Bjørn Einar Romøren

Bjørn Einar Romøren (fødd 1. april 1981) er ein norsk skihoppar som representerer Hosle Idrettslag. Mellom 2003 og 2011 vann han to VM-gull, to VM-sølv, tre VM-bronsar og ein OL-bronse med norske hopplag i ulike verdsmeisterskap på ski og i skiflyging, og olympiske leikar. Individuelt har han to gongar vorte nummer fire i internasjonale meisterskap, begge gongane i Oberstdorf. I ski-VM 2005 var han eitt poeng bak bronsemedaljevinnaren i normalbakken, tre år seinare var han litt lenger unna bronsemedaljen i VM i skiflyging. Hans beste plassering samanlagd i verdscupen oppnådde han då han vart nummer tre i 2004-sesongen, men han var langt bak Janne Ahonen frå Finland og landsmannen Roar Ljøkelsøy. Romøren, som er norsk meister i skihopping fire gongar og i alt har ti NM-medaljar (4-4-2), er kanskje mest kjend for verdsrekorden på 239 meter som han sette i Planica i 2005.

Bjørn Einar Romøren
Statsborgarskap	Noreg
Fødd	1. april 1981 (44 år) Oslo
Idrett	skihopping
Tok del i	Vinter-OL 2010, Skihopping under Vinter-OL 2006 – Laghopp

Bjørn Einar Romøren i 2010.

Karriere

Romøren slo gjennom nasjonalt då han i 2001 vart noregsmeister i storbakken. Han fekk sitt internasjonale gjennombrot då han på nyåret i 2003 sigra i hoppvekerennet i Bischofshofen. Seinare i same sesongen fekk han plass på Noregs hopplag til ski-VM i Val di Fiemme, der det vart bronsemedaljar på dei utvalde norske hopparane. I 2004-sesongen stod han på sigerspallen sju gongar i verdscupen, to av dei som sigerherre. Han var med på Noregs firemannslag som vart verdsmeistrar i VM i skiflyging. Sigurd Pettersen, Tommy Ingebrigtsen og Roar Ljøkelsøy var dei andre på meisterlaget.

Vinteren 2005 vann Romøren ein ny bronsemedalje i laghopping under ski-VM i Oberstdorf, der han også vart nummer fire i normalbakken, eitt poeng bak bronsevinnaren Janne Ahonen. 20. mars 2005 nådde Romøren eit høgdepunkt då han sette ny verdsrekord i skiflyging med 239 meter i Planica i Slovenia og vann sin einaste verdscupsiger for sesongen.

I OL-sesongen 2006 kom Romøren i form på nyåret, og fekk fire individuelle pallplasseringar gjennom sesongen. To gongar steig han til topps; i januar månad i Sapporo og i mars i skiflygingsbakken i Planica. Høgdepunktet for sesongen var likevel lagtriumfen for Noreg i VM i skiflyging, saman med Lars Bystøl, Tommy Ingebrigtsen og Roar Ljøkelsøy. Under dei olympiske leikane i Torino fekk han ein bronsemedalje i laghoppinga og vart nummer sju i storbakkerennet. Han vart dobbel noregsmeister då han vann NM-renna i både Heddal og Oslo.

Etter ein svak 2007-sesong, hevda Romøren seg betre i delar av 2008-sesongen. Han hoppa jamnt med verdseliten i dei fyrste renna, men var så ute av form til februar månad. Hans einaste siger i verdscupen kom i Willingen, ei veke før VM i skiflyging i Oberstdorf. Romøren kom på fjerdeplass i den individuelle tevlinga i verdsmeisterskapen, og fekk ein bronsemedalje i lagkonkurransen. 2009-sesongen var rimeleg svart for Romøren, i verdscuprenn vart han som best nummer 15. I OL-sesongen året etter fekk han ein del gode resultat, men som vanleg varierte han i prestasjonane. Opningshelga i verdscupen vann han eine tevlinga i Kuusamo, og han tok ein andreplass i Engelberg straks føre jul. Fleire pallplassar oppnådde han ikkje, og vart nummer 23 i normalbakken under vinterleikane i Vancouver. Sesongen vart derimot avslutta med lagsølv i VM i skiflyging i favorittbakken i Planica.

Romøren vart nummer fem i eit verdscuprenn i Zakopane, hans høgste individuelle plassering i 2011-sesongen. Han fekk likevel plass på det norske laget til lagtevlinga i normalbakken under ski-VM 2011 i Oslo, der laget erobra ein sølvmedalje. Også i 2012-sesongen kom Romøren til kort mot dei aller beste skihopparane i verda. Ein sjuandeplass i Val di Fiemme var hans beste prestasjon i verdscupen.

Han vart operert for ein skade hausten 2012, og deltok ikkje i hoppsesongen 2013.

Besteplasseringar i internasjonale meisterskap

• Ski-VM 2001 i Lahti: Nr 16 i storbakken
• Ski-VM 2003 i Val di Fiemme: Bronsemedalje i laghopp, nr 10 i normalbakken
• VM i skiflyging 2004 i Planica: Gullmedalje i laghopp, nr seks individuelt
• Ski-VM 2005 i Oberstdorf: Nr fire i normalbakken - bronsemedalje i laghopp i storbakken
• VM i skiflyging 2006 i Kulm: Gullmedalje i laghopp, nr ti individuelt
• Vinter-OL 2006 i Torino: Bronsemedalje i laghopp, nr sju i storbakken
• VM i skiflyging 2008 i Oberstdorf: Nr fire - bronsemedalje i laghopp
• VM i skiflyging 2010 i Planica: Sølvmedalje i laghopp, nr ni individuelt
• 2011: Ski-VM 2011 i Oslo: Sølvmedalje i laghopping i normalbakken
• VM i skiflyging 2012 i Vikersund: Nr fire i laghopp, nr 29 individuelt

Besteplasseringar i internasjonale renn

• 2001: Nr 31 to gonger
• 2002: Nr 35 i Lahti
• 2003: Siger i Bischofshofen, ein tredjeplass
• 2004: To sigrar;# Lahti 7. mars, # Kuopio 10. mars, to andreplassar og tre tredjeplassar
• 2005: Vinnar i Planica 20. mars 2005, ein andreplass, og ein tredjeplass
• 2006: To sigrar;# Sapporo 21. januar, # Planica 18. mars, ein andreplass og ein tredjeplass
• 2007: Nr 5 i Garmisch-Partenkirchen
• 2008: Siger i Willingen, to tredjeplassar
• 2009: Nr 15 i Klingenthal
• 2009/10: Vinnar av opningsrennet i Kuusamo, andreplass i Engelberg
• 2011: Nr 5 i Zakopane
• 2012: Nr 7 i Val di Fiemme

Medaljar og besteplasseringar i noregsmeisterskap

• Ski-NM 1999: Nr 4 i storbakken på Rena
• Ski-NM 2000: Nr 10 i storbakken i Meldal
• Ski-NM 2001: Gullmedalje i storbakken i Trondheim
• Ski-NM 2002: Bronsemedalje i storbakken på Odnes
• Ski-NM 2003: Nr 4 i storbakken på Lillehammer
• Ski-NM 2004: Sølvmedalje i normalbakken på Bardufoss
• Ski-NM 2005: Sølvmedalje i normalbakken på Lillehammer
• Ski-NM 2006: Gullmedalje både i normalbakken i Heddal og i storbakken i Oslo
• Ski-NM 2007: Nr 8 i storbakken på Lillehammer
• Ski-NM 2008: Bronsemedalje i normalbakken i Trondheim
• Ski-NM 2010: Gullmedalje i normalbakken i Vikersund, sølvmedalje i storbakken i Trondheim
• Ski-NM 2011: Nr 7 i storbakken i Oslo
• Ski-NM 2012: Sølvmedalje i storbakken i Trondheim

Kjelder

• Sportsboken, aktuelle årgangar

Bakgrunnsstoff

• Bjørn Einar Romøren i fis-ski.com
• Bjørn Einar Romøren i olympedia.org