Зенфтенберг

Зенфтенберг (германски: Senftenberg, лужички: Zły Komorow) — град во јужен Бранденбург, Германија, административно седиште на округот Горен Шпревалд-Лужица.

За други истоимени места, погледајте Зенфтенберг (појаснување).

Зенфтенберг Senftenberg/Zły Komorow
Зенфтенберг
Управа
Земја	Германија
Покраина	Бранденбург
Округ	Горен Шпревалд-Лужица
Градоначалник	Андреас Фредрих (СДП)
Основни податоци
Површина	126,94 км2
Надм. височина	102 м
Население	23.405 (31 декември 2022)[1]
- Густина	184 жит/км2
Други информации
Часовен појас	CET/CEST (UTC+1/+2)
Рег. табл.	OSL
Пошт. бр.	01968
Повик. бр.	03573
Портал	www.senftenberg.de
Местоположба на градот Зенфтенберг во рамките на округот Горен Шпревалд-Лужица
Карта
Координати	51°31′N 14°01′E

Географија

Зенфтенберг се наоѓа во југозападниот дел на историската област Долна Лужица на границата со Саксонија. Неговиот центар се наоѓа северно од реката Шварце Елстер и вештачкото Зенфтенбершко Езеро, дел од синџирот на лужички езера, околу 20 километри северозападно од Хојерсверда и 35 километри југозападно од Котбус.

На исток од градот се наоѓа големо железничко товарно депо.

Историја

Зенфтенберг бил првпат споменат во декрет од 1279 издаден од Хајнрих III, маркгроф на Мајсен. Со Долна Лужица, населбата била припоена кон Кралството Чешка во 1368. Изборниот кнез Фридрих II на Саксонија го припоил Зенфтенберг во 1448, кога областа како гранично упориште на династијата Ветин била одвоена од чешката Лужица, до 1635 кога сите лужички територии паднела под власта на Саксонија со мирот постигнат во Прага. Според Виенскиот конгрес во 1815 г., Долна Лужица била припоена од Прусија и администрирана во склоп на покраината Бранденбург.

Меѓународни односи

Главна статија: Список на збратимени градови во Германија

Зенфтенберг е збратимен со:

• Питлинген, Германија
• Нова Сул, Полска
• Зенфтенберг, Австрија
• Сен Мишел сир Орж, Франција
• Веспрем, Унгарија
• Жамберк, Чешка
• Фрезаграндинарија, Италија

Туризам

Зенфтенбершкото Езеро е популарно одредиште за дневни излети и одмори. Во 1973, поранешниот отворен јагленокоп бил официјално отворен за јавноста. Денес, езерото е познато по исклучителниот квалитет на водата. Тоа е дел од т.н. Лужичка езерска област, група на 23 вештачки езера. Околу езерото постои велосипедска патека во должина од 18 километри, која е поврзана со голем број на регионални и национални велосипедски патеки.

Демографија

По втората половина на 19 век, бројот на жители се зголемил поради работниците кои дошле да работат во јагленокопите во Зенфтенберг. По повторното обединување на Германија, многу жители се иселиле во западниот дел на Германија.

Движење на бројот на жители во Зенфтенберг од 1300 до 2008[2][3]
Година	Жители		Година	Жители		Година	Жители		Година	Жители		Година	Жители		Година	Жители
1300	400		1858	1.517		1939	17.566		1989	31.580		1996	26.647		2003	29.474
1474	600		1867	1.638		1946	17.783		1990	29.622		1997	27.109		2004	29.136
1555	900		1875	2.847		1950	18.260		1991	28.840		1998	26.424		2005	28.774
1575	918		1890	5.134		1964	24.053		1992	28.470		1999	25.576		2006	28.071
1680	1.150		1910	13.742		1971	24.367		1993	28.123		2000	24.740		2007	27.515
1806	979		1925	17.472		1981	32.005		1994	27.637		2001	30.539		2008	27.417
1818	819		1933	17.803		1985	32.278		1995	27.336		2002	29.957

Галерија

• 
  Стариот град на Зенфтенберг
• 
  Реновирани станбени блокови
• 
  Лутеранска црква во Јитендорф

Поврзано

• Зенфтенбершко Езеро