Венера (божица)

Венера е римска божица на пролетта и заштитничка на градините, а подоцна и божица на убавината, љубовта и животот. Таа се родила на Кипар, од морска пена.^[1] Венера била сопруга на богот Вулкан и мајка на Купидон (Амур). Таа го изневерила Вулкан со Марс и со Адонис, Анхиз. Согласно митот, од љубовната врска со тројанецот Анхиз, Венера го родила јунакот Енеј.

Милоска Венера (реплика, Народна Галерија на Словенија).

Астролошкиот симбол на Венера.

Култот на Венера

На божицата Венера ѝ била посветено растението мирта.^[2]

Во другите митологии

• Венера во старогрчката митологија е позната како Афродита.
• Библија е името со кое Феникијците го означувале ова божество. На Библија ѝ бил посветен грандиозен храм во градот Библо.

Венера во уметноста и во популарната култура

Венера, како симбол на убавината, често се јавува како инспирација и тема во уметноста и во популарната култура.

Венера како мотив во книжевноста

• „Црната Венера“ - книга на англиската писателка Анџела Картер.^[3]
• „Венера од Арле“ - книга на францускиот поет Теодор Обанел.^[4]
• „Рацете на Венера“ - збирка поезија на чешкиот поет Јарослав Сајферт од 1936 година.^[5]
• „Дворскиот шут и Венера“- песна во проза на францускиот поет Шарл Бодлер.^[6]
• „Илска Венера“ (La Vénus d’Ille) - новела на францускиот писател Проспер Мериме од 1837 година.^[7]

Венера како мотив во музиката

• „Венера како момче“ (англиски: Venus As A Boy) — песна на исландската поп-музичарка Бјорк (Björk) од 1993 година.^[8]
• „Венера во крзно“ (англиски: Venus in Furs) — песна на американската рок-група „Велвет андергаунд“ (Velvet Underground) од 1966 година.^[9]
• „Милоската Венера“ (англиски: Venus de Milo) — џез-композиција на Џери Малиган (Gerry Mulligan) од 1949 година.^[10]
• „Милоска Венера“ (англиски: Venus De Milo) — песна на американскиот поп-музичар Принс (Prince) од 1986 година.^[11]
• „Венера“ (англиски: Venus ) — песна на американската рок-група „Телевижн“ (Television) од 1977 година.^[12]