Nevio Scala

Nevio Scala, nado en Lozzo Atestino, Padua, o 22 de novembro de 1947, é un exfutbolista e exadestrador italiano.

Nevio Scala

Biografía
Nacemento	22 de novembro de 1947 (77 anos) Lozzo Atestino, Italia (pt)
Altura	174 cm
Peso	71 kg
Actividade
Ocupación	futbolista (–1981), adestrador de fútbol
Deporte	fútbol
Posición de xogo	Centrocampista
Traxectoria   Equipo 1965–1969   A.C. Milan 11 (0) 1966–1967 → cesión:    AS Roma 28 (1) 1969–1971 Vicenza Calcio 59 (2) 1971–1973   ACF Fiorentina 50 (6) 1973–1975   Inter de Milán 26 (1) 1975–1976   A.C. Milan 23 (0) 1976–1979 Calcio Foggia 1920 85 (2) 1979–1980 AC Monza 14 (0) 1980–1981 U.S. Adriese 23 (1)   Selección nacional 1969–1969   Italia sub-21 1 (0)   Adestrador – Reggina 1914

Xogaba como centrocampista e militou en varios clubs italianos, gañando varios títulos durante a súa etapa no Milan. Como adestrador, é principalmente lembrado polo seu labor á fronte do Parma durante a época dourada do club na década de 1990, na que, con Scala no banco, o equipo pasou da Serie B a gañar varios títulos nacionais e europeos.

Traxectoria

Como futbolista

Tivo unha destacada carreira como centrocampista en varios equipos italianos da Serie A (Roma, Milan, Vicenza e Inter de Milán) e, posteriormente, xogou tamén no Foggia, Monza e Adriese, de menor categoría. A súa época máis triunfante foi a que viviu vestindo a camiseta do Milan, co que gañou unha liga, unha Copa de Europa e unha Recopa de Europa.

Como adestrador

Comezou a súa carreira como adestrador no Reggina, ao que ascendeu dende a Serie C ata a Serie B. En 1989 colleu as rendas do Parma, na Serie B. Ocupou ese cargo durante seis anos, levando ao club emiliano ao seu primeiro ascenso á Serie A en 1990 e,^[1] posteriormente, converteu o equipo nun dos principais clubs de Italia, grazas en boa parte ao apoio financeiro do presidente e fundador de Parmalat, Calisto Tanzi. Gañou a Copa de Italia en 1992, a Recopa de Europa e a Supercopa de Europa en 1993 e a Copa da UEFA en 1995, ademais de disputar varias finais máis. O seu mellor resultado na liga foi un terceiro posto na tempada 1994/95. Deixou o club en xuño de 1996.^[2]

Durante a tempada 1996/97, aceptou a oferta de Luciano Gaucci para adestrar o Perugia, que estaba a pasar momentos difíciles, pero non logrou evitar o descenso á Serie B. Posteriormente adestrou varios equipos estranxeiros, sendo o primeiro deles o Borussia Dortmund alemán, co que gañou a Copa Intercontinental en 1997. No ano 2000 chegou ao Beşiktaş, converténdose no terceiro adestrador italiano en adestrar un equipo turco, despois de Giuseppe Meazza e Sandro Puppo. Máis tarde pasou polo Shakhtar Donetsk, co que gañou a liga ucraína e a Copa de Ucraína, e polo Spartak de Moscova.

Tras regresar ao seu Lozzo Atestino natal, presentouse á alcaldía e foi concelleiro dende 2007.^[3] Ademais traballou como comentarista na Rai Radio 1.^[4]

Presidencia do Parma

Nevio Scala no 2002.

En xullo de 2015 accedeu á presidencia do novo Parma, refundado despois de que o club orixinal desaparecese por problemas económicos.^[5] O exfutbolista Luigi Apolloni foi elixido como adestrador.^[6] O Parma conseguiu regresar ao fútbol profesional italiano, subindo ata a Lega Pro,^[7] pero Scala acabou dimitindo en novembro de 2016, por non estar de acordo coa decisión dos propietarios do club de despedir ao adestrador Apolloni e ao director técnico Lorenzo Minotti, ambos antigos xogadores seus durante os seus tempos como adestrador do Parma.^[8]

Palmarés

Como futbolista

Milan

• Serie A (1): 1967/68.
• Copa de Europa (1): 1968/69.
• Recopa de Europa (1): 1967/68.

Como adestrador

Parma

• Copa de Italia (1): 1991/92.
• Recopa de Europa (1): 1992/93.
• Supercopa de Europa (1): 1993.
• Copa da UEFA (1): 1994/95.

Borussia Dortmund

• Copa Intercontinental (1): 1997.

Shakhtar Donetsk

• Premier Liha (1): 2001/02.
• Copa de Ucraína (1): 2001/02.