Moon Jae-in

Moon Jae-in (kóreska: 문재인) (f. 24. janúar 1953) er fyrrverandi forseti Suður-Kóreu.^[1] Hann var kjörinn forseti árið 2017 eftir að forvera hans, Park Geun-hye, var vikið úr embætti.

Moon Jae-in
문재인
Moon Jae-in árið 2017.
Forseti Suður-Kóreu
Í embætti 10. maí 2017 – 10. maí 2022
Forsætisráðherra	Yoo Il-ho (starfandi) Lee Nak-yeon Chung Sye-kyun Hong Nam-ki (starfandi) Kim Boo-kyum
Forveri	Hwang Kyo-ahn (starfandi)
Eftirmaður	Yoon Suk-yeol
Persónulegar upplýsingar
Fæddur	24. janúar 1953 (1953-01-24) (72 ára) Geoje, Suður-Kóreu
Stjórnmálaflokkur	Lýðræðisflokkurinn
Maki	Kim Jung-sook (g. 1981)
Börn	2
Háskóli	Kyung Hee-háskóli
Starf	Lögfræðingur, stjórnmálamaður
Undirskrift

Moon er fyrrverandi aðgerðasinni og mannréttindalögfræðingur og hafði verið aðalforsetaritari þáverandi forseta Suður-Kóreu, Roh Moo-hyun.^[2] Moon var eitt sinn leiðtogi kóreska Demókrataflokksins og sat á þingi fyrir flokkinn frá 2012 til 2016. Hann var frambjóðandi sameinaða Lýðræðisflokksins í forsetakosningum ársins 2012 en tapaði þar naumlega fyrir Park Geun-hye.

Sem forseti beitti Moon sér fyrir því að tryggja frið á Kóreuskaga og bæta samskipti við Norður-Kóreu. Árið 2018 varð Moon fyrsti leiðtogi Suður-Kóreumanna í rúman áratug^[3] til að funda með leiðtoga Norður-Kóreu þegar hann hitti Kim Jong-un. Á fundi þeirra þann 27. apríl sammældust leiðtogarnir um að stefna á að binda formlegan enda á Kóreustríðið og fjarlægja kjarnorkuvopn af Kóreuskaga.^[4]