上海世博文化公园

上海世博文化公园勒拉中国上海市浦东新区，西北面到黄浦江，东面延伸到卢浦大桥——长清北路一线，南面到通耀路——龙滨路伊面𡍲，占地面积约莫2平方公里，箇当中，北园占地85公顷，好分成功舞动广场、静谧森林、时光印记大道、世博花园、音乐之林、中心湖、后滩滨江、申园等景点，还堆仔座双子山。

远看公园里向个双子山

1958年到1968年，整块地是上钢三厂个炼钢渣堆。^[1]到2010年上海世博会个辰光，厂拆脱变成世博会个地。2017年9月22号，世博文化公园动工，拿选择性保留下来个2010年上海世博会4隻场馆进行改造。^[2]2021年12月31号，北园开园。2022年底，上海世博文化公园双子山项目完成表皮结构封顶^[3]。2024年9月20号，世博文化公园南区开园。^[4]

总体设计

除开后滩公园以外，世博文化公园新造个部分大致好分成三隻主题区域：东北面个“世博环区”，主要建筑物是四隻保留个展馆；西北面个“人文艺术区”，主要建筑物是上海大歌剧院；南面个“自然生态区”，主要建筑物是双子山、上海温室花园、上海久事国际马术中心。^[2]

主要景点

• 世博文化公园里向有得四座捐赠畀上海个世博会外国自建馆：法国馆、意大利馆、卢森堡馆、俄罗斯馆。原法国馆乃朝改造成罗丹艺术文化发展中心，原意大利馆改名“上海意大利中心”，原卢森堡馆现在是饭店，原俄罗斯馆变成叫“红石中心”（RED ROCK）个演艺中心^[5]。
• 时光印记大道勒垃济坤路主入口，从东往西展陈公园地块历史，东部是工业风格雕塑，当中是海宝雕塑，尽头是隻金属圆球，意思是“圆梦”^[6]。
• 申园勒垃四座外国馆西面，是一座有江南园林文化特色个园中园。园林占地5公顷，好分成北山、南水、东园、西苑个布局，呈现出明清时期江南传统园林风格。名字里向个“申”字是上海简称，意思就是上海之园^[7]。
• 双子山勒垃公园南面，是根据上钢三厂老职工对原有钢渣堆山个回忆搭仔提议造个^[1]。山里向是空心钢结构车库，有48米主峰搭仔37米侧峰。因为结构特殊，表面土层浅，弗种高大植物，侪是浅根系个。为咾让树好一次成活，设计方精确选取树种；所有建筑结构、管线、树根个位置侪经过BIM碰撞检测，生怕树生长受限^[8]。2022年底封顶^[9]，2024年9月随咾南区建成开放。双子山造好以后成为世博文化公园个“网红景点”，要提早预约，还勒垃门口畀行动不便个人提供免费登山杖，让大家嘲双子山有“4800cm高”^[10]。
• 上海温室花园勒垃公园中部，面积2.2万平方米，建好个辰光是亚洲顶大个玻璃温室花园，有海市沙洲（展出沙地植物）、云上森林（展出雨林植物）、云雾峡谷（展出常温植物，设有水景）三隻展馆，当中用“老厂房钢架”连起来，呼应场地个工业遗存。地下是弗对外开放个空调机房、管理用房^[11][12]。平日门票98元，周末搭仔节假日门票128元，身高100cm以下儿童免票^[13]。土建丄用个是张弦铝合金网格结构^[14]。
• 上海久事国际马术中心勒垃公园南部，是中国头一家好举办国际比赛个永久性马术场馆。
• 上海大歌剧院勒垃公园西部，勒垃造。
• 世博文化公园沿黄浦江岸线是“后滩滨江”景点，是老底子后滩公园，设计理念是生态、自然、野趣，有湿地生态景观、农耕文明景观、工业文明遗存、后工业文明体验四隻层次景观，有水循环净化功能。
• 公园北面入口附近有“狗GO乐园”，畀宠物狗活动社交^[15]。

• 
  罗丹艺术中心（原法国馆）
• 
  原卢森堡馆改造个饭店
• 
  远眺温室花园，钢架丄有“自力更生 奋发图强”字样
• 
  后滩滨江（原后滩公园）个水池
• 
  “申园”外景
• 
  人工湖大石桥

地下空间

世博文化公园地下有已经造好个打浦路隧道。为咾拿原后滩公园帮现在新造个部分连起来，原有个世博大道地面道路拆除改地道，同上海大歌剧院停车场设置地下联络通道，2021年10月底造好通车个^[16]。地铁19号线计划从公园地下穿过，勒垃公园范围里向有世博大道站、后滩站两站，箇两座车站个土建工程帮公园同步修个，还勒垃后滩站帮公园西南角个下沉广场、马术中心地下空间平层修仔通道，还好联到大歌剧院地下空间里向^[17]；世博大道站设有三隻出入口，工程编号1号口勒垃公园内部，特殊设计，囥勒假山里向^[18]。世博文化公园地块内还规划有宛平南路隧道、枫林路隧道、轨道交通机场快线（原沪杭磁悬浮线位）三条通道^[19]。世博会期间个原雪野二路、博成路共同沟勒垃世博文化公园开工前拆脱，连勒公园外头个济坤路去哉^[20]。