Džakart

Džakart (indonez. i jav. Jakarta, indonezine virkand [dʒaˈkarta]; edel 1527. vot — Sunda Kelapa, edel 1619. vot — Džajakart, edel 1942. vot — Batavii) om eriline pälidnalaine ümbrik (indonez.: Daerah Khusus Ibu Kota Jakarta), Indonezijan pälidn da sen kaikiš suremb lidn. Vn 2024 elokule valdkundan pälidnan sirdand planiruiše udhe Nusantar-lidnha Kalimantan-saren päivnouzmaižel randpolel, sen ezmäine pordaz om sauvomas vspäi 2019.

Džakart
Jakarta

Lidnanznam	Flag
Valdkund	Indonezii
Eläjiden lugu (2023)	11,249,678 ristitud
Pind	661,5 km²
Pämez'	Heru Budi Hartono (reduku 2022—)
Telefonkod	+62−21
Avtokod	B
Aigvö	UTC+7

Lidnan keskuzpala vl 2005

Geografijan andmused

Lidnan kart ezilidnoidenke (2024)

Lidn sijadase Jav-saren lodehližel randištol, kus Čilivung-jogi (Kali Besar-jogi) lankteb Javanmerhe, kahesa metrad ü.m.t. keskmäižel korktusel.

Klimat om ekvatorialine, tropine mussonine. Voden keskmäine lämuz om +28,2 C°, kuidme +27,3..+28,8 C°. Ekstremumad oma +18,9 C° (sügüz'ku) i +37,9 C° (reduku). Paneb sadegid 1933 mm vodes, enamba vilukus (373 mm) i uhokus (381 mm), vähemba kezakus-sügüz'kus (52..80 mm kus). Meriveden lämuz om +28..+30 C° vodes läbi. Kun keskmäine relätivine nepsuz vajehtase 75..85 % röunoiš voden aigan.

Tobmuz

Lidnan rajonad (2024)

Džakart jagase videks lidnrajonaks ühtenke ümbrikonke. Pälidnalaižen ümbrikon pämez' nimitase gubernatoraks.

Edeline lidnan pämez' (gubernator) om Anis Basvedan (reduku 2017 — reduku 2022, Anies Baswedan).

Eläjad

Vl 2011 kaik 10 187 595 ristitud elihe lidnas^[1]. Vn 2010 Indonezijan rahvahanlugemižen mödhe läz 28 mln ristituid elihe lidnaglomeracijas 6392 km² pindal.

Eläjiden religiozine mülükund: 85,5 % oma islaman polenpidajad, 5,2 % — protestantad, 4,8 % — katolikad, 3,5 % — buddistad, 1,0 % — induistad.

Transport

Avtobusad, kiruhavtobusad, ezilidnelektrojonused da taksid oma kundaližeks transportaks lidnas i sen aglomeracijas. Metropolitenan ezmäine jono radab vspäi 2019 (13 stancijad), monorel's da metron kahtenz' jono oma sauvomas vspäi 2013. Kaikiš znamasižemb valdkundas Tandžungpriok-konteinerport sijadase 13 km pohjoižhe lidnaspäi. Lidn om avto-, raud-, il'm- da meriteiden tarbhaine keskuz.

Rahvahidenkeskeine civiline Sukarno-Hatta-lendimport (CGK / WIII, indonez.: Bandar Udara Internasional Soekarno–Hatta) om saudud päivlaskmaižes Tangerang-ezilidnas 20 km lodeheze Džakartan keskusespäi. Matknikoiden vozne valu om 60 mln (2013). Tehtas passažorreisid Suvipäivnouzmaižen Azijan maihe da Indonezijadme päpaloin, jügureisid kaiked mail'madme.

Rahvahidenkeskeižed sidod

Sebruzlidnad

• Grekanma Afinad, Grekanma^[2]
• Tailand Bankok, Tailand^[2]
• Saksanma Berlin, Saksanma^[2][3] vs 1993 sulakun 22. päiväspäi^[4]
• Saudan Arabii Džidd, Saudan Arabii^[2] vs 1979 keväz'kun 10. päiväspäi
• Vjetnam Hanoi, Vjetnam^[5]
• Pakistan Islamabad, Pakistan vs 1984 redukun 25. päiväspäi^[6]
• Marok Kasablank, Marok^[2] vs 1991 semendkun 27. päiväspäi
• AÜV Los Andželes, AÜV^[2] vs 1990 tal'vkun 28. päiväspäi^[7]
• Francii Pariž, Francii^[2] partnör-lidn vs 1995 sügüz'kun 8. päiväspäi^[8]
• Kitai Pekin, Kitai^[2] vs 1992 elokun 4. päiväspäi^[9]
• Korejan Rahvahaliž-Demokratine Tazovaldkund Phen'jan, Pohjoižkorei^[10]
• Alamad Rotterdam, Alamad^[2][11] vs 1986 elokun 1. päiväspäi
• Korejan Tazovaldkund Seul, Suvikorei^[2][12] vs 1984 heinkun 25. päiväspäi
• Turkanma Stambul, Turkanma^[13]

Partnörregionad

• Japonii Tokion prefektur, Japonii^[2] vs 1989 redukun 23. päiväspäi^[14]
• Avstralii Uz' Suviuel's-štat, Avstralii vs 1994 semendkun 30. päiväspäi