Lambaz

Lambaz (latin.: Ovis aries) om kabjživat, mülütadas Pall'azsar'vižed-sugukundha (Bovidae).

? Lambaz
Lambaz
Tedoklassifikacii
Valdkund: Živatad Tip: Sel'gjäntkeižed (Chordata) Klass: Imetaiživatad (Mammalia) Heimkund: Šorpkabjaižed (Artiodactyla) Sugukund: Pall'azsar'vižed (Bovidae) Heim: Oinhad (Ovis) Erik: Lambaz
Latinankel'ne nimi
Ovis aries (Linnaeus, 1758)
Sistematik Vikierikoiš Kuvad Vikiaitas ITIS 552475 NCBI 9940

Lambhan ižač om bošak, vai oinaz. Lambhanpoigaine om vodn (vodnaz, cikuine).

Lugumär

Vl 2013 kaik oli 1 172 mln lambhid mail'mas. Valdkundad järedanke lambazvodindanke: Kitai — 185 mln lambhid, Avstralii — 89 mln, Indii — 75 mln, Sudan — 52 mln, Iran — 50 mln, Nigerii — 39 mln, Sur' Britanii — 33 mln, Uz' Zelandii — 30 mln.

Kaik enamba mi 200 lambhan sugud om sätud mail'mas.

Ümbrikirjutand i kävutand

Živat om kodikoittud nügüdläižen Turkanman, Sirijan i Irakan territorijoil kahesa tuhad vozid tagaz vai sen amuižemb^[1].

Täuz'kaznuded ižačud oleldas 70..160 kg (rekord 247,2 kg), emäčud 45..100 kg. Ižačud oma sar'vekahad tobjimalaz, emäčuil voib olda penid sar'vid. Sägun korktuz om 55..100 sm, hibjan piduz — 60..110 sm. Kandand vedase viž kud. Elädas 10..12 vodhesai. Lambaz om märehživat, otab sötkeks heinäsižid kazmusid, ei navedi karktoid heinid.

Kävutadas villad karvaspäi, lihad, maidod (tehmaha brinzad), razvad i ket; ottas kaclendtegoihe model'organizmikš (oz., Dolli-lambhaine).

Lambhaze sidodud vepsän tärtused

• Baši-baši, čke-čke — sanad kucumha lambhid.
• Keričimed — raudad lambhid keričemha.
• Kezi — lambaznahk.
• Lambazlävä — sauvuz lambhid pidamha.
• Lambaznik — lambhiden pidai.
• Tal'vill — keritud kevädel lambazvill.

Lambhaze sidodud vepsän muštatišed da ozoitesed

Muštatišed

• Armaz kuti hahk lambaz verhas läväs.
• Sindai ei kerikoi, ka ala bäläida. (ku ei küzugoi, ka ole vaitti)

Ozoitez

• Iče Timoi karvakaz, kauhtanaine villakaz. (lambaz)