Frankia

Frankia é un xénero de bacterias fixadoras do niutróxeno que viven en simbiose con plantas actinorrícicas, similar ás bacterias Rhizobium atopadas nos nódulos radiculares de legumes da familia Fabaceae. Frankia tamén inicia a formación de nódulos radiculares.

Frankia
Nódulo radicular de amieiro onde se poden encontrar as Frankia.
Clasificación científica
Dominio: Bacteria Filo: Actinomycetota Orde: Frankiales Familia: Frankiaceae Becking 1970 (Approved Lists 1980)[1] Xénero: Frankia Brunchorst 1886[2]
Especie tipo
Frankia alni (Woronin 1866) Von Tubeuf 1895
Especies[3]
F. alni (Woronin 1866) Von Tubeuf 1895 "Ca. F. alpina" Pozzi et al. 2020 F. asymbiotica Nouioui et al. 2017 "Ca. F. californiensis" Normand et al. 2017[4] F. canadensis Normand et al. 2018[5] F. casuarinae Nouioui et al. 2016 F. coriariae Nouioui et al. 2017 "Ca. F. datiscae" Persson et al. 2011 F. discariae Nouioui et al. 2017 "F. elaeagni" (ex Becking 1970) Lalonde et al. 1988 F. elaeagni Nouioui et al. 2016 F. inefficax Nouioui et al. 2017 Frankia irregularis Nouioui et al. 2018 "Ca. F. meridionalis" Nguyen et al. 2019 "Ca. F. nodulisporulans" Herrera-Belaroussi et al. 2020 Frankia saprophytica Nouioui et al. 2018 Frankia soli Gtari et al. 2020 "F. subtilis" Brunchorst 1886 Frankia torreyi Nouioui et al. 2019
Sinonimia
Frankiella Maire e Tison 1909

Este xénero foi nomeado orixinalmente por Jørgen Brunchorst en 1886 en honra do biólogo alemán Albert Bernhard Frank.^[6] Brunchorst considerou que o organismo que identificara era un fungo filamentoso. Jan-Hendrik Becking redefiniu o xénero en 1970 como de bacterias actinomicetas e creou para el a familia Frankiaceae dentro da orde Actinomycetales (hoxe na orde Frankiales). Mantivo o nome orixinal de Frankia para o xénero.^[7] Polo momento Frankia é o único xénero validamente publicado da familia Frankiaceae.^[8]

Sección dun nódulo radicular de amieiro.

Características

A maioría das cepas de Frankia son específicas de distintas especies de plantas coas que viven en simbiose. Son bacterias filamentosas e converten o nitróxeno atmosférico en amoníaco utilizando o encima nitroxenase, un proceso coñecido como fixación do nitróxeno. Fano mentres viven nos nódulos das raíces de plantas actinorrícicas. As bacterias poden fornecer a maioría ou todos os requirimentos de nitróxeno da planta hóspede. Como resultado, as plantas actinorrícicas colonizan e a miúdo prosperan en solos que teñen baixos niveis de nutrientes.^[9]

Agora disponse de varios xenoma de Frankia, que poden axudar a aclarar como evolucionou a simbiose entre procariotas e plantas, como ocorreron as adaptacións ambientais e xeográficas, a diversidade metabólica e o fluxo horizontal de xenes entre os procariotas simbiontes.^[9]

As Frankia poden resistir baixas concentracións de metais pesados como Cu, Co e Zn.^[10] Poden ser beneficiosas para os solos degradados. O solo degradado é un solo rico en metais pesados ou desprovisto de nutrientes debido á seca.^[11]

As Frankia son bacterias grampositivas, xa que as súas paredes celulares están feitas dunha grosa capa de peptidoglicano. Isto axúdalle a resistir os metais pesados que poida haber en solos degradados.^[12]

Son bacterias que toleran un estreito rango de temperaturas e niveis de pH do solo. Crecen mellor arredor dos 30° Celsius e nun ambiente a pHs entre 6,5 e 7.^[13] Isto indica que as Frankia son moi sensibles ao seu ambiente.

Plantas simbiontes

• Todas as especies do xénero Alnus da familia Betulaceae.
• Algunhas especies de catro xéneros da familia Casuarinaceae: Allocasuarina, Casuarina, Ceuthostoma e Gymnostoma.
• Certas especies do xénero Coriaria da familia Coriariaceae.
• Datisca cannabina e Datisca glomerata da familia Datiscaceae.
• Todas as especies de tres xéneros da familia Elaeagnaceae: Elaeagnus, Shepherdia e Hippophae
• Todas as especies dos xéneros Myrica, Morella e Comptonia da familia Myricaceae.
• Todas as especies de cinco ou seis xéneros da familia Rhamnaceae: Ceanothus, Colletia, Discaria, Trevoa e posiblemente Adolphia.
• Algunhas especies da familia Rosaceae, incluíndo todas as especies dos xéneros Cercocarpus, Cowania, Purshia, Chamaebatia e algunhas especies de Dryas.^[14]