Mesoplodon grayi
From Wikipedia, the free encyclopedia
Remove ads
Mesoplodon grayi, coñecido na bibliografía internacional co nome de zifio de Gray, é unha especie de mamífero cetáceo odontoceto da familia dos zifíidos e subfamilia dos zifioideos,[1][2] unha das quince integradas no xénero Mesoplodon.[3]
É un dos membros máis coñecidos do xénero Mesoplodon. Bastante gregario, caracterízase por ser o único zifio que presenta unha dentición con numerosos dentes. Nesta especie non se describiron subespecies.[1][2][4]
Remove ads
Taxonomía
Descrición
A especie foi descrita en 1876 polo naturalista alemán Julius von Haast, que foi o director do Museo de Canterbury, en Christchurch, Nova Zelandia.[5] A súa descrición baseouse en tres cranios que recibira en maio de 1875 de William Hood, que os recuperara de tres espécimes que formaban parte dun grupo de 28 individuos que quedaran varados na praia de Waitangi, na illa Chatham, no verán de 1874.[5]
Etimoloxías
Para a do xénero, ver Mesoplodon.
O epíteto específico, grayi, foi unha homenaxe de von Haast ao naturalista e zoólogo inglés John Edward Gray.[5]
Sinónimos
Ademais do nome actualmente válido, a especie coñeceuse tamén polos sinónimos:[1]
- Berardius hectori Hector, 1874
- Mesoplodon australis Flower, 1878
- Mesoplodon haasti Flower, 1878
- Mesoplodon layardi Lahille, 1905
- Oulodon grayi von Haast, 1877
Remove ads
Características
As principais características desta especie son:[6]
- Corpo delgado coa cabeza pequena con fronte plana. O fociño é longo e fino, presentando dous sucos ventrais en forma de "V" na área da garganta.
- A súa cor é gris escura na parte dorsal e de gris clara a branca na ventral, a mandíbula e a garganta.
- A aleta dorsal, falcada, está situada no terzo posterior do dorso.
- Alcanza unha lonxitude de entre os 5,5 e os 6 m, e un peso duns 4 800 kg.
Remove ads
Distribución e poboación
Esta especie é propia do hemisferio sur, onde se encontra entre os 30 e os 45º S. Rexistráronse varamentos en Nova Zelandia, Australia, Suráfrica, América do Sur e as Illas Malvinas.
No Atlántico norte é considerada como divagante, con avistamentos na costa de Andalucía (España)[7] e un varamento rexistrado na costa neerlandesa, o único en Europa.[6]
Non hai estimacións da abundancia nin das tendencias de poboación para esta especie, aínda que quizais non sexa tan rara como algunhas outras especies de Mesoplodon. Thompson et al. (2016) suxeriron, baseándose na xenética que a poboación é numerosa.[8]
Ameazas
Hai pouca información específica dispoñíbel sobre ameazas antrópicas para o zifio de Gray.[9] Nunca houbo unha pesca desta especie. As redes de enmalle e palangres á deriva son abundantes e estendidas nos océanos, e sábese que os zifios enrédanse e afogan debido a capturas incidentais.[10][11][12] Descoñécese o alcance desta ameaza para esta especie e a partir de 2020 non se coñecen casos deles como capturas accesorias.
Esta especie, ao igual que outros zifios, é probábel que sexa vulnerábel a ruídos antropoxénicos fortes, como os xerados polos sónares da Mariña e polas exploracións sísmicas.[13] O uso do sonar activo desde embarcacións militares relacionouse con varamientos masivos deste zifio.[14][15]
A evidencia de individuos varados de varias especies similares indica que tragaron artigos de plástico desbotados, o que eventualmente pode conducir á morte,[16] polo que esta especie tamén pode estar en risco.
Os impactos previstos do cambio climático global no medio mariño poden afectar a esta especie, aínda que a natureza dos impactos non está clara.[17]
Remove ads
Estado de conservación
A Unión Internacional para a Conservación da Natureza e dos Recursos Naturais (UICN), tendo en conta que non hai información sobre a abundancia ou as tendencias da poboación desta especie clasificouse como DD (datos insuficientes) na súa Lista vermella en 2008. A linguaxe clarificadora nas directrices (versión 14, 2019) afirma que: "se os datos son tan incertos tanto CR como LC son categorías plausibles, pero o taxon pode seguiu, nese ano, como DD". Aínda que a información é escasa, esta especie parece encontrarse nunha variedade de lugares e nunha gran franxa de océano no hemisferio sur e non é rara, polo tanto a categoría de CR non se pode aplicar de forma plausible. Polo tanto, concluíuse que a especie non pertence á categoría DD. No ano 2020 a UINC considera que a especie non é rara e parece ser polo menos bastante común polo menos nalgunhas partes da súa área de distribución. As ameazas típicas que poden producir descensos na súa abundancia, especialmente o ruído antrópico e as capturas accidentais da pesca, non son frecuentes na maior parte da súa área de distribución, o que fai que LC (pouco preocupante) sexa a categoría máis plausible.[18]
Remove ads
Notas
Véxase tamén
Wikiwand - on
Seamless Wikipedia browsing. On steroids.
Remove ads