Dendragapus

Dendragapus é un xénero de aves da orde dos galiformes, familia dos fasiánidos e subfamilia dos tetraoninos.^[1]

Dendragapus
Dendragapus obscurus, macho
Clasificación científica
Reino: Animalia Filo: Chordata Subfilo: Vertebrata Clase: Aves Orde: Galliformes Familia: Phasianidae Subfamilia: Tetraoninae Xénero: Dendragapus Elliot, 1823
Especies
Véxase o texto

Dendragapus obscurus, femia

Dendragapus fuligionosos, femia

Para a maioría dos autores comprende dúas especies que habitan en América do Norte.^[2][3][4] Porén, outros autores reducen o seu número a unha, e outros elevan a tres ou catro o número das súas especies.

Taxonomía

Descrición

O xénero foi descrito en 1823 polo zoólogo estadounidense Daniel Giraud Elliot,^[1] en Proc. Acad. Nat. Sci. Philadelphia 16: 23.^[5]

Etimoloxía

O nome científico do xénero, Dendragapus, está formado polos elementos do latín científico dendr- e -agapus. O primeiro está tirado da raíz do substantivo do grego antigo δένδον déndron, 'árbore', e o segundo de ἀγαπό agapó, 'amante', derivado do verbo ἀγαπάω agapáō, 'amar', 'querer', 'desexar'.^[6] Literalmente: 'os amantes das árbores'.

Especies

Como quedou dito, a maioría dos autores recoñecen no xénero dúas especies:

• Xénero Dengragapus Elliot, 1823
  • Dendragapus fuliginosus (Ridgway, 1873)
  • Dendragapus obscurus (Say, 1823)

Controversia taxonómica

Dadas as similitudes entre moitas das especies dos tetraoninos, non hai acordo unánime sobre a taxonomía do xénero Dengragapus.

Así, por exemplo, o Sistema Integrado de Información Taxonómica (ITIS), só considera como válida a especie Dengragapus obscurus,^[1] considerando a Dendragapus fuliginosus como unha subespecie desta, Dendragapus obscurus fuliginosus (Ridgway, 1873),^[7] utilizando como fonte a Zoonomen - Zoological Nomenclature Resource, 2005.05.23.

Outros consideran a especie Dendragapus falcipennis, que a maioría clasifican como Falcipennis falcipennis.^[8][9][10]

Finalmente, outros consideran a Dendragapus canadensis, especie definida por Linneo como Tetrao canadensis Linnaeus, 1758, que a maioría dos autores clasifican tamén dentro do xénero Falcipennis, como Falcipennis canadensis.^[11]