Delfiakake

Delfiakake er ei konfektkake som er laga med kokosfeitt (den opphavlege oppskrifta er med delfiafett, derav namnet) og kokesjokolade som hovudingrediensar. Det spesielle med delfiakake er at ho ikkje treng å steikast i omn. Kaka må berre stå kjølig så ho stivnar. Ein lagar henne særleg til jul.^[1]

Stykke med dansk kiksekage.

Delfiakake består av lag av sjokolade, som på grunn av kokosfeittet får ein fast, men tyggevennleg konsistens, og mellom desse laga marsipan og søt kjeks, gjerne Per kjeks.^[2] Ho vert gjerne pynta med geletoppar. Ein annan måte å lage kaka på er å blande all sjokolade- og kokosfeittmassen med alt ein vil bruke til fyll, det vere seg Per kjeks, marsipan, nøtter, tørka aprikosar, rosinar eller anna.