Пеце Атанасовски

Пеце Атанасовски^{[б 1]} (Долнени, 25 октомври 1925 — Скопје, 14 септември 1996) — македонски играорец и инструменталист, кој е сметан за најпознатиот македонски гајдаџија и еден од најплодните собирачи на македонски народни песни и ора.^[1]

Пеце Атанасовски
Роден	25 октомври 1925 Долнени, Кралство СХС
Починал	14 септември 1996(1996-09-14) (возр. 70) Скопје, Македонија
Националност	Македонец
Народност	Македонец
Занимање	играорец, гајдаџија

Животопис

Пеце Атанасовски е роден на 25 октомври 1925 во селото Долнени. Неговите први музички настапи започнале на Радио Скопје во 1946 година, како и во ансамблот „Танец“ во 1950 година. Во периодот од 1959 до своето пензионирање бил раководител на Оркестарот на народни инструменти во Радио Скопје и кореограф на повеќе од дваесет културно-уметнички друштва во Македонија. Од 1966 година, па во текот на следните 29 години, раководел со Фолклорната школа за странци во Отешево. Во 1973 година го основал и бил директор на Долненскиот фестивал. Со своите гостувања со разни културно-уметнички друштва низ светот ги афирмирал високите достоинства на македонскиот мелос. Како светски признат народен инструменталист држел часови на повеќе универзитети низ светот, меѓу кои и во Лос Анџелес и Токио. Починал на 14 септември 1996 година во Скопје.^[1]

Награди

Атанасовски бил носител на 19 меѓународни награди на светските фестивали во Ланголен, Англија, Брно, Чешка итн. Во конкуренција на 1.800 гајдаџии од целиот свет, тој го освоил првото место и наградата „Златна гајда“ на фестивалот во Ериче, Италија во 1968 година.^[1] Во 2022 година, постхумно му е доделен Орден за заслуги за Македонија.

Творештво

Во текот на својата кариера, Атанасовски собрал фолклорна збирка од околу 20.000 народни песни и ора.^[1] Освен нив, компонирал и новосоздадени фолклорни песни, меѓу кои се издвојуваат „Ајде чудо, чудо“ и „Като, Като, Катерино“.^[2]

Чествување

Долненскиот фестивал по смртта на Пеце Атанасовски бил именуван во негова чест и го добил името Фестивал на народни инструменти и песни „Пеце Атанасовски“. Споменици во негова чест се подигнати во родното село Долнени и во Прилеп.

• 
  Споменикот во Долнени
• 
  Споменикот во Прилеп

Белешки

1. Некои извори, како на пример Македонска енциклопедија, неговото презиме го посочуваат како „Атанасоски“. Сепак, на натписната плоча приложена кон неговиот споменик во Долнени, неговото презиме е споменато како „Атанасовски“.