ស្រុកសៀមរាប

ស្រុកសៀមរាប គឺជាស្រុកមួយនៅក្នុងចំណោមស្រុកទាំង ១២ របស់ខេត្តសៀមរាបដែលជាស្រុកនិងជាទីរួមខេត្តរបស់ខេត្តសៀមរាបផ្ទាល់តែម្តងដែលមានផ្ទៃក្រឡា ៣៥២ គីឡូម៉ែត្រការ៉េ។

លក្ខណៈភូមិសាស្ត្រ

ស្រុកសៀមរាបមានព្រំប្រទល់ខាងជើងជាប់នឹងស្រុកអង្គរធំ ខាងកើតជាប់នឹងស្រុកប្រាសាទបាគងនិងស្រុកបន្ទាយស្រី ខាងត្បូងជាប់នឹងបឹងទន្លេសាប និង ខាងលិចជាប់នឹងស្រុកពួក។សណ្ឋានដីនៅក្នុងស្រុកនេះចែកចេញជា ០២ ប្រភេទ ៖

• ដីតំបន់ទំនាបកណ្តាល
• ដីតំបន់ទំនាបក្រោមជាប់មាត់ទន្លេសាប

លក្ខណៈសណ្ឋានដីបែបនេះហើយដែលធ្វើឲ្យស្រុកនេះមានអាកាសធាតុក្តៅហើយសើមសម្បូរភ្លៀងធ្លាក់ដែលអំណោយ ផលដល់ដំណាំកសិកម្មនិងព្រៃឈើ។ដីតំបន់ទំនាបក្រោមជាប់មាត់ទន្លេសាបគឺជាដីសម្បូរជីវជាតិដែលបង្កជាលក្ខណៈងាយស្រួលដល់ដំណាំស្រូវនិងអនុផលព្រៃឈើ។ដីតំបន់ទំនាបកណ្តាលគឺជាដីខ្សោះជីវជាតិមានពណ៌សសម្បូរខ្សាច់មិនសូវអំណោយផលដល់ដំណាំស្រូវទេ។ប្រភពទឹកសំខាន់ៗនៅក្នុងស្រុកនេះមានស្ទឹងសៀមរាបដែលមានទឹកជាប្រចាំនិងប្រភពទឹកក្រោមដីប្រើប្រាស់ដោយការជីកអណ្តូង។

រដ្ឋបាល

ស្រុកសៀមរាប ជាស្រុកមួយស្ថិតនៅក្នុងខេត្តសៀមរាបមាន ១០ ឃុំ និង ៧៦ ភូមិ^[១]៖

លេខកូដ	ឃុំ	អក្សរឡាតាំង
១៧១០០១	ឃុំស្លក្រាម	Sla Kram
១៧១០០២	ឃុំស្វាយដង្គំ	Svay Dangkum
១៧១០០៣	ឃុំគោកចក	Kouk Chak
១៧១០០៤	ឃុំសាលាកំរើក	Sala Kamraeuk
១៧១០០៥	ឃុំនគរធំ	Nokor Thum
១៧១០០៦	ឃុំជ្រាវ	Chreav
១៧១០០៧	ឃុំចុងឃ្នៀស	Chong Khnies
១៧១០០៨	ឃុំសំបួរ	Sambuor
១៧១០០៩	ឃុំសៀមរាប	Siem Reab
១៧១០១០	ឃុំស្រង៉ែ	Srangae

នៅក្នុងចំណោមឃុំទាំង ១០ នេះឃុំស្លក្រាម ឃុំស្វាយដង្គំ ឃុំគោកចក និង ឃុំសាលាកំរើកគឺជាតំបន់ទីប្រជុំជន ចំណែកឯឃុំស្រង៉ែគឺជាតំបន់រដ្ឋបាលស្រុក។