Weimeschkierch

Weimeschkierch ass ee vun de 24 offizielle Quartiere vun der Stad Lëtzebuerg a läit am Nordoste vun der Haaptstad.

Weimeschkierch
Vue op Weimeschkierch
An anere Sproochen	fr: Weimerskirch de: Weimerskirch
Land	Lëtzebuerg
Kanton	Lëtzebuerg
Gemeng	Lëtzebuerg
Buergermeeschter	Lydie Polfer (DP)
Awunner	2.480
	31. Dezember 2024
Fläch	110,50 ha
Héicht	352,20 m
Koordinaten	49° 37’ 41’’ N       06° 08’ 6’’ O

Weimeschkierch huet zur Gemeng Eech gehéiert a war am Fong mat Eech eng Unitéit. Dodrun erënnert och de Sproch „Weimeschkierch an Eech leien an engem Streech^[1]“.

Geographie

Weimeschkierch grenzt am Norden un Dummeldeng an dann, am Sënn vun der Auer, un d'Gemeng Nidderaanwen an d'Quartiere Kierchbierg, Pafendall an Eech.

De Quartier huet eng Fläch vun 110,50 ha a läit op enger Héicht tëscht 237,4 an 352,2 m.

Ursprong vum Numm

„Weimeschkierch“ staamt aus der fränkesch-merowengescher Epoch a geet op eng vun den eelste Kultplazen zu Lëtzebuerg zeréck. Am Joer 723 huet den Hausmeier Karl Martell d'Uertschaft „Weimeschkierch“ der Abtei St Maximäin vun Tréier geschenkt. Et huet sech ëm fränkeschen Haff gehandelt, zu deem och eng „privat“ Kierch, d'Vimaris ecclesia gehéiert huet, also engem Gotteshaus, dat de Frank Wimar op sengem Grond a Buedem opgeriicht hat.

Geschicht

Zu Weimeschkierch hu bis ufanks vum 20. Joerhonnert haaptsächlech Händlerfamillje gewunnt déi uechtert d'Land gezu si fir Kreemchen (Parzeläin, Bitzgeschier asw.) géint Lompen an aalt Eisen ze tauschen. D'Lompekréimer, déi sech selwer Lakerte genannt hunn, hunn ënner sech d'Lakersprooch oder Lakerschmus geschwat, d'Sprooch vun de Jéiner.

 Méi Informatioun doriwwer am Artikel: Jéinesch.

Awunner

2001 hunn zu Weimeschkierch 1.472 Leit gewunnt; op den 31. Dezember 2024 waren et der 2.480. Den Undeel vun de Lëtzebuerger louch bei 30,85 % géintiwwer 69,15 % Auslänner^[2].

Nationalitéiten zu Weimeschkierch (31. Dezember 2024)^[2]

Rang	Nationalitéit	Awunner	Undeel
	TOTAL	2 480	100,00
1	Lëtzebuerg	765	30,85
2	Frankräich	333	13,43
3	Portugal	222	8,95
4	Italien	172	6,94
5	Belsch	77	3,10
6	Rumänien	69	2,78
	Spuenien	69	2,78
7	Däitschland	61	2,46
	Polen	61	2,46
8	Indien	41	1,65
9	Litauen	40	1,61
	Griicheland	40	1,61
10	Irland	34	1,37
	Top 10	1 815	75,19
	Aner Nationalitéiten	599	24,81

Kuckt och

• Kierch Lëtzebuerg-Weimeschkierch
• Naturschutzgebitt Kuebebierg
• Schëttermarjal, e Bëschhank südlech vu Weimeschkierch
• Géisserei Wies

Literatur

• Michel Schmitt, 1992, „Weimerskirch, “die Urpfarrei” der Stadt Luxemburg“, ons stad Nr 41, S. 20-21
• Fernand Théato, 2006, „Weimeschkierch an Eech, leien an engem Streech“ an: Kräiz a quier duerch d'Stad an d'Gemeng Lëtzebuerg, Chorale Sang & Klang. S. 100-103

Um Spaweck

Commons: Weimeschkierch – Biller, Videoen oder Audiodateien

• Tessy Glodt, Kierchtuerms­promenaden – Lëtzebuerg - Weimeschkierch

Referenzen an Notten

1. deels och „Dummeldeng, Weimeschkierch an Eech leien an engem Streech”
2. Stad Lëtzebuerg, La ville en chiffres - État de la population au 31.12.2024.