Pardal do deserto

O pardal do deserto (Passer simplex) é unha especie de ave paseriforme da familia dos paséridos pertencente ao xénero Passer.

Pardal do deserto Passer simplex
Estado de conservación
Pouco preocupante[1]
Clasificación científica
Reino: Animalia Filo: Chordata Subfilo: Vertebrata Clase: Aves Orde: Passeriformes Suborde: Passeri Infraorde: Passerida Superfamilia: Passeroidea Familia: Passeridae Xénero: Passer Especie: P. simplex
Nome binomial
Passer simplex (Lichtenstein, 1823)
Distribución das subespecies Distribución das subespecies

Características

É un pequeno paseriforme, que habita en zonas desérticas. Está perfectamente adaptado ás condicións do hábitat. Prefire criar en oasis ou en ríos secos con algo de vexetación^[2][3] En lugares habitados polo home sofre a competencia de especies invasoras como a pomba, a rula común ou o pardal común.^[3]

Distribución

É unha ave moi característica do Sáhara, todo o norte de África e as zonas desérticas de Asia Central.^[2][3] En África localízanse dúas subespecies: a Passer simplex simplex e a Passer simplex saharae.^[2][3] Existe unha terceira subespecie localizada en Irán, Turkmenistán e Uzbekistán. Esta subespecie coñécese como pardal de Zarudny (Passer simplex zarudnyi), sendo considerada por algúns expertos coma especie propia, debido a súa falta de dimorfismo sexual, que é moi marcado nas outras dúas subespecies.^[2][3] (Ver taxonomía).

Taxonomía

Descrición

A especie foi descrita en 1823 polo médico, explorador e zoólogo alemán Martin Lichtenstein, nun traballo publicado en Verzeichnis der Doubletten des Zoologischen Museums der Koeniglichen Universität zu Berlin, 1823: 21, baixo o nome de Frigilla simplex.^[4]

En 2009, Kirwan et al. consideraron a subespecie Passer simplex zarudnyi como especie inependente, Passer zarudnyi.^[5][6]
O Congreso Ornitolóxico International aceptou este cambio na súa clasificación de referencia, versión 3.5 (2013).

Subespecies

Segundo a clasificación de referencia aludida, este paxaro comprende só 2 subespecies:

• Passer simplex simplex (Lichtenstein, 1823)
• Passer simplex saharae Erlanger, 1899

Porén, o ITIS segue a considerar a día de hoxe as tres subespecies antecitadas:^[7]

• Passer simplex saharae Erlanger, 1899
• Passer simplex simplex (Lichtenstein, 1823)
• Passer simplex zarudnyi Pleske, 1896

Galería

• 
  En Benichab, Mauritania
• 
  Ovos de Passer simplex sahara. Museo de Toulouse
• 
  Lámina dunha parella, na quew se aprecia o seu dimorfismo sexual
• 
  Lámina de 1838 de Passer simplex macho (arriba) e femia (abaixo)
• 
  Ilustración dos machos de Passer simplex saharae (arriba) e Passer zarudnyi (abaixo)