Неорганска киселина

Неорганска киселина (или минерална киселина) — киселина добиена од едно или повеќе неоргански соединенија. Сите овие киселини образуваат водородни јони и конјугираната база кога ќе се растворат во вода.

Особености

Најзастапени неоргански киселини се сулфурната (H₂SO₄), солната (HCl) и азотната киселина (HNO₃).^[1] Се разликуваат по јачина од суперкиселини (на пр. перхлорна киселина) до многу слаби (на пр. борна киселина). Неорганските киселини се многу лесно растворливи во вода и нерастворливи во органски растворачи.

Неорганските киселини се користат во разни области на хемиската индустрија како суровини за синтеза на други хемикалии, било органски или неоргански. Големи количества на овие киселини (особено сулфурната, азотната и солната) се произведуваат за стопански потреби во големи погони.

Ваквите киселини се наоѓаат примена и заради нивните корозивни својства. На пример, разредената солна киселина се користи за отстранување бигор од котли и бојлери, притоа внимавајќи да не се нагризе самиот сад. Овој процес се нарекува одбигорување.

Примери

• Солна киселина (HCl)
• Азотна киселина (HNO₃)
• Фосфорна киселина (H₃PO₄)
• Сулфурна киселина (H₂SO₄)
• Борна киселина (H₃BO₃)
• Флуороводородна киселина (HF)
• Бромоводородна киселина (HBr)
• Перхлорна киселина (HClO₄)
• Јодоводородна киселина (HI)

Поврзано

• Органска киселина