ပြည်ထောင်စု ရွေးကောက်ပွဲ ကော်မရှင်

ပြည်ထောင်စုရွေးကောက်ပွဲကော်မရှင် (အင်္ဂလိပ်: Union Election Commission၊ အတိုကောက် UEC) သည် မြန်မာနိုင်ငံ၏ နိုင်ငံတော်အဆင့် ရွေးကောက်ပွဲကော်မရှင် တစ်ခု ဖြစ်ပြီး မြန်မာနိုင်ငံ ရွေးကောက်ပွဲများကို ကြီးမှူးကျင်းပရန် တာဝန်ရှိသည့် အဖွဲ့အစည်း ဖြစ်သည်။ ကော်မရှင်သည် ရွေးကောက်ခံ ကိုယ်စားလှယ်လောင်းများနှင့် နိုင်ငံရေးပါတီများ စိစစ်မှတ်ပုံတင်ခြင်းကိုလည်း ဆောင်ရွက်သည်။^[၃]

ပြည်ထောင်စုရွေးကောက်ပွဲကော်မရှင်

မြန်မာအစိုးရအဖွဲ့အစည်း
Union Election Commission
ကော်မရှင် အကျဉ်းချုပ်
ဖွဲ့စည်းခြင်း	မတ် ၈၊ ၂၀၁၀; ၁၅ နှစ် အကြာက (၂၀၁၀-၀၃-08)
ဌာနချုပ်	နေပြည်တော်
ဌာနအကြီးအမှူးများ	ဦးကိုကို [၁] [၂]၊ ဥက္ကဋ္ဌ
အဓိကဥပဒေ	ပြည်ထောင်စုရွေးကောက်ပွဲကော်မရှင်ဥပဒေ
ဝက်ဘ်ဆိုက်	uec.gov.mm

သမိုင်းကြောင်း

နအဖလက်ထက်

နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီသည် ၂၀၁၀ ပြည့်နှစ် မတ်လ ၈ ရက်နေ့တွင် ပြည်ထောင်စုရွေးကောက်ပွဲ ကော်မရှင်ဥပဒေကို ပြဋ္ဌာန်းခဲ့ပြီး မတ်လ ၁၁ ရက်နေ့တွင် ကြေညာချက်အမှတ် (၁/၂၀၁၀) ဖြင့် ပြည်ထောင်စုရွေးကောက်ပွဲကော်မရှင်ကို လုပ်ပိုင်ခွင့် အပ်နှင်းခဲ့သည်။^[၄]

နိုင်ငံတော်စီမံအုပ်ချုပ်ရေးကောင်စီလက်ထက်

နိုင်ငံရေးပါတီများ မှတ်ပုံတင်ခြင်းဥပဒေ ပြင်ဆင်ခြင်း

၂၀၂၃ ခုနှစ်၊ ဇန်နဝါရီ ၂၆ ရက်နေ့တွင် နစကက ပြဋ္ဌာန်းခဲ့သော နိုင်ငံရေးပါတီများ မှတ်ပုံတင်ခြင်းဥပဒေကို တစ်နှစ်ကျော်အကြာ ၂၀၂၄ ခုနှစ်၊ ဇန်နဝါရီ ၃၀ ရက်နေ့တွင် ပြန်လည်ပြင်ဆင်ပြဋ္ဌာန်းခဲ့ပါသည်။ ဥပဒေသစ်တွင် အခန်း ၅ ခန်းနှင့် ပုဒ်မ ၂၇ ခု ပါဝင်ပြီး ပါတီများဖွဲ့စည်းမှတ်ပုံတင်ရန် စံနှုန်းများကို သိသိသာသာ တိုးမြှင့်သတ်မှတ်ထားသောကြောင့် နိုင်ငံရေးပါတီများအကြား ဝေဖန်မှုများ ဖြစ်ပေါ်ခဲ့ပါသည်။ အဓိကအားဖြင့် အခန်း (၂)၊ ပါတီတည်ထောင်ခြင်းနှင့် မှတ်ပုံတင်ခြင်းဆိုင်ရာ ပုဒ်မများကို ဝေဖန်ခဲ့ကြခြင်း ဖြစ်ပါသည်။

ဥပဒေသစ်အရ ပါတီတည်ထောင်လိုပါက အနည်းဆုံး လူ ၁၅ ဦး ရှိရမည်ဖြစ်ပြီး တည်ထောင်သူများသည် အသက် ၂၅ နှစ် ပြည့်ရမည်။ ထို့ပြင် သာသနာ့ဝန်ထမ်း၊ နိုင်ငံ့ဝန်ထမ်း၊ ထောင်ကျနေသူ၊ သောင်းကျန်းသူ/အကြမ်းဖက်/မတရားအသင်းအဖွဲ့ဝင်၊ မူးယစ်ဆေးပြစ်မှုနှင့် ငြိစွန်းသူ၊ နိုင်ငံခြားသား သို့မဟုတ် နိုင်ငံခြားသားအဖြစ် ခံယူထားသူ မဟုတ်ရဟု သတ်မှတ်ထားသည်။^[၅]

ပါတီဝင်ဦးရေ၊ ရန်ပုံငွေနှင့် ရုံးခန်းဆိုင်ရာ သတ်မှတ်ချက်များ

နိုင်ငံရေးပါတီများ မှတ်ပုံတင်ခြင်း ဥပဒေအသစ်၏ ပုဒ်မ ၅ (စ) အရ ပြည်ထောင်စုတစ်ဝန်းလုံး စည်းရုံးမည့်ပါတီဖြစ်ပါက မှတ်ပုံတင်ခွင့်ပြုသည့်နေ့မှ ရက်ပေါင်း ၉၀ အတွင်း ပါတီဝင်ဦးရေ အနည်းဆုံး ၁၀၀,၀၀၀ (တစ်သိန်း) စည်းရုံးရမည်ဖြစ်သည်။ ယခင်ဥပဒေတွင် ၁၀၀၀ သာ လိုအပ်ခဲ့ရာ အဆ ၁၀၀ တိုးမြှင့်ထားသည်ကို တွေ့ရသည်။ တိုင်းနှင့် ပြည်နယ်တစ်ခုအတွင်း၌သာ စည်းရုံးမည့်ပါတီဆိုလျှင် ပါတီဝင်ဦးရေ အနည်းဆုံး ၁၀၀၀ စည်းရုံးရမည်ဟု ပြဋ္ဌာန်းထားရာ ယခင် ၅၀၀ မှ နှစ်ဆ တိုးမြှင့်ထားသည်။

ပုဒ်မ ၅ (ဆ) တွင် ပါတီရန်ပုံငွေနှင့်ပတ်သက်၍ ပြည်ထောင်စုတစ်ဝန်းလုံး စည်းရုံးမည့်ပါတီဆိုလျှင် ကျပ်သိန်း ၁၀၀၀ နှင့် တိုင်းနှင့် ပြည်နယ်တစ်ခုအတွင်း၌သာ စည်းရုံးမည့်ပါတီဆိုလျှင် ကျပ်သိန်း ၁၀၀ ကို မြန်မာ့စီးပွားရေးဘဏ်တစ်ခုခု၌ ငွေစာရင်းဖွင့်ထားကြောင်း အထောက်အထားပြရမည်ဟု ပြဋ္ဌာန်းထားသည်။ ဤပြဋ္ဌာန်းချက်သည် ဥပဒေဟောင်းတွင် မပါဝင်ဘဲ အသစ်ထည့်သွင်းထားခြင်း ဖြစ်သည်။

ပါတီရုံးခန်း ဖွင့်လှစ်မှုနှင့်ပတ်သက်၍ ပုဒ်မ ၅ (ဇ) တွင် ပြည်ထောင်စုတစ်ဝန်းလုံး စည်းရုံးမည့်ပါတီဖြစ်ပါက ရက်ပေါင်း ၁၈၀ အတွင်း မြန်မာနိုင်ငံရှိ မြို့နယ်ပေါင်း ၃၃၀ ၏ အနည်းဆုံးထက်ဝက်ဖြစ်သော မြို့နယ် ၁၆၀ ကျော် (၁၆၅ မြို့နယ်) တွင် ရုံးခန်းများ ဖွင့်လှစ်ရန် လိုအပ်ကြောင်း ပြဋ္ဌာန်းထားသည်။ တိုင်းနှင့် ပြည်နယ်တစ်ခုအတွင်း၌သာ စည်းရုံးမည့်ပါတီဆိုလျှင် အဆိုပါ တိုင်းနှင့် ပြည်နယ်အတွင်းရှိ အနည်းဆုံး ငါးမြို့နယ် တွင် ပါတီရုံးခန်းများ ဖွင့်လှစ်ရမည် ဖြစ်သည်။ ဤပြဋ္ဌာန်းချက်သည်လည်း ယခင်ဥပဒေဟောင်းတွင် ပါဝင်ခြင်းမရှိသည့် အချက်ဖြစ်သည်။

အကျိုးဆက်များ

နစက အသစ်ပြဋ္ဌာန်းလိုက်သော နိုင်ငံရေးပါတီများ မှတ်ပုံတင်ခြင်းဥပဒေပါ ပုဒ်မများကြောင့် ပြည်ထောင်စုတစ်ဝန်းလုံး စည်းရုံးမည့်ပါတီအဖြစ် မှတ်ပုံတင်ရန် နိုင်ငံရေးပါတီအချို့ အခက်အခဲများ ကြုံတွေ့ခဲ့ရကြောင်း ပြောဆိုမှုများ ရှိခဲ့သည်။ ရလဒ်အနေဖြင့် ပြည်ထောင်စုရွေးကောက်ပွဲကော်မရှင် (UEC) သို့ မှတ်ပုံတင်ခွင့် လျှောက်ထားသည့် ပါတီ ၅၀ (ရှိရင်းစွဲ) နှင့် ပါတီအသစ် တည်ထောင်ခွင့် လျှောက်ထားသည့် ပါတီ ၁၅ ပါတီ (စုစုပေါင်း ၆၅ ပါတီ) ရှိခဲ့သော်လည်း ပြည်ထောင်စုတစ်ဝန်းလုံး စည်းရုံးမည့်ပါတီမှာ ၁၂ ပါတီသာ ရှိခဲ့ပါသည်။

ဖြစ်ရပ်များ

ပြည်ထောင်စုရွေးကောက်ပွဲကော်မရှင်ရုံးက ၂၀၂၂ ခုနှစ်၊ ဩဂုတ်လအတွင်း “မြန်မာနိုင်ငံတွင် ပြောင်းလဲကျင့်သုံးမည့် အချိုးကျကိုယ်စားပြုစနစ်” စာအုပ်ကို ထုတ်ဝေခဲ့သည်။ ^[၆]

၂၀၂၅ ခုနှစ်၊ ဇွန် (၁၉) ရက်တွင် ပြည်ထောင်စုရွေးကောက်ပွဲကော်မရှင်ဥပဒေ တတိယအကြိမ် ပြင်ဆင်သည့် ဥပဒေကို နစကက ပြဋ္ဌာန်းခဲ့ပြီး၊​ ယင်းပြင်ဆင်သည့် ဥပဒေအရ အများပြည်သူ၏ ယုံကြည်လေးစားမှုကို ခံယူရရှိသူပုဂ္ဂိုလ်များ သို့မဟုတ် နိုင်ငံ့ဝန်ထမ်းများဖြင့် ကော်မရှင်အဖွဲ့ခွဲကို အနည်းဆုံး သုံးဦးဖြင့် ဖွဲ့စည်းရမည်ဖြစ်သည်။^[၇]

တာဝန်၊ လုပ်ပိုင်ခွင့်နှင့် အပြီးအပြတ်ဖြစ်ခြင်း

ကော်မရှင်၏ တာဝန်နှင့်လုပ်ပိုင်ခွင့်များမှာ အောက်ပါအတိုင်း ဖြစ်သည် -

(၁)	လွှတ်တော် ရွေးကောက်ပွဲများ ကျင်းပြခြင်း၊
(၂)	လွှတ်တော် ရွေးကောက်ပွဲများကို ကြီးကြပ်ခြင်းနှင့် ကြီးကြပ်စေခြင်း၊
(၃)	ကော်မရှင်အဖွဲ့ခွဲ အဆင့်ဆင့်ကို ဖွဲ့စည်းခြင်း၊ ဖွဲ့စည်းစေခြင်း၊ ကြီးကြပ်ခြင်း နှင့် ကြီးကြပ်စေခြင်း၊
(၄)	မဲဆန္ဒနယ်များ သတ်မှတ်ခြင်းနှင့် ပြင်ဆင်သတ်မှတ်ခြင်း၊
(၅)	မဲစာရင်းများ ပြုစုခြင်း၊ ပြုစုစေခြင်း၊ ပြင်ဆင်ခြင်းနှင့် ပြင်ဆင်စေခြင်း၊
(၆)	သဘာဝ ဘေးအန္တရာယ်ကြောင့် သော်လည်းကောင်း၊ နယ်မြေ လုံခြုံရေး အခြေအနေ အရ သော်လည်းကောင်း၊ လွတ်လပ်ပြီး တရား မျှတသော ရွေးကောက်ပွဲ ကျင်းပနိုင်ခြင်း မရှိသည့် မဲဆန္ဒနယ်များ၏ ရွေးကောက်ပွဲများကို ရွှေ့ဆိုင်းခြင်း နှင့် ပယ်ဖျက်ခြင်း၊
(၇)	လွှတ်တော် ကိုယ်စားလှယ်အဖြစ် အသိအမှတ် ပြုလွှာ ထုတ်ပေးခြင်း၊
(၈)	ရွေးကောက်ပွဲ ဆိုင်ရာ အငြင်းပွားမှုကို စစ်ဆေး နိုင်ရေးအတွက် ဥပဒေ နှင့်အညီ ရွေးကောက်ပွဲ ခုံအဖွဲ့များ ဖွဲ့စည်းခြင်း၊
(၉)	ဖွဲ့စည်းပုံ အခြေခံဥပဒေ ပုဒ်မ ၂၇၆၊ ပုဒ်မခွဲ ( ဇ ) အရ ကိုယ်ပိုင် အုပ်ချုပ်ခွင့်ရ တိုင်းဦးစီး အဖွဲ့ သို့မဟုတ် ကိုယ်ပိုင် အုပ်ချုပ်ခွင့်ရ ဒေသ ဦးစီးအဖွဲ့တွင် အဖွဲ့ဝင် အဖြစ် ရွေးချယ် ခန့်ထားရာ၌ ယင်းသို့ ရွေးချယ်ထားသည့် ပုဂ္ဂိုလ်နှင့် ပတ်သက်၍ ကန့်ကွက်ချက် များရှိပါက ယင်းကန့်ကွက် ချက်များကို စစ်ဆေး ဆုံးဖြတ် ပေးနိုင်ရေး အတွက် ရွေးကောက်ပွဲ ခုံအဖွဲ့များ ဖွဲ့စည်းခြင်း၊
(၁၀)	ဖွဲ့စည်းပုံ အခြေခံ ဥပဒေပုဒ်မ ၃၉၆၊ ပုဒ်မခွဲ (က) နှင့် (ခ)တို့အရ လွှတ်တော် ကိုယ်စားလှယ် တစ်ဦးကို တာဝန်မှ ပြန်လည် ရုပ်သိမ်းလိုကြောင်း သက်ဆိုင်ရာ မဲဆန္ဒနယ်၏ မူလ မဲဆန္ဒရှင် များအနက် အနည်းဆုံး တစ်ရာခိုင်နှုန်း တို့က ကော်မရှင်သို့ တင်ပြလာလျှင် ဖွဲ့စည်းပုံ အခြေခံ ဥပဒေ ပုဒ်မ ၃၉၆၊ ပုဒ်မခွဲ (ဂ)၊ (ဃ)၊ (င) တို့နှင့်အညီ စစ်ဆေး ဆောင်ရွက်ခြင်း၊
(၁၁)	ကော်မရှင်အဖွဲ့ခွဲအဆင့်ဆင့်အတွက် ရန်ပုံငွေ ခွဲဝေချထားခြင်း၊ အသုံးစရိတ် များကို ကြီးကြပ်ခြင်းနှင့် ကြီးကြပ်စေခြင်း၊
(၁၂)	နိုင်ငံရေးပါတီများ မှတ်ပုံတင်ခြင်းဥပဒေနှင့်အညီ နိုင်ငံရေးပါတီများကို မှတ်ပုံတင်ခြင်း၊ ကြီးကြပ်ခြင်းနှင့် ကြီးကြပ်စေခြင်း၊
(၁၃)	ဥပဒေတစ်ရပ်ရပ်အရ ပေးအပ်သောတာဝန်များကို ထမ်းဆောင်ခြင်း၊

အောက်ပါကိစ္စရပ်များနှင့် စပ်လျဉ်း၍ ကော်မရှင်၏ ဆုံးဖြတ်ချက်နှင့် ဆောင်ရွက်ချက်များသည် အပြီးအပြတ်အတည်ဖြစ်စေရမည် -

(၁)	ရွေးကောက်တင်မြှောက်ခြင်းဆိုင်ရာ လုပ်ငန်းများ၊
(၂)	ရွေးကောက်ပွဲ ခုံအဖွဲ့များ၏ ဆုံးဖြတ်ချက်များ၊ အမိန့်များနှင့် စပ်လျဉ်းသည့် အယူခံမှု များနှင့် ပြင်ဆင်မှုများ၊
(၃)	နိုင်ငံရေးပါတီဆိုင်ရာ ဥပဒေအရဆောင်ရွက်သောကိစ္စရပ်များ။

အဖွဲ့ဝင်အရည်အချင်း

ပြည်ထောင်စုရွေးကောက်ပွဲကော်မရှင် အဖွဲ့ဝင်များကို အစိုးရမှ အောက်ပါသတ်မှတ်ချက်များဖြင့် ရွေးချယ်ခန့်အပ်သည်။^[၈]

• အသက် ၅၀ နှင့် အထက်ရှိသူ
• ကောင်းမွန်သည့် ဂုဏ်သတင်းရှိသူဟု အစိုးရမှ သတ်မှတ်ခံထားရသူ
• ဂုဏ်သိက္ခာ၊ သမာဓိနှင့် အတွေ့အကြုံရင့်ကျက်သူ
• နိုင်ငံတော်နှင့် နိုင်ငံသားများအပေါ် သစ္စာစောင့်သိသူ
• မည်သည့် နိုင်ငံရေးပါတီများနှင့် ပါဝင်ပတ်သက်ခြင်း မရှိသူ
• မည်သည့် ရုံးလုပ်ငန်းများတွင် ပါဝင်ဆောင်ရွက်ခြင်း မရှိသူ

ဥက္ကဋ္ဌများ စာရင်း

ပြည်ထောင်စုရွေးကောက်ပွဲကော်မရှင် ဥက္ကဋ္ဌများ

စဥ်	ကော်မရှင်ဥက္ကဋ္ဌ	တာဝန်ထမ်းဆောင်သည့်ကာလ	ရက်ပေါင်း
၁။	ဦးသိန်းစိုး	၈ မတ် ၂၀၁၀ - ၃၀ မတ် ၂၀၁၁	၁ နှစ်၊ ၂၂ ရက်
၂။	ဦးတင်အေး	၃၀ မတ် ၂၀၁၁ - ၃၀ မတ် ၂၀၁၆
၃။	ဦးလှသိန်း	၃၀ မတ် ၂၀၁၆ - ၃၁ ဇန်နဝါရီ ၂၀၂၁
၄။	ဦးသိန်းစိုး	၂ ဖေဖော်ဝါရီ ၂၀၂၁ - ၃၁ ဇန်နဝါရီ ၂၀၂၄
၅။	ဦးကိုကို [၉]	၃၁ ဇန်နဝါရီ ၂၀၂၄ - လက်ရှိ	၁ နှစ်၊ ၁၄၁ ရက်

နိုင်ငံတော်စီမံအုပ်ချုပ်ရေးကောင်စီလက်ထက်

၂၀၂၁ ခုနှစ် ဖေဖော်ဝါရီလ ၁ ရက်နေ့တွင် တပ်မတော်မှ နိုင်ငံတော်အာဏာကို ထိန်းချုပ်ပြီးနောက်၊ ၂၀၂၁ ခုနှစ် ဖေဖော်ဝါရီလ ၂ ရက်နေ့တွင် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌက ပြည်ထောင်စုရွေးကောက်ပွဲကော်မရှင်ကို ပြန်လည်ဖွဲ့စည်းခဲ့သည်။ ၎င်းဖွဲ့စည်းပုံမှာ အောက်ပါအတိုင်း ဖြစ်သည် - ^[၁၀]

ကနဦး ဖွဲ့စည်းခြင်း (၂ ဖေဖော်ဝါရီ ၂၀၂၁)

1. ဦးသိန်းစိုး (ဥက္ကဋ္ဌ)
2. ဦးသောင်းတင် (အဖွဲ့ဝင်)^{[မှတ်စု ၁] [၁၂]}
3. ဦးသန်းထွန်း (အဖွဲ့ဝင်)
4. ဦးကျောက် (အဖွဲ့ဝင်)
5. ဦးအောင်စောဝင်း (အဖွဲ့ဝင်)
6. ဦးသန်းဝင်း (အဖွဲ့ဝင်)^[၁၃]

နောက်ဆက်တွဲ ပြောင်းလဲမှုများနှင့် ခန့်အပ်မှုများ

ကနဦးဖွဲ့စည်းပြီးနောက်ပိုင်းတွင် ပြည်ထောင်စုရွေးကောက်ပွဲကော်မရှင်၏ အဖွဲ့ဝင်များ အပြောင်းအလဲများ ဆက်တိုက် ဖြစ်ပေါ်ခဲ့သည်-

• ၂၀၂၁ ခုနှစ် ဖေဖော်ဝါရီ ၉ ရက်: ဦးစောဘလှိုင်နှင့် ဦးစိုးဦးတို့အား အဖွဲ့ဝင်များအဖြစ် ခန့်အပ်ခဲ့သည်။^[၁၄]
• ၂၀၂၁ ခုနှစ် ဖေဖော်ဝါရီ ၂၃ ရက်: ဦးသောင်းတင်အား ဦးအောင်မိုးမြင့်ဖြင့်လည်းကောင်း၊ ဦးကျောက်အား ဦးအောင်လွင်ဦးဖြင့်လည်းကောင်း အစားထိုးခန့်အပ်ခဲ့သည်။^[၁၅]
• ၂၀၂၁ ခုနှစ် ဖေဖော်ဝါရီ ၂၆ ရက်: ဦးသန်းစိုး၊ ဦးဘရန်ရှောင်၊ ဦးမြင့်ဦး၊ ဦးခင်မောင်ဦး၊ ဒေါ်နုမြစံ၊ ဦးမြင့်သိန်းနှင့် ဒေါက်တာဘမောင်တို့အား ထပ်မံ၍ ကော်မရှင်အဖွဲ့ဝင်များအဖြစ် ခန့်အပ်ခဲ့သည်။
• ၂၀၂၂ ခုနှစ် ဖေဖော်ဝါရီ ၃ ရက်: ဦးတင်မောင်ဆွေအား အဖွဲ့ဝင်အဖြစ် ခန့်အပ်ခဲ့သည်။^[၁၆]
• ၂၀၂၂ ခုနှစ် ဧပြီ ၁ ရက်: ဦးကိုကိုလွင်အား အဖွဲ့ဝင်အဖြစ် ခန့်အပ်ခဲ့သည်။^[၁၇]
• ၂၀၂၂ ခုနှစ် မေ ၂ ရက်: သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဒုတိယဝန်ကြီးအဖြစ် တာဝန်ထမ်းဆောင်နေသော ဦးမင်းမင်းဦးအား ကော်မရှင်အဖွဲ့ဝင်အဖြစ် ပြောင်းရွှေ့ခန့်အပ်ခဲ့သည်။
• ၂၀၂၂ ခုနှစ် ဩဂုတ် ၁၀ ရက်: ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဒုတိယဝန်ကြီး ဦးသန်းအောင်ကျော်အား ကော်မရှင်အဖွဲ့ဝင်အဖြစ် ပြောင်းရွှေ့ခန့်အပ်ခဲ့သည်။^[၁၈]
• ၂၀၂၃ ခုနှစ် ဖေဖော်ဝါရီ ၁ ရက်: ဦးစောဘလှိုင်၊ ဒေါက်တာဘမောင်နှင့် ဦးမင်းမင်းဦးတို့အား တာဝန်မှ အနားယူခွင့်ပေးခဲ့သည်။ ^[၁၉]ထို့ပြင်၊ ကော်မရှင်အဖွဲ့ဝင် ဦးသန်းဝင်းအား ပြည်ထောင်စုရာထူးဝန်အဖွဲ့သို့ ပြောင်းရွှေ့ခဲ့သည်။^[၂၀]
• ၂၀၂၃ ခုနှစ် ဖေဖော်ဝါရီ ၂ ရက်: ကော်မရှင်အဖွဲ့ဝင် ဒေါ်နုမြစံအား သာသနာရေးနှင့် ယဉ်ကျေးမှုဝန်ကြီးဌာန ဒုတိယဝန်ကြီးအဖြစ် ပြောင်းရွှေ့ခဲ့သည်။^[၂၁]
• ၂၀၂၃ ခုနှစ် စက်တင်ဘာ ၂၅ ရက်: အဖွဲ့ဝင် ဦးဘရန်ရှောင်အား အနားပေးကာ ဦးခင်ဇော်အား အဖွဲ့ဝင်အသစ်အဖြစ် ခန့်အပ်ခဲ့သည်။^{[၂၂][၂၃]}
• ၂၀၂၄ ခုနှစ် ဇန်နဝါရီ ၃၁ ရက်: ကော်မရှင်ဥက္ကဋ္ဌအား အသစ်လဲလှယ်ခြင်းနှင့် ကော်မရှင်အဖွဲ့ဝင်အသစ်များ ခန့်အပ်ခြင်းများ ဆောင်ရွက်ခဲ့သည်။

လက်ရှိ ပြည်ထောင်စုရွေးကောက်ပွဲကော်မရှင်အဖွဲ့ဝင်များ

ကော်မရှင်အဖွဲ့ဝင်များ

စဥ်	အမည်		တာဝန်ထမ်းဆောင်သည့်ကာလ	ရက်ပေါင်း
၁။	ဦးကိုကို	ဥက္ကဋ္ဌ	၃၁ ဇန်နဝါရီ ၂၀၂၄ - လက်ရှိ	၁ နှစ်၊ ၁၄၁ ရက်
၂။	ဦးအောင်မိုးမြင့်	အဖွဲ့ဝင်
၃။	ဦးသန်းထွန်း
၄။	ဦးအောင်လွင်ဦး
၅။	ဦးအောင်စောဝင်း
၆။	ဦးစိုးဦး
၇။	ဦးတင်မောင်ဆွေ
၈။	ဦးကိုကိုလွင်
၉။	ဦးသန်းအောင်ကျော်
၁၀။	ဦးခင်မောင်ဦး [၂၄]
၁၁။	ဦးသန်းစိုး
၁၂။	ဦးခင်ဇော်
၁၃။	ဦးမြင့်ဦး
၁၄။	ဦးမြင့်သိန်း
၁၅။	ဦးမျိုးလှိုင်[၂၅]		၃၁ ဇန်နဝါရီ ၂၀၂၄ - လက်ရှိ	၁ နှစ်၊ ၁၄၁ ရက်

၂၀၁၆ အဖွဲ့ဝင်များ

၂၀၁၆ မတ်လ ၃၀ ရက်နေ့တွင် နိုင်ငံတော်သမ္မတက ခန့်အပ်ခဲ့သည့် ပြည်ထောင်စု ရွေးကောက်ပွဲကော်မရှင် အဖွဲ့ဝင်များမှာ ^[၂၆]

1. ဦးလှသိန်း (ဥက္ကဋ္ဌ)
2. ဦးအောင်မြင့် (အဖွဲ့ဝင်)
3. ဦးစိုးရယ် (အဖွဲ့ဝင်)
4. ဦးထွန်းခင် (အဖွဲ့ဝင်)
5. ဦးလှတင့် (အဖွဲ့ဝင်)
6. ဦးမြင့်နိုင် (အဖွဲ့ဝင်)
7. ဦးသန်းဌေး (အဖွဲ့ဝင်)
8. ဦးညွန့်စိန် (အဖွဲ့ဝင်)
9. ဦးသက်ထွန်း (အဖွဲ့ဝင်)
10. ဦးမြင့်အောင့် (အဖွဲ့ဝင်)
11. ဦးစောဒယ်နီရယ်ကြည် (အဖွဲ့ဝင်)
12. ဦးအောင်စိုးဝင်း (အဖွဲ့ဝင်)
13. ဦးသန်းအောင် (အဖွဲ့ဝင်)
14. ဦးမင်းဆွေ (အဖွဲ့ဝင်)
15. ဦးဆွေတင့်လွင် (အဖွဲ့ဝင်)

၂၀၁၁ အဖွဲ့ဝင်များ

၂၀၁၁ မတ်လ ၃၀ရက်နေ့တွင် နိုင်ငံတော်သမ္မတက ခန့်အပ်ခဲ့သည့် ပြည်ထောင်စုရွေးကောက်ပွဲကော်မရှင်အဖွဲ့ဝင်များမှာ -

1. ဦးတင်အေး (အဖွဲ့ဝင်)
2. ဦးမြင့်နိုင် (အဖွဲ့ဝင်)
3. ဦးအောင်မြင့် (အဖွဲ့ဝင်)
4. ဦးသာဦး (အဖွဲ့ဝင်)
5. ဒေါက်တာ ဒေါ်မြင့်ကြည် (အဖွဲ့ဝင်)
6. ဦးဝင်းကြည် (အဖွဲ့ဝင်)
7. ဦးညွှန့်တင် (အဖွဲ့ဝင်)
8. ဦးဝင်းကို (အတွင်းရေးမှူး)

၂၀၁၀ အဖွဲ့ဝင်များ

ကော်မရှင်၏ အဖွဲ့ဝင် ၁၈ ဦးကို ၂၀၁၀ ခုနှစ် မတ်လ ၁၁ ရက်နေ့တွင် ခန့်အပ်တာဝန်ပေးခဲ့သည်။^[၄]၂၀၁၀ ခုနှစ် မတ်လ ၀၈ ရက်နေ့တွင် နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီ မှ ခန့်အပ်တာဝန်ပေးထားသည့် ပြည်ထောင်စု ရွေးကောက်ပွဲ ကော်မရှင် အဖွဲ့ဝင်များမှာ - ^{[၃][၂၇]}

1. ဦးသိန်းစိုး (ဥက္ကဋ္ဌ)
2. ဦးအင်ဇော်နော် (အဖွဲ့ဝင်)
3. ဦးခင်မောင်နု (အဖွဲ့ဝင်)
4. ဦးစောဘလှိုင် (အဖွဲ့ဝင်)
5. ဒေါက်တာဘမောင် (အဖွဲ့ဝင်)
6. ဦးညွန့်တင် (အဖွဲ့ဝင်)
7. ဦးမောင်သာလှ (အဖွဲ့ဝင်)
8. ဒေါက်တာစိုင်းခမ်းလှိုင် (အဖွဲ့ဝင်)
9. ဦးအောင်မြင့် (အဖွဲ့ဝင်)
10. ဦးမြင့်နိုင် (အဖွဲ့ဝင်)
11. ဒေါက်တာတင်အောင်အေး (အဖွဲ့ဝင်)
12. ဒေါ်ခင်လှမြင့် (အဖွဲ့ဝင်)
13. ဒေါက်တာဒေါ်မြင့်ကြည် (အဖွဲ့ဝင်)
14. ဦးသာဦး (အဖွဲ့ဝင်)
15. ဒေါက်တာမောင်ထူး (အဖွဲ့ဝင်)
16. ဦးသာဌေး (အဖွဲ့ဝင်)
17. ဦးဝင်းကြည်
18. ဦးဝင်းကို (အတွင်းရေးမှူး) ^[၂၈]

မှတ်စု

1. ဦးသောင်းတင်မှ ပြည်ထောင်စုရွေးကောက်ပွဲ ကော်မရှင်အဖွဲ့သစ်တွင် ပါဝင်ရန် ငြင်းဆန်ခဲ့သည်။၂၀၂၁ ဖေဖော်ဝါရီ ၂၃ရက်တွင် ၎င်းအစား ဦးအောင်မိုးမြင့်နှင့် အစားထိုးခန့်အပ်ကြောင်း စစ်ကောင်စီက စာထုတ်ပြန်သည်။^[၁၁]