From Wikipedia, the free encyclopedia
Hantonia Insula[1] (Anglice Southampton Island; Inuktitut Shugliaq[2]) est magna insula arctica ad aditum Sinus Hudsonii in Pelve Foxe sita. Quae insula, una e maximis Archipelagi Arctici Canadiensis insulis, est pars Regionis Kivalliq in Nunavut. Area terrestris est 41 214 chiliometra quadrata.[3] Altissimus locus est 625 metra supra aequor maris. Insula est tricesima quarta a maxima in orbe terrarum et nona a maxima in Canada. Solus locus habitatus in insula est Portus Curalii (Coral Harbour), Salliq Inuktitutice appellatus, quem 834 homines anno 2011 incolabant.
Hantonia Insula est una e perpaucis regionibus in Canada, ac sola in Nunavut, quae tempus aestivum neglegit. Ex Hantonia in Anglia appellatur.
Fretum Conglaciatum (Frozen Straight) Hantoniam Insulam et Paeninsulam Melville separat.[4] Inter alias vias aquarias quae insulam circumdant sunt Fretum Roes Welcome (Roes Welsome Sound) ad occidentem versus, Sinus Misericordiae Dei (Bay of Gods Mercy) ad meridiem et occidentem versus, Fretum Fisheranum ad meridiem versus, Fretum Evansianum ad meridiem et orientem versus, et Canalis Foxe (Foxe Channel) ad orientem versus.
Lacus Hansine in terra maxime septentrionali iacet. Paeninsula Bell in meridie et oriente insulae regione patet.[5] Mathiassen Mons, unus e Montibus Porsildianis (Porsild Mountains), est altissimum insulae cacumen. Conformatio insulae conformationis Terrae Novae aliquantulum similis in tabulis geographicis videtur.
Sanctuarium Avium Migratoriarum Sinus Orientalis (East Bay Migratory Bird Sanctuary) et Sanctuarium Avium Migratoriarum Harrii Gibbons (Harry Gibbons Migratory Bird Sanctuary) in Hantonia Insula patent, et locis feturae anserum caerulescentium caerulescentium magni momenti prosunt. Insula praeterea est locus binarum Regionum Aviarium Magni Momenti (Important Bird Areas), ut lege circumscribuntur, quae loci uliginosi Fluminis Boasiani in meridie et occidente ac Sinus Orientalis/Native Bay in meridie et oriente sunt. Aestivae Anserum caerulescentium caerulescentium coloniae ambas regiones obtinent, quae plus quam 10 centesimas omnium harum avium in orbe terrarum una comprehendunt, et quidem plus quam 500 000 harum avium in terra secundum Flumen Boasianum nidificant. Minores, sed etiam magni momenti, sunt coloniae Brantarum berniclarum et multarum specierum avium polarium.[6][7] Hantonia Insula est unus e binis regionibus in Sinu Hudsonio cuius aquas Balaenae mysticeti aestate frequentare solent.[8][9][10]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.