Награда „Пегаз“

Награда „Пегаз“ – книжевна награда за најдобар необјавен македонски роман на годината.

Книжевна награда „Пегаз“

Историјат

Наградата „Пегаз“ е востановена во 2019 година, како своевидно продолжение на етаблираната награда „Роман на годината“, што ја доделува Фондацијата „Славко Јаневски“ за најдобар објавен роман на годината. Целта на наградата „Пегаз“ е да прерасне во книжевен скаут во потрага по квалитетно романескно остварување и по нови писателски гласови што ќе го унапредат овој книжевен вид во рамките на македонската книжевна продукција.

За наградата „Пегаз“

Конкурсот за наградата „Пегаз“ e распишан од издавачката куќа „Арс Ламина“ и Фондацијата за унапредување и промоција на културните вредности „Славко Јаневски“. За наградата можат да конкурираат сите необјавени романи наменети за возрасни или за деца. Романите треба да бидат предложени од самите автори-кандидати за наградата, кои треба да ги достават своите ракописи во електронска форма во „ворд“ или во ПДФ-формат. Ракописите ги оценува тричлена жири-комисија составена од двајца реномирани културни работници и еден претставник од издавачката куќа.

Наградата „Пегаз“ се состои од паричен износ, статуетка и објавување на романот во посебна едиција „Пегаз“.

Досегашни добитници на наградата „Пегаз“

• 2019 - Соња Манџук со романот „Насон прочитана книга“^[1] (од 77 ракописи)
• 2020 - Владо Јаневски со романот „Мртвите знаат најдобро“^[2] (од 61 ракопис)
• 2020 - Љупчо Петрески со романот „Лазарка“^[3] (од 61 ракопис)
• 2021 - Александар Русјаков со романот „Хотел меѓу две војни“^[4] (од 44 ракописи)
• 2022 - Сибо со „Зелениот дворец“^[5] (од 38 ракописи)
• 2023 - Јована Матевска Атанасова со „Риба во(н) мрежа“^[6] (од 36 ракописи)
• 2024 - Владимир Јанковски со „Ехото на акробатите“^[7] (од 56 ракописи)
• 2025 - Фросина Пармаковска со „Кривата Дијана“^[8] (од 45 ракописи)

Романи во најтесен избор

Покрај доделувањето на наградата „Пегаз“, секоја година се селектираат и романи во најтесен избор за објавување:

• 2019 - романот „Курвини синови“^[9] од Александар Русјаков
• 2020 - романите^[10] „Албино трип“ од Александар Русјаков и „Деса“ од Ивана Трајаноска
• 2021 - романите^[11] „Ние“ од Ана Стојаноска и „Мастилна мапа“ од Марија Ралповска
• 2022 - романите^[12] „Писма од лудница“ од Срѓан Ивановиќ, „Мртва коска“ од Димче Парталоски и „Есента во животот на професорот по марксизам“ од Моџо Килингтон
• 2023 - романите^[13] „Страшни приказни“ од Сузана Камберова, „Неочекувано“ од Ана Мовска (псевдоним) и „Интервенција“ од Игор Рамдедов
• 2024 - романите^[14] „И“ од Кристина Краличин, „Брчка или За болешливото здравје“ од Филип Љ. Трајковски и „73 денови“ од Иво Митев
• 2025 - романите^[15] „Пацер“ од Коста Бојчески, „Изгубени низ дупки во џебовите“ од Владо Јаневски и „Солдат 1882“ од Добре Тодоровски