Partiet Konservativt

Konservativt, tidlegare Partiet Dei Kristne, er eit høgrepopulistisk norsk politisk mikroparti^[3][4] som vart stifta i 2011 på Bømlo i Hordaland. Konservativt byggjer på eit kristenkonservativt verdigrunnlag.

«Dei Kristne» omdirigerer hit. For folk som vedkjenner seg kristendommen, sjå kristne.

Konservativt
Land	Noreg
Partileiar(ar)	Erik Selle
Grunnlagt	24. februar 2011
Hovudkvarter	Oslo
Donasjonar	643 400 norsk krone (2021)[1]
Medlemstal	2 476 (2023)[2]
Ideologi	kristne høgre, marknadsliberalisme, euroskeptisisme, høgrepopulisme, verdikonservatisme
Politisk posisjon	høgresida
Slagord	«Frihet og trygghet for alle»

Den tidlegare logoen til partiet.

Namn

Opphavleg heitte partiet Dei Kristne. I 2015 endra det namn til Partiet Dei Kristne.^[5] I 2022 endra det namnet att til Konservativt.^[6]

Historie

Partiet vart stifta som ein reaksjon på at Kristeleg Folkeparti, ifølgje initiativtakarane, hadde gradvis fjerna seg frå dei tradisjonelle kristne verdiane. Den utløysande faktoren var at sentrale krefter i KrF ønskte å fjerne «bekjennelsesparagrafen» for tillitsvalde.

Partiet ville løfte fram det livslange, monogame ekteskapet mellom éin mann og éi kvinne som norm og ideal.^[7] Partiet gav heilhjarta støtte til staten Israel. Retten til liv frå fræving til naturleg død er også ein av hjartesakene til partiet.

Partileiar frå 2013 er Erik Selle. Partiet fekk i 2015 eigen ungdomsorganisasjon, Dei Kristnes Ungdom. Leiaren er Olympia Ahenkorah frå Oslo.

Ved stortingsvalet i 2013 røysta omkring 17 700 veljarar på partiet (0,6 prosent). Størst var oppslutnaden i Vest-Agder (2,0 prosent). Ved kommunestyrevalet i 2015 stilte partiet liste i 70 kommunar. Ved stortingsvalet i 2017 stilte partiet liste i alle fylka og fekk omkring 8700 røyster (0,3 prosent).^[5]

I samband med den russiske invasjonen av Ukraina 24. februar 2022 har partiet vorte kritisert for å formidla russisk propaganda.^[8][kven?] Partileiar Erik Selle har teke til orde for at Russland skal få behalda dei ulovleg annekterte ukrainske regionane Krim, Donetsk og Luhansk.^[9] I eit intervju med iNyheter.no 12. januar 2024 stadfesta Selle at han meiner Vesten har ein stor del av ansvaret for at Russland angreip Ukraina.^[10]