Quilomicron

Os quilomicrons^[1] son un tipo de partículas globulares de lipoproteicas formadas por unha mestura de triglicéridos (85-92%), fosfolípidos (6-12%), colesterol (1-3%) e proteínas (1-2%).^[2] Transportan os lípidos da dieta desde os intestinos a outras partes do corpo. Os quilomicrons son un dos cinco grandes tipos de lipoproteínas, as de maior tamaño e menor densidade entre elas; as outras son as VLDL, IDL, LDL e HDL, as cales permiten o transporte de graxas e colesterol insolubles a través da solución de base acuosa do sangue. Os quilomicrons prodúcense nos enterocitos (células do epitelio intestinal que absorben os alimentos dixeridos) e pasan ao sangue.

Esquema dun quilomicron.

Función

Estrutura dun quilomicron
ApoA, ApoB, ApoC, ApoE (apolipoproteínas); T (triglicéridos); C (colesterol); verdes con colas amarelas (fosfolípidos).

Os quilomicrons transportan os lípidos exóxenos procedentes da dixestión dos alimentos desde o intestino ao fígado, tecido adiposo, cardíaco e músculo esquelético, por vía primeiro linfática e despois sanguínea. Unha vez alí, os triglicéridos que levan son descargados pola actividade da lipoproteína lipase. Os restos que quedan dos quilomicrons despois desta descarga son captados polo fígado.

Estadios

Poden distinguirse tres estados no ciclo dos quilomicrons:

• Quilomicrons nacentes.
• Quilomicrons maduros.
• Restos de quilomicrons.

Quilomicrons nacentes

Os triglicéridos son emulsionados pola bile e hidrolizados polos encimas lipases, orixinándose unha mestura de ácidos graxos e monoglicéridos. Estes despois pasan do lume intestinal ao interior dos enterocitos, onde son reesterificados, formándose de novo triglicéridos. Despois mestúranse os triglicéridos con fosfolípidos e ésteres do colesterol, e apolipoproteínas B-48 para formar os quilomicrons nacentes. Estes son liberados por exocitose desde os enterocitos aos vasos quilíferos (linfáticos) das vilosidades intestinais que máis tarde desembocan na circulación sanguínea na conexión entre o conduto torácico linfático e a vea subclavia.

Os quilomicrons nacentes están compostos principalmente por triglicéridos (85%) e conteñen algo de colesterol e ésteres do colesterol. O principal compoñente apolipoproteico é a apolipoproteína B-48 (apo B-48).

Quilomicrons maduros

Mentres están a circular polo sangue, os quilomicrons intercambian compoñentes coas lipoproteínas de alta densidade (HDL). As HDL ceden a apolipoproteína C-II (APOC2) e a apolipoproteína E (APOE) aos quilomicrons nacentes, que deste modo se converten en quilomicrons maduros (ou denominados simplemente quilomicrons). A APOC2 é o cofactor para a actividade da lipoproteína lipase (LPL).

Restos de quilomicrons

Unha vez que se distribúe a carga de triglicéridos, os quilomicrons devolven a APOC2 ás HDL (pero conservan a APOE), e o resto que queda do quilomicron é agora de só 30–50 nm de diámetro. As APOB48 e APOE son importantes para identificar estes quilomicrons residuais no fígado para a súa endocitose e degradación.