De (Welt-)Sécherheetsrot (Englesch: United Nations Security Council; Arabesch:مجلس الأمن الأمم المتحدة; Chineesesch: 联合国安全理事会; Franséisch: Conseil de sécurité des Nations unies; Russesch: Совет Безопасности Организации Объединённых Наций; Spuenesch: Consejo de Seguridad de Naciones Unidas) ass dat mächtegst Organ vun de Vereente Natiounen.
Sëtzungssall vum Sécherheetsrot am UN-Haaptquartéier zu New York
D'Sëtzung fir d'Konstitutioun vum Sécherheetsrot war de 17. Januar1946. Déi an déi follgend Sëtzunge goufen am Londoner Church House ofgehalen.
De Rot besteet aus fënnef permanenten an zéng net-permanente Membere vun de Vereente Natiounen.
All Joer gëtt d'Hallschent vun den zéng Länner, déi wiesselen, duerch d'UN-Generalversammlung op zwee Joer nei gewielt. Si gi vun der Generalversammlung confirméiert an no regionale Gruppen ausgesicht. Sou gëtt dorop geuecht, datt vun den zéng net-permanente Memberen der dräi aus Afrika, zwéin aus Asien, zwéin aus Latäinamerika, een aus Osteuropa an zwéin aus Westeuropa oder der iwwereger westlecher Welt (wéi: Kanada, Australien oder Neiséiland) kommen.
Tëscht dem Ausscheeden an dem Erëmwiele vun engem Staat aus dem Sécherheetsrot muss op d'mannst ee Joer leien – datt e Land direkt erëmgewielt gëtt, ass also ausgeschloss. En net festgeschriwwent, awer praktizéiert Gesetz ass, datt bannent den uewe genannte Weltregiounen e rotéirende System herrscht, dat alle Länner erméiglecht, an engem festen Turnus e Sëtz am Sécherheetsrot ze hunn. De Representant vun engem Sécherheetsrot-Member muss zu all Zäit am UNO-Haaptquartéier erreechbar sinn, soudatt de Rot jiddwerzäit zesummentriede kann.
