Raiven

Sara Briški Cirman (fødd 26. april 1996 i Ljubljana), kjend under artistnamnet Raiven, er ein slovensk songar, låtskrivar og harpespelar. Ho gjorde seg merka i heimlandet i 2016, då ho blei nummer to i EMA, den slovenske uttakinga til Eurovision Song Contest. Ho deltok sidan i EMA 2017, der ho blei nummer tre, og i EMA 2019 der ho fekk ein andreplass. Ho representerte Slovenia i Eurovision Song Contest 2024 med songen «Veronika».

Raiven
Fødd	26. april 1996 (29 år)
Fødestad	Ljubljana
Opphav	Slovenia
Aktiv	2014–
Sjanger	pop
Instrument	harpe, vokal
Verka som	musikar, harpist, songar

Bakgrunn

Raiven under EMA 2017.

Raiven vaks opp i den slovenske hovudstaden Ljubljana. Ho byrja med musikk som fireåring og starta seinare ved Ljubljana Music Matica.^[1] Frå 2002 til 2011 tok ho harpetimar ved musikkskulen i Ljubljana. Elektropop-debuten kom i 2014, og to år seinare deltok ho i EMA – det slovenske svaret på Melodi Grand Prix. Der blei ho nummer to med låten «Črno bel». Ho deltok sidan i EMA 2017 med «Zažarim» og deretter med låten «Kaos» i 2019.^[2]

I 2021 vann Raiven den slovenske musikkfestivalen Popevka med sin eigenskrivne låt «Volkovi».^[3] Innimellom har ho drive med opera og teater, og etter å ha fullført ein mastergrad ved Ljubljana musikkakademi, byrja hun for å jobbe innan sjangaren elektroopera. Ho lanserte i 2022 eit eige elektroopera-prosjekt som kombinerer klassisk opera med elektropop.

I desember 2023 kunngjorde den slovenske ålmennkringkastaren RTVSLO at Raiven skulle representere Slovenia i Eurovision Song Contest 2024 i Malmö. Ho deltok med låten «Veronika».^[4][5] Ho kvalifiserte seg til finalen av Eurovision Song Contest og enda til slutt på 23. plass.^[6][7]