	O Pereiro de Aguiar
Eleccións ao Parlamento de Galicia de 2016	Autonómicas	Miguel Caride[13]	7679	0	Galicia
Eleccións municipais de 2019	Municipais	Gonzalo Pérez Jácome	12.009	7	Ourense
		Serafina Varelas Vieira	499	1	Barbadás
		Francisco González Fraga	261	1	O Pereiro de Aguiar
Eleccións ao Parlamento de Galicia de 2020	Autonómicas	Non presentaron candidatura
Eleccións municipais de 2023	Municipais	Gonzalo Pérez Jácome	18.388	10	Ourense
		Daniel Rey López	460	1	Barbadás
		David Pérez Lorenzo	185	0	O Pereiro de Aguiar
Eleccións ao Parlamento de Galicia de 2024	Autonómicas	Armando Ojea[14]	15.312	1	Galicia

Auria TV

Artigo principal: Auria TV.

Auria TV é unha canle de ámbito local propiedade de Gonzalo Pérez Jácome, líder de Democracia Ourensana, dispoñible na canle 51 en Ourense^[15] que tamén está en YouTube. Foi a primeira cadea de televisión de España en emitir programas en bucle para telos dispoñibles a distintas horas do día.^[16] Emite, basicamente, propaganda, roldas de prensa e algúns programas sobre política provincial.^[17][16][15]