Finistère er eit av dei 83 opphavlege departementa som vart oppretta 4. mars 1790 under den franske revolusjonen. Det vart danna frå delar av den tidlegare provinsen Bretagne.

Namnet Finistère kjem frå det latinske Finis Terræ, som tyder «verdas ende». Dette må ikkje forvekslast med Kapp Finisterre i Spania.

Departementet er i dag ein del av regionen Bretagne og grensar til departementa Morbihan og Côtes-d'Armor, i tillegg til Atlanterhavet i nord, sør og vest.

Finistère er det vestlegaste departementet i den europeiske delen av Frankrike, og det vestlegaste punktet er Pointe de Corsen.

Den største byen i Finistère er Brest. Andre store byar er Quimper, Morlaix, Carhaix og Douarnenez. Finistère inkluderer òg øya Ouessant.

Aber er fjordlikande viker på nordkysten og er eit karakteristisk trekk i landskapet.

Innbyggjarane i departementet vert på fransk kalla Finistériens.

Jordbruk, næringsmiddelindustri og forskjellige andre tilknytte industriar er dei viktigaste næringane i Finistère.

Mange av innbyggjarane i departementet er tilknytte militæret. Her ligg atomubåtbasen Ile Longue og flybasen i Lanvéoc-Poulmic, i tillegg til militærrelatert industri i Brest.

Roscoff har ferjesamband til Irland og Storbritannia.

Finistère er det området i Frankrike der bretonsk språk står sterkast. Bretonske skular vert kalla Diwan, Divyezh og Dihun.

Wikimedia Commons har multimedia som gjeld: Finistère

• Prefekturet i Finistère
• Conseil général i Finistère
• Turistinformasjon om Finistère