landado sincronisa di Aruba From Wikipedia, the free encyclopedia
Nicole Lucia Maria Hoevertsz (☆ 30 di mei 1964 na Aruba) ta un ex-landado sincronisa, atleta olimpico y dirigente deportivo Arubano. El a participa na Weganan Olimpico di Zomer 1984 bou di e bandera di Antias Hulandes. Desde 2017 e ta miembro di e directiva ehecutivo di Comite Olimpico Internacional (COI) y na 2021 a keda elegi como vice-presidente.[1]
Pais di nashonalidat | Reino Hulandes |
---|---|
Nacionalidad deportivo | Aruba |
Nòmber di dilanti | Nicole |
Fecha di nasementu | 30 mei 1964 |
Lugá di nasementu | Aruba |
Okupashon | synchronized swimmer, landado |
Funshon | member of the International Olympic Committee |
A studia na | Universidat di Leiden |
Deporte | synchronized swimming, landamentu |
Partisipante na | 1984 Summer Olympics |
Miembro di | Comite Olimpico Internacional |
Nicole Hoevertsz ta yiu di Dolf Hoevertsz di Aruba y Marie-José Smarius di Limburg, Hulanda. Su tata tabata rector di Colegio Arubano di 1979 te 1993, unda na 1982 el a obtene su VWO-diploma.[2] Hoevertsz a continua su estudionan na Universidad di Antias Hulandes y a cambia despues pa Universidad di Leiden. Aki el a gradua cu titulo di maestria den ley, specialisando den derecho internacional.
Na 1991 Hoevertsz ta inicia su carera profesional como consehero huridico na departamento di Relacionnan Exterior di gobierno di Aruba. Como tal el a presidi na 1992 e Comision Derechonan Humano di Aruba (MCA). Entre 1994 y 1996 el a fungi como secretario interino di conseho di minister di Aruba y tabata e prome muhe den e posicion aki.[1] E tabata consehero huridico di minister-presidente di Aruba di 1997 te 2001 y a regresa despues pa departamento di Relacionnan Exterior. Durante e prome y di dos gabinete Mike Eman (2009-2017) Hoevertsz a asumi e funcion di secretario di conseho di minister.
Den landamento sincronisa Hoevertsz a sali campeon di Aruba multiple biaha. E tabata practica landamento sincronisa cu "The Barracudas", un club deportivo funda na 1970. Entre 1973 y 1984 el a participa na competencianan regional y internacional y a sa di gana varios campeonato (hubenil) Arubano y Antiano. E punto culminante di su carera deportivo tabata su participacion na Weganan Olimpico di Zomer 1984 na Los Angeles, e prome biaha cu landamento sincronisa e keda admiti como wega olimpico. Den e "duet" hunto cu Esther Croes e ta logra e di 18 lugar.[3] Cu su experiencia Hoevertsz a bira activo como trainer den decada ochenta di siglo 20 y ademas tabata duna curso na principiante di lantamento sincronisa y di coaching. Bou su guia tabata organisa shownan na diferente hotel cu e clubnan di landamento sincronisa, entre nan "The Barracudas" y "Aruba Dolphins". Na e Weganan Olimpico di 1988 e tabata coach di e team di landamento sincronisa di Aruba na Seoul pa Comite Olimpico Arubano (COA).[4]
Riba tereno di dirigente deportivo na Aruba, Hoevertsz a ocupa varios posicion. Desde 1991 Hoevertsz ta secretario-general di Arubaanse Zwembond y desde 1998 secretario-general di Comite Olimpico Arubano (COA). E mesun aña e ta bira presidente di comision di deporte femenino pa e Organisacion Pan-Americano di Deporte (PASO) y ta canciller di PASO desde 1999. E tabata co-fundador y secretario di directiva di Instituto di Medicina pa Deporte di Aruba (ARUMEDE), lanta na 1992.[5]
Na 2006 Hoevertsz ta keda elegi miembro di Comite Olimpico Internacional. El a traha den diferente comision, manera comision di deporte femenino (2003-2013), comision di relacionnan internacional (2009-2015), comision di hurisprudencia (2014-2015), comision di deporte y ley (2014-2015), y desde 2015 ta traha den comision di audit, solidaridad olimpico y asuntonan huridico.
Na 2017 el a keda elegi como miembro di directiva ehecutivo di COI.[6] Den e funcion aki Hoevertsz ta desplega rolnan importante, entre otro como presidente di e Comision di Coordinacion pa e Weganan Olimpico di Zomer 2028 na Los Angeles y vicepresidente di e Comision di Coordinacion pa e Weganan Olimpico di Zomer 2024 na Paris. Hoevertsz tambe tabata presidi e Comision di Atletanan Olimpico di Rusia cu, relaciona cu e escandalo di doping den cua e autoridadnan gubernamental di Rusia tabata envolvi, tabatin na su encargo pa finalisa reglanan y regulacion pa participacion di e atletanan den Weganan Olimpico di Invierno na PyeongChang 2018.
Durante un reunion di COI na Tokio dia 20 di juli 2021, el a keda elegi como vice-presidente di COI despues cu ela postula cu mes como unico candidato pa sigui Anita DeFrantz.[7][8]
Na 2018 Nicole Hoevertz tabatin e honor di ta un di e coredonan cu e antorcha pa weganan olimpico di invierno na Sur Korea.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.