Den indiske hæren

Den indiske hæren (hindi भारतीय थलसेना, Bhāratīya Thalsēnā) er den landbaserte og den største greina i det indiske forsvaret. Han er ein av dei største ståande hærane i verda, med over 1,1 millionar aktive soldatar og 960 000 reservestyrkar. Over 80 % av dei aktive forsvarsstyrkane i India høyrer til hæren. Som resten av det indiske forsvaret er rekruttering bygd på frivillig verving.

Soldatar frå 99th Mountain Brigade's 2nd Battalion, 5 Gorkha Rifles, under øvinga Yudh Abhyas i 2013.

Indiske stridsvogner under øvinga Yudh Abhyas i 2009.

Hæren er sett saman av fleire regiment, men er delt inn i sju forband (Commands) med ulike geografiske basar og operasjonsområde. Den øvste leiaren (de jure) er presidenten i India, men hæren blir de facto styrt av den indiske forsvarsministeren og kommandert av hærstabssjefen, som er ein firestjerners general.

Hæren har bakgrunn i militærstyrkane som kjempa for Det britiske austindiakompaniet og seinare hæren til Britisk India. Mange av regimenta har derfor teke del i slag og felttog også før India fekk sjølvstende. Etter sjølvstendet har hæren vore involvert i fire krigar mot nabolandet Pakistan og ein mot Kina. Andre større operasjonar har vore Operation Vijay, Operation Meghdoot og Operation Cactus. Hæren har også vore fredsbevarande styrke for SN fleire gonger, mellom anna i Angola, El Salvador, Kambodsja, Kongo, Kypros, Korea, Libanon, Liberia, Mosambik, Namibia, Somalia og Vietnam.

Forband

Logo	Namn	Hovudkvarter
	Headquarters, Indian Army	New Delhi
	Central Command	Lucknow i Uttar Pradesh
	Eastern Command	Kolkata i Vest-Bengal
	Northern Command	Udhampur i Jammu og Kashmir
	Southern Command	Pune i Maharashtra
	South Western Command	Jaipur i Rajasthan
	Western Command	Chandimandir i Haryana
	Training Command	Shimla i Himachal Pradesh

Regiment

Soldatar frå Rajput Regiment

Soldatar frå Sikh Light Infantry

Soldatar frå Madras Regiment

Oppbygginga av Den indiske hæren byggjer på den britiske. Han består av regiment som er ansvarlege for å danna bataljonar til ulike operasjonar. Kvart regiment har ein eigen identitet og lojalitet, og soldatar blir som regel heile karrieren sin i eitt regiment.

Infanteri-regiment rekrutterer soldatar ut frå visse kriterium som regional, etnisk eller religiøs tilhøyrsel, ei anna arv frå den britisk-indiske hæren. Det er blitt gjort ulike framlegg om å danna regiment utan slike band, men desse har hatt lite suksess. Hæren har 31 infanteriregiment:

Infanteriregiment etter alder:^[1]

Brigade of the Guards Parachute Regiment Mechanised Infantry Regiment Punjab Regiment The Madras Regiment The Grenadiers Maratha Light Infantry Rajputana Rifles Rajput Regiment Jat Regiment Sikh Regiment Sikh Light Infantry

Dogra Regiment The Garhwal Rifles Kumaon Regiment Assam Regiment Bihar Regiment Mahar Regiment Jammu & Kashmir Rifles Jammu & Kashmir Light Infantry Naga Regiment

1 Gorkha Rifles (The Malaun Regiment) 3 Gorkha Rifles 4 Gorkha Rifles 5 Gorkha Rifles (Frontier Force) 8 Gorkha Rifles 9 Gorkha Rifles 11 Gorkha Rifles Ladakh Scouts Rashtriya Rifles Arunachal Scouts Sikkim Scouts

Andre regiment:

• Regiment of Artillery (artilleri)
• 63 kavaleri/stridsvognavdelingar, mellom anna President's Bodyguard, 1st Horse/Skinner's Horse, 2nd Lancers/Gardner's Horse, 3rd Cavalry osb.