Seljavallalaug

Seljavallalaug^[1] er 25 metra friðuð útisundlaug á Íslandi fremst í Laugarárgili undir Austur-Eyjafjallasveit.^[2] Laugin er ein elsta sundlaug á Íslandi og var fyrst hlaðin með grjóti árið 1923^[2] og svo steypt ári seinna.

Seljavallalaug að framan.

Seljavallalaug er skammt frá bænum Seljavöllum. Hvatamaður að hleðslu hennar var Björn Andrésson í Berjaneskoti sem fékk Ungmennafélagið Eyfelling til liðs við sig við verkið. Hafin var sundkennsla í lauginni, sem hluti af skyldunámi, árið 1927, sama ár og slíkt nám hófst í Vestmannaeyjum. Laugin er um 25 metrar á lengd og 10 á breidd og var stærsta sundlaug á Íslandi þar til árið 1936.^[2]

Árið 1990 var byggð ný laug um 2 km utar í dalnum, en enn má fólk fara í gömlu laugina sér að kostnaðarlausu en á eigin ábyrgð. Laugin er hreinsuð einu sinni á sumri. Fram að því er hún einatt þakin þykku slýi sem kallar á aðgát.

Eftir eldgosið í Eyjafjallajökli 2010 fylltist Seljavallalaug af ösku. Snemmsumars 2011 kom saman hópur sjálfboðaliða til að hreinsa laugina með skóflum og gröfum.^[3]

Ljósmyndir

• 
  Seljavallalaug
• 
  Seljavallalaug hin nýrri, inn eftir dalnum er eldri laugin
• 
  Upplýsingaskilti um Seljavallalaug á húsinu þar sem búningsklefarnir eru
• 
  Nærmynd af búningsklefanum
• 
  Búningsklefarnir
• 
  Yfir vatnið
• 
  Hlíðarnar í kring um laugina