மு. மு. இஸ்மாயில்

மு. மு. இஸ்மாயில் (பெப்ரவரி 8, 1921 – சனவரி 17, 2005) நீதியரசர்; தமிழறிஞர்; எழுத்தாளர்; சென்னை கம்பன் கழகத்தின் நிறுவுகைத் தலைவர்; கம்ப இராமாயண ஆய்வாளர்.

நீதியரசர் மு. மு. இஸ்மாயில்
கம்ப ராமாயணக் கலங்கரை விளக்கம்
பிறப்பு	இஸ்மாயில் (1921-02-08)பெப்ரவரி 8, 1921 நாகூர்
இறப்பு	சனவரி 17, 2005(2005-01-17) (அகவை 83) சென்னை
இருப்பிடம்	சென்னை
தேசியம்	இந்தியர்
கல்வி	கலை இளவர், சட்ட இளவர்
பணி	வழக்குரைஞர் சட்ட விரிவுரையாளர் நீதியரசர்
பணியகம்	சென்னை உயர்நீதி மன்றம்
அறியப்படுவது	கம்பராமாயண ஆய்வு
பட்டம்	டாக்டர்
சமயம்	இசுலாம்

பிறப்பு

மு. மு. இஸ்மாயில் நாகபட்டணம் மாவட்டத்தில் உள்ள நாகூரில் 1921, பிப்ரவரி 8ஆம் நாள் பிறந்தார். ஒன்பது வயதில் தாயையும், பதிமூன்று வயதில் தந்தையையும் இழந்த அவரை உறவினர்கள் வளர்த்தார்கள்.

கல்வி

இஸ்மாயில் நாகூரில் பள்ளிப் படிப்பை நிறைவுசெய்தார். பின்னர் சென்னை மாநிலக் கல்லூரியில் இளங்கலை (சிறப்பு) பட்டம் (Bachelor of Arts - Honours)பெற்றார். தொடர்ந்து சென்னை சட்டக் கல்லூரியில் பயின்று 1945 ஆம் ஆண்டில் சட்ட இளவர் (Bachelor of Law) பட்டம் பெற்றார். கல்லூரியில் தன் பேராசிரியர் கே. சுவாமிநாதனுடன் ஏற்பட்ட உறவால், இஸ்மாயிலுக்கு காந்தியத்தில் ஈடுபாடு ஏற்பட்டது.

பணி

தன்னுடைய ஆரம்ப காலத்தில் சென்னை விவேகானந்த கல்லூரியில் பகுதி நேர விரிவுரையாளராகப் பணியாற்றினார்.^[1][2]

வழக்குரைஞர்

இஸ்மாயில் சட்டக் கல்வியில் பட்டம் பெற்றதும் சென்னை வழக்குரைஞர் சங்கத்தில் பதிவு செய்துகொண்டார். 1946 ஆம் ஆண்டு முதல் 1959 ஆம் ஆண்டு வரை சென்னை உயர்நீதிமன்றத்தில் வழக்குரைஞராகத் தொழில் புரிந்தார்.

தமிழக அரசின் கூடுதல் வழக்கறிஞர்

1959 ஆம் ஆண்டு முதல் 1967 சனவரி வரை தமிழ்நாடு அரசின் கூடுதல் தலைமை வழக்குரைஞராகப் பணியாற்றினார்.

சட்ட விரிவுரையாளர்

இஸ்மாயில் நீதிமன்றத்தில் வழக்குரைஞராக தொழில் புரிந்தபொழுதே பகுதி நேர சட்ட விரிவுரையாளராக 1946 ஆம் ஆண்டு முதல் 1951ஆம் ஆண்டு வரை சென்னை விவேகானந்தர் கல்லூரியிலும் 1951ஆம் ஆண்டு முதல் 1959ஆம் ஆண்டு வரை சென்னை சட்டக் கல்லூரியிலும் பணியாற்றினார்.

கூடுதல் நீதிபதி

இஸ்மாயில் 1967 பிப்ரவரி மாதம் முதல் அக்டோபர் மாதம் வரை தில்லி உயர்நீதி மன்றத்தில் கூடுதல் நீதிபதியாக நியமிக்கப்பட்டு பணியாற்றினார்.

நீதிபதி

1967 நவம்பர் முதல் 1979 நவம்பர் 5 வரை சென்னை உயர்நீதி மன்றத்தில் நீதிபதியாகப் பணியாற்றினார்.

தலைமை நீதிபதி

இஸ்மாயில் 1979 நவம்பர் 6 ஆம் சென்னை உயர்நீதி மன்றத்தின் தலைமை நீதிபதியாக நியமிக்கப்பட்டார். 1981 ஆம் ஆண்டும் சூலை மாதத்தில் மு. மு. இஸ்மாயிலைக் கலந்தாலோசிக்காமலேயே வேறு மாநிலத்திற்கு மாற்றினார். அதனைக் கண்டித்து 1981 சூலை 8 ஆம் நாள் தன் பதவியைத் துறந்தார்.

தற்காலிக ஆளுநர்

1980 அக்டோபர் 27 ஆம் நாள் முதல் நவம்பர் 4 ஆம் நாள் வரை இஸ்மாயில் தமிழ்நாட்டின் தற்காலிக ஆளுநராகப் பணியாற்றினார்.

சட்டக்கமிசன் தலைவர்

2005 ஆம் ஆண்டில் சட்டக் கமிசன் தலைவராகப் பணியாற்றினார்.

சென்னை கம்பன் கழகம்

மு. மு. இஸ்மாயிலுக்கு இளமையிலிருந்தே கம்பராமாயணத்தில் ஈடுபாடு இருந்தது. நாளடைவில் அவ்வீடுபாடு புலமையாக மலர்ந்தது. அதன் விளைவாக 1975 ஆம் ஆண்டில் "தினமணி" முன்னாள் ஆசிரியர் ஏ. என். சிவராமன், கம்பன் அடிப்பொடி சா. கணேசன், பேராசிரியர் அ. ச. ஞானசம்பந்தன் சி. எம். அழகர்சாமி, பழ. பழனியப்பன் ஆகிய நண்பர்களின் துணையோடு சென்னையில் கம்பன் கழகத்தை உருவாக்கினார். தொடக்க நாள் முதல் தனது மரணம் வரை அவ்வமைப்பின் தலைவராகப் பொறுப்பு வகித்தார்.

எழுத்துப்பணி

வ.எண்	ஆண்டு	நூல்	வகை	பதிப்பகம்	குறிப்பு
01	1945	மெளலானா ஆஜாத்	வாழ்க்கை வரலாறு
02		அல்லாவுக்கு ஆயிரம் நாமங்கள்	சமயம்
03		இனிக்கும் இராஜநாயகம்	சொற்பொழிவு	உலகத் தமிழாராய்ச்சி நிறுவனம்	உலகத் தமிழாராய்ச்சி நிறுவனத்தில் உள்ள ஏவி.எம்.ஜாபர்தீன் – நூர்ஜஹான் அறக்கட்டளைச் சொற்பொழிவு
04	1957	தமிழ்க் கலைக்களஞ்சியம் தொகுதி 1 [3]	சில கட்டுரைகள்	தமிழ் வளர்ச்சிக் கழகம்	கலைக்களஞ்சிய கட்டுரையாளர்களில் ஒருவராக இருந்து கட்டுரைகள் எழுதியுள்ளார்
05	1978	மும்மடங்கு பொலிந்தன	திறனாய்வு	வானதி பதிப்பகம்
06	1985	கம்பன் கண்ட சமரசம்	திறனாய்வு	வானதி பதிப்பகம்
07	1987	உந்தும் உவகை	திறனாய்வு	வானதி பதிப்பகம்
08	1980	இலக்கிய மலர்கள்	திறனாய்வு	வானதி பதிப்பகம்
09	1992	ஒரு மறக்க முடியாத அனுபவம்	திறனாய்வு	வானதி பதிப்பகம்	கல்கியில் 1985 திசம்பர் 8 இதழில் தொடங்கி தொடர வெளிவந்தவை
10		கம்பன் கண்ட ராமன்	திறனாய்வு	வானதி பதிப்பகம்
11		செவிநுகர் கனிகள்	திறனாய்வு	வானதி பதிப்பகம்
12		வள்ளலின் வள்ளல்	வரலாறு
13		பழைய மன்றாடி	திறனாய்வு	வானதி பதிப்பகம்
14		மூன்று வினாக்கள்	திறனாய்வு	வானதி பதிப்பகம்
15		நினைவுச்சுடர்
16		தாயினும்…
17		உலகப் போக்கு
18		நயத்தக்க நாகரிகம்

இலக்கிய ஈடுபாடு

சென்னை ஸ்ரீராமகிருஷ்ண மடத்தின் பொது நிகழ்ச்சிகளில் பலமுறை ஸ்ரீராமகிஷ்ணர், சுவாமி விவேகானந்தர் பற்றி சொற்பொழிவு செய்திருக்கிறார்.அண்ணா சுப்ரமண்யம் மொழிபெயர்த்த உபநிஷத நூல்கள் இவருக்குப் பிடித்தவை. வேதாந்த கேசரி மற்றும் ஸ்ரீராமகிருஷ்ண விஜயம் பத்திரிக்கைகளின் ஆயுள் சந்தாதாரராக இருந்தவர்.^[1]

வெளிநாட்டுப் பயணம்

இஸ்மாயில் ஹாங்காங் நாட்டின் தமிழ்ப் பண்பாட்டுக் கழகத்தின் அழைப்பின்பேரில் 1970 ஆம் ஆண்டு ஹாங்காங் சென்று வந்தார்.

விருதுகள்

மு. மு. இஸ்மாயிலுக்கு அவரது தமிழ்த் தொண்டினை பாராட்டி பல்வேறு அமைப்புகள் பட்டங்களையும் விருதுகளையும் வழங்கினர். அவை வருமாறு:

வ.எண்	ஆண்டு	விருது	அமைப்பு
01	1978	கம்பராமாயண கலங்கரை விளக்கம்	நெல்லை கம்பன் கழகம்
02	1979	டாக்டர்	அண்ணாமலை பல்கலைக் கழகம்
03	1989	பால் ஹாரிஸ் பெல்லோஷிப்	மதுரை ரோட்டரி சங்கம்
04		இயல் செல்வம்
04		சேவா ரத்தினம்
06	1991	இராம ரத்தினம்	சென்னை நாரத கான சபா
07	1992	கலைமாமணி	தமிழ்நாடு அரசு
08	1997	ராமானுஜர் விருது	ஆழ்வார் ஆய்வு மையம்

மறைவு

மு. மு. இஸ்மாயில் 2005 சனவரி 17ஆம் நாள் திங்கட் கிழமை சென்னையில் காலமானார்.