黄浦江

黃浦江（也叫做黃浦、浦江），老早叫做黃歇浦（簡稱歇浦）、春申江（簡稱申江），是上海市境內頂頂大個河流。因為戰國辰光楚國個春申君黃歇，所以叫迭個名字。搿條江歷史浪是吳凇江個支流，乃朝反過來比吳凇江更大，拿上海割成仔浦西搭仔浦東，邪氣有名個上海外灘搭陸家嘴，儕立在黃浦江兩岸。

1928年上海外灘外，就是黃浦江

黃浦江匯入長江個圖

概況

黃浦江攏總長大約碼子114公里，闊300-700米，正常全年凍弗起來，是上海個重要水道。它從上海市青浦區朱家角鎮個澱山湖開始，一直到吳淞口匯入長江，是長江入海前個阿末一條支流。黃浦江也是太湖向東海排水個重要通道，現在大約碼子78%個太湖入海個水是走黃浦江個，主要有澱山湖、太浦河、紅旗塘、上海塘箇四個大個水系。

主要個支流包括吳淞江、薀藻浜、川楊河、澱浦河、大治河、斜塘、園泄涇、大泖港。浦東、浦南地區臨海，通過川楊河、大治河、金匯塘、紫竹塘等河浜用上黃浦江個水來灌溉當地。

黃浦江市區段水深10米左右，頂頂深個地方有17米左右，曾經是上海航運業個核心水道，十六鋪碼頭就拉伊邊浪。乃朝，只有巨潮港（奉賢西北部）到吳淞口段航道深度還有8.2米以上，松浦大橋到吳淞口一直好開3000噸級個海輪，5000噸級個海輪好直接到閔行，2萬噸級個海輪好直接開到吳涇，5萬噸級個海輪好到徐浦大橋。

歷史

有說法認為是因為上海曾經是楚國春申君黃歇個封地。

黃浦江兩岸個綜合開發

黃浦江兩岸個綜合開發規劃，範圍從吳淞口至徐浦大橋，兩面岸線長大約碼子85公里，規劃控制面積大約碼子有74平方公里。規劃控制範圍里向有核心區搭仔協調區，其中核心區分為中心段、南延伸段搭北延伸段，跟浦東新區、寶山區、楊浦區、虹口區、黃浦區搭徐匯區6個行政區有關係^[1]。

2017年年底，黃浦江東岸個濱江公共空間貫通開放，勒拉東岸，從楊浦大橋到徐浦大橋個濱江岸線上，每隔1公里就有1座好讓市民休息、娛樂個望江驛^[2][3]。

2018年1月1號，黃浦江兩面從楊浦大橋到徐浦大橋個45公里岸線公共空間全部打通，並開放畀全體市民^[4][5]。

越江設施

黃浦江上個橋

勒拉1930年代，就曾經有過造橋個動議，但一直嘸沒實施。1970年代為仔配合上海石化工程，造出來黃浦江浪頭一座大橋——松浦大橋。但勒拉造橋個辰光，伊拉嘸沒想未來個航道會得向黃浦江個上游跑，所以橋下頭個淨通航高度只有10米。

1980年代開始，南浦大橋開工。箇後頭，黃浦江上個橋開始冒出來。

楊浦大橋 斜拉橋 南浦大橋 斜拉橋 盧浦大橋 拱橋 徐浦大橋 斜拉橋 閔浦大橋 雙層斜拉橋，上層S32公路，下層普通公路 奉浦大橋連續梁橋 閔浦二橋（獨塔雙索斜拉橋，上層公路，下層軌道交通5號線南延伸） 閔浦三橋 松浦大橋（鋼桁架雙層公鐵橋，上層G320公路，下層滬杭鐵路金山支線） 松浦二橋 連續梁橋，G15（原A5）公路橋 松浦三橋 連續梁橋 G1503（原A30）公路橋 滬杭鐵路橋 G60（原A8）公路橋 朱楓公路橋 G50（原A9）公路橋 滬青平公路橋

穿越黃浦江個隧道^[6]

郊環隧道 外環隧道 長江路隧道 殷行路隧道（規劃） 嫩江路隧道（規劃） 翔殷路隧道 周家嘴路隧道 軍工路隧道 江浦路隧道 大連路隧道 公平路隧道（規劃） 新建路隧道 外灘觀光隧道 延安東路隧道 人民路隧道

復興東路隧道 陸家浜路隧道（規劃） 西藏南路隧道 打浦路隧道 楓林路隧道（規劃） 宛平南路隧道（規劃） 龍耀路隧道 龍水南路隧道（在建） 上中路隧道 羅秀路隧道（規劃） 銀都路隧道 （在建） 虹梅南路隧道

穿越黃浦江個地鐵

上海軌道交通2號線 上海軌道交通4號線（兩次過江） 上海軌道交通5號線（過江段也就是閔浦二橋） 上海軌道交通7號線 上海軌道交通8號線 上海軌道交通9號線 上海軌道交通10號線 上海軌道交通11號線 上海軌道交通12號線

上海軌道交通13號線 上海軌道交通14號線 上海軌道交通15號線（二期，拉造） 上海軌道交通17號線（二期，拉造） 上海軌道交通18號線 上海軌道交通19號線（拉造） 上海軌道交通20號線（二期，拉造）