Busschn van 't nôordlik Kanadeesch Schild

De Busschn van 't nôordlik Kanadeesch Schild, zyn 'n ekostreeke uut d' ekozôone Nearctis vôgnst de Weirld Nateur-Stichtienge (WWF). D' ippervlakte van d' ekostreeke besloa 61 382 718 êktoarn ^[1][2][3]. De busschn maakn dêel uut van 't bioom de boreoale busschn of de tajga van nôordlik Kanada. Vo de grôote ekoloogiesche rykdom is d' ekostreeke e dêel van de Global 200-streeke de "Kanadeesche boreoale busschn".

Dat artikel es geschreevn in 't Noordelik West-Vlams.

---

Liggienge van d' ekostreeke in Nôord-Amerika.

Liggienge van de boreoale busschn in de weirld.

Punt Utsingi in 't Ôostn van 't Grôot Sloavn-Mêer.

Beschryvienge

De tajga van 't nôordlik Kanadeesch Schild bezet 't zuudn van Nunavut, 't ôostn van 't Nôordwest Terrietôorjum, 't nôordôostn van Alberta en 't nôordn van Saskatsjewan en van Manitoba. De gemiddelde joartemprateure varjeert tusschn -5 °C en -8 °C. De gemiddelde zoomretemprateure varjeert tusschn 8 °C en 11 °C, en de gemiddelde wientretemprateure schommelt tusschn -24,5 °C en -21,5 °C. De joarliksche neerslag ligt tusschn 200 mm en 400 mm. Dr zyn styf veele rotspartynn in die ekostreeke. 't Oogste punt ligt ip 490 m boovn de zêespeegle. De permafrost is nie aanêensluutnd en ysblokkn wordn van tyd toe tyd gevoenn ^[4].

Plantn-weirld

De nôordgrenze van die ekostreeke komt oovrêen mê de nôordlikke boomgrenze. D' ekostreeke zeive vormt 'n oovregangszôone tusschn de tajga en de toendra. De busschn, styf dinne gezoajd, bestoan oofdzoaklik uut kreuple zwarte sparre (Picea mariana) en moeras-lorke (Larix laricina) woa datr ook e bitje moagre witte sparre (Picea glauca), berke, Ericaceae, wullegras (Eriophorum), korstmos en mos tusschn stoat. De natte plekn zyn deurspêkt mê polln van cyprgras (Carex), wullegras en veenmos (Sphagnum). An sommigte kantn kunn drundre ook mêer vulgruujde busbestann vormn van Ameriekoansche roatlpopliere (Populus tremuloides), boalsmpopliere (Populus balsamifera), witte en zwarte sparre en boalsm-denne (Abies balsamea).

Beschermienge

Dr wordt geschat da apeupri 90 % toe 95 % van d' ippervlakte van die ekostreeke nog oltyd oengerept is. Mynbow-aktivieteitn zyn de belangrykste reedn van verstôorienge.

Zied ook noa

Boreoale busschn uut 't Nearctis
NA0601 Boreoale bergbusschn van 't Alaska-Schiereiland	Alaska (USA)
NA0602 Busschn van 't sentroal Kanadeesch Schild	Kanada
NA0603 Boreoale busschn roend de Cook-Golve	Alaska (USA)
NA0604 Boreoale busschn van de Koopre-Ôogvlakte	Alaska (USA)
NA0605 Boreoale busschn in ôostlik Kanada	Kanada
NA0606 Tajga van 't ôostlik Kanadeesch Schild	Kanada
NA0607 Vlakte-tajga van Binn-Alaska en Joekon	Kanada/USA
NA0608 Busschn van sentroal Kanada	Kanada
NA0609 Busschn van 't westlik Kanadeesch Schild	Kanada
NA0610 Tajga tusschn de Muskwa-Bergn en 't Grôot Sleevie-Mêer	Kanada
NA0611 Busschn van d' ooglandn van Newfoundland	Kanada
NA0612 Busschn van 't nôordlik Kanadeesch Schild	Kanada
NA0613 Busschn van de nôordlikke Kordieleera	Kanada
NA0614 Tajga van de Nôordwestlikke Gebiedn	Kanada
NA0615 Woestenyn an de kustn van de schiereilandn Avalon en Burin	Kanada
NA0616 Tajga an de zuudlikke Hudson-Boaje	Kanada
NA0617 Drooge busschn van 't binneland van Joekon	Kanada

Eksterne koppliengn

• (en) Northern Canadian Shield taiga (The Encyclopedia of Earth)
• (en) Canadian Boreal forests (WWF - Global ecoregions).
• (en) Northern Canadian Shield taiga.