Црква „Св. вмч. Георгиј“ - Кочани
црква во градот Кочани From Wikipedia, the free encyclopedia
Remove ads
Св. вмч. Георгиј (позната и како Свети Ѓорѓи) — православен христијански храм кој е седиште на Кочанското архијерејско намесништво за Кочанската и Виничката Котлина, со дваесетина парохии, а под директна надлежност на Брегалничката епархија.
Remove ads
Местоположба
Црквата е сместена во централното подрачје на Кочани, на јужната падина на ридот Локубија, на десната страна од Кочанска Река. До неа се приоѓа од три страни, од исток, југоисток и од запад, каде што се наоѓаат и влезовите во црковниот двор.
Градба
Не постои точен датум или година на почетокот на изградбата, но врз основа на најстарите расположливи докази од белешки и записи, може да се констатира дека сегашниот храм е изграден на темелите на црква која постоела на почетокот на XIX век. Месното население побарало и добило дозвола од турските власти за изградба на православна црква и според сочуваната црковна архива, писмената согласност била издадена од султанот Мехмед хан V, син на Абдулмеџид II, познат и како Решад („секогаш победник“).
Во образложението на дозволата стои дека во маалото Стришани во Кочани, во близина на разрушена црква, се дава одредена површина државно земјиште за да се изгради нова црква. Со документот е определено објектот да биде од камен, со должина 29 метри и ширина 20 метри. Висината на чатијата да изнесува 14 метри, а над чатијата уште 5 метри, односно вкупната висина да биде максимум 24 метри. Исто така, била дадена дозвола да се изгради и една камбанарија со висина од 24 и ширина од 4 метри. Сумата од 1000 лири за градењето требало да ја обезбедат богатите граѓани од месното население, а рајата да не плаќа ниту едно акче.
Remove ads
Изглед
Црквата е псевдобазилика, карактеристична за периодот меѓу XVIII и XIX век, изградена од делкан камен, покриена со двосливен покрив, со три куполи, од кои средната е повисока. На јужната и северната страна има по два реда од по четири прозорци. На западната страна околу главниот портал, што е во форма на лак, има уште четири прозорци. Фасадата е во бела боја.
Од северната страна има камбанарија што е градена во истиот период со црквата, а на северозапад, во периодот од 1994 до 1998 година, е изградена крстилница посветена на Покров на Пресвета Богородица. На јужната страна се наоѓа административна зграда во која дел од просториите порано се користеле како крстилница.
Монографија
По повод 100-годишнината од осветувањето на храмот, на 18 ноември 2017 година се одржала вечерна богослужба и промоција на книгата “100 – години од постоењето на црквата Св. вмч. Георгиј“ во Кочани.[1][2]. Во книгата, чии авторки се Илинка Атанасова и м-р Љубинка Ајтовска, на стотина страници, преку написи, фотографии и писмени докази е опишана историјата на црквата Св. вмч. Георгиј, местоположбата, изгледот на иконостасот, живописот и други детали. Издавач на монографијата е Општина Кочани.
Remove ads
Галерија
- Поглед на црквата
- Поглед кон црквата од западната страна
- Поглед кон црквата од југоисточната страна
- Поглед во внатрешноста на црквата кон олтарниот дел
- Трите црковни куполи
- Часовникот на камбанаријата
- Параклисот - крстилница “Покров на Пресвета Богородица“
Поврзано
Наводи
Надворешни врски
Wikiwand - on
Seamless Wikipedia browsing. On steroids.
Remove ads