ရခိုင်အမျိုးသားပါတီ

ရခိုင်အမျိုးသားပါတီ (အင်္ဂလိပ်: Rakhine National Party; သို့မဟုတ် Arakan National Party) သည် ၂၀၁၄ ခုနှစ်တွင် ရခိုင်ပါတီနှစ်ခု ပူးပေါင်းပြီး ပေါ်ပေါက်လာသော ရခိုင်ပြည်နယ်အခြေပြု နိုင်ငံရေးပါတီ တစ်ခုဖြစ်ပြီး ရခိုင်ပြည်နယ်နှင့် ရန်ကုန်တိုင်းဒေသကြီးရှိ ရခိုင်လူမျိုးများ ကိုယ်စားပြု ပါတီဖြစ်သည်။

ရခိုင်အမျိုးသားပါတီ
အင်္ဂလိပ် အမည်	Arakan National Party(ANP)
ဥက္ကဋ္ဌ	ဦးသာထွန်းလှ
တည်ထောင်ခြင်း	၆ မတ် ၂၀၁၄; ၁၁ နှစ် အကြာက (၂၀၁၄-၀၃-06)
ဌာနချုပ်	စစ်တွေမြို့၊ ရခိုင်ပြည်နယ်၊ မြန်မာနိုင်ငံ
နိုင်ငံရေး သဘောတရား	ရခိုင်လူမျိုး အခွင့်အရေး နှင့် ကွန်ဆာဗေးတစ် ဝါဒ
အမျိုးသားလွှတ်တော် အမတ်နေရာ	၁၀ / ၂၂၄
ပြည်သူ့လွှတ်တော် အမတ်နေရာ	၁၃ / ၄၄၀
ရခိုင်ပြည်နယ် လွှတ်တော် အမတ်နေရာ	၂၂ / ၄၇
တိုင်းရင်းသားရေးရာဝန်ကြီးများ	၁ / ၂၉
မြန်မာနိုင်ငံ၏ နိုင်ငံရေး နိုင်ငံရေးပါတီများ

ပါတီ၏ နိုင်ငံရေး သဘောတရားမှာ ရခိုင်လူမျိုး အခွင့်အရေး နှင့် ကွန်ဆာဗေးတစ် ဝါဒ ဖြစ်သည်။ ပါတီ၏ နိုင်ငံရေးရပ်တည်ချက်မှာ လက်ယာ ဖြစ်သည်။^{[၁] [၂]}

ပါတီကို ၂၀၁၄ ခုနှစ် ဇန်နဝါရီလ ၁၃ ရက်နေ့တွင် တည်ထောင်ခဲ့ပြီး ၂၀၁၄ ခုနှစ် မတ်လ ၆ ရက်နေ့တွင် ပြည်ထောင်စု ရွေးကောက်ပွဲ ကော်မရှင် ထံတွင် မှတ်ပုံတင်ခဲ့သည်။^{[၃][၄][၅]} ၂၀၁၆ ခုနှစ် မတ်လ ၂၈ ရက်နေ့တွင် အမျိုးသားဒီမိုကရေစီအဖွဲ့ချုပ်က ရခိုင်ပြည်နယ် ဝန်ကြီးချုပ်အဖြစ် ဂွမြို့နယ် မဲဆန္ဒနယ် (၂) မှ ရွေးကောက်ခံ ပြည်နယ်အမတ် ဦးညီပုကို ရခိုင်ပြည်နယ် လွှတ်တော်တွင် အဆိုပြုတင်သွင်းလိုက်သည့်အတွက် လွှတ်တော်ဥက္ကဋ္ဌနှင့် ဒုဥက္ကဋ္ဌမှလွဲ၍ ကျန်ရခိုင်အမျိုးသားပါတီမှ လွှတ်တော်အမတ်အားလုံး လွှတ်တော်ကို သပိတ်မှောက်ကာ လွှတ်တော် မပြီးခင် ထွက်ခွာသွားခဲ့ကြသည်။^[၆]

သမိုင်းကြောင်း

၂၀၁၃ ခုနှစ် ဇွန်လ ၁၇ ရက်နေ့တွင် ရခိုင်တိုင်းရင်းသားများ တိုးတက်ရေး ပါတီ နှင့် ရခိုင်ဒီမိုကရေစီ အဖွဲ့ချုပ် တို့သည် ရခိုင်အမျိုးသားပါတီ အမည်ဖြင့် သဘောတူညီချက်ကို လက်မှတ်ရေးထိုးခဲ့ကြသည်။^[၇] ၂၀၁၃ မေလမှ စတင်ခဲ့သည့် ပါတီနှစ်ခု ပေါင်းစည်းရေးသည် ရှစ်လကျော်ကြာမြင့်ခဲ့ပြီး နှစ်ဦးနှစ်ဖက် ဆွေးနွေးမှုများ ပြုလုပ်ခဲ့ကြသည်။^{[၅][၈][၉][၁၀][၁၁]}

ပါတီမှတ်ပုံတင်ခြင်း

၂၀၂၄

၂၀၂၄ ခုနှစ်၊ ဇူလိုင်လ ၁ ရက်နေ့တွင် ပြည်ထောင်စုရွေးကောက်ပွဲကော်မရှင်က ရခိုင်အမျိုးသားပါတီ (ANP) ၏ ပါတီဆက်လက်တည်ထောင်မှတ်ပုံတင်ခွင့် လျှောက်ထားချက်ကို နိုင်ငံရေးပါတီများ မှတ်ပုံတင်ခြင်းဥပဒေပုဒ်မ ၇ ပါ ပြဋ္ဌာန်းချက်များနှင့် မညီညွတ်ကြောင်း တွေ့ရှိရသဖြင့် ငြင်းပယ်လိုက်ကြောင်း ထုတ်ပြန်ကြေညာခဲ့ပါသည်။ ^[၁၂]

ပယ်ချရခြင်းအကြောင်းရင်း အသေးစိတ်ကို တရားဝင် ဖော်ပြထားခြင်းမရှိသော်လည်း၊ ANP ဘက်မှ ဦးခိုင်ပြည်စိုးကမူ ၎င်းတို့ပါတီသည် လက်နက်ကိုင်အဖွဲ့များနှင့် ကင်းရှင်းပြီး မှတ်ပုံတင်လျှောက်ထားသူ ၂၅ ဦးလုံး ပုဒ်မ ၇ နှင့် ငြိစွန်းမှုမရှိကြောင်း ပြောကြားခဲ့သည်။ ^[၁၃]

သို့သော်လည်း ANP ကို မှတ်ပုံတင်ခွင့်မှ ပယ်ချထားသော်လည်း တရားဝင် ဖျက်သိမ်းကြောင်း ကြေညာခြင်းမရှိသေးသည့်အတွက် ANP မှာ ဆက်လက်တည်ရှိနေဆဲဖြစ်ကြောင်း ပါတီ၏ နိုင်ငံရေးမူဝါဒ ဦးဆောင်ကော်မတီအဖွဲ့ဝင် ဦးထွန်းအောင်ကျော်က အတည်ပြု ပြောကြားခဲ့သည်။^[၁၄]

ဆက်စပ်ဖတ်ရှုရန်

• ရခိုင့်ဦးဆောင်ပါတီ