Iselin

Iselin og Iselinn er namn med fleire moglege opphav. Det er kjend som eit norsk kvinnenamn, og eit tysk og sveitsisk slektsnamn.

Politikaren Iselin Nybø.

Kvinnenamnet kan vera eit tysk namn avleidd av Isa, som kan vera kjælenamn for namn som Isabel eller Iseline. Namneleddet Ise- kjem frå det gammalhøgtyske isan, 'jern'. Namnet kan også vera ein norsk utgåve av det irske Aisling.

Det tyske og tysk-sveitsiske slektsnamnet er ein variant av namnet Eisele.^[1]

Namnet Iselin i Noreg

Iselin har norsk namnedag den 19. desember.

Namnet er kjend frå romanen Pan av Knut Hamsun frå 1894. Det kom i bruk i Noreg rundt 1940. Bruken tok til å veksa ved midten av 1970-talet, og nådde ein topp på siste halvdel av 1980-talet, då over 0,4 % av nyfødde jenter blei kalla Iselin. Det var 2 562 kvinner som heitte Iselin i Noreg i 2008, og 82 som heitte Iselinn.

Kjende namneberarar

• Iselin Bast eller Tove von Hanno (f. 1950), norsk kunstnar
• Iselin Alme (f. 1957), norsk songar og skodespelar
• Iselin B. Alvestad (f. 1978), norsk forfattar
• Iselin Engan (f. 1978), norsk formgjevar
• Iselin Nybø (f. 1981), norsk politikar
• Iselin Steiro (f. 1985), norsk modell
• Iselin Solheim (f. 1990), norsk songar-låtskrivar
• Iselin Michelsen (f. 1990), norsk modell og songar