上海公共交通卡

上海公共交通卡（交通一卡通），上海市民通常称其为“公交卡”，是上海市政府个一项实事工程，覆盖全上海各类交通系统（公交、轨道交通、出租、轮渡搭子磁悬浮列车），由上海久事集团个子公司上海公共交通卡股份有限公司发行^[1][2]，最早一版是勒拉1999年12月27号发行个。

历史概况

1998年9月25号，中共上海市委、上海市人民政府会议决定建设金融IC卡、城市交通IC卡、市民保障IC卡“一卡通”工程项目。1999年12月27号，上海东方交通卡股份有限公司推出上海公共交通卡，首先勒垃地铁一号线、11条公交线路搭仔一隻摆渡口试运行；2000年4月开始推广到差头；2000年11月份覆盖到地铁二号线。P+R停车场、高速公路收费、汽车加油咾啥个勒垃上海也好刷交通卡^[3]。

发行种类

上海公共交通卡发行过个卡种有下头底能^[4]：

• 普通卡（现在发个是2020年6月底推出个红颜色版普通卡^[5]，全国交通一卡通互联互通、全国城市一卡通互联互通双标准；老底子有紫颜色版普通卡（2012年7月16号推出^[6]，全国城市一卡通互联互通标准）、绿颜色（1999年首次发行）、黄颜色（2005年首次发行）、红颜色（2007年首次发行）、蓝颜色（2008年首次发行）版普通卡，侪停售哉）：买卡要付20元押金（2007年年底前30元）。
• 纪念卡：特定节日、事件或者其他情况限量发行，没押金，卖出去退弗了个。
• 异型卡：长唻弗是张卡片个交通卡，限量发行，没押金，卖出去退弗了个。
• 手表卡：长唻赛过手表形状个交通卡，好带勒手臂膊浪^[7]。
• 银行联名卡：帮银行合作发行个，比方讲交通银行个“太平洋·交通一卡通”联名卡、招商银行个“上海交通IC联名普卡”、深圳发展银行个“上海青年卡”、上海农商银行个工会卡、建设银行个“长三角畅行龙卡”^[8]。
• 保通卡：帮中国太平洋保险联合推出，70岁以上老年人用个，要每隻号头付保费。非高峰时段，除开跑高速公路个线路、机场线、旅游线、磁浮线，侪好无限次乘^[9]。伊个前身是社会保障卡—敬老卡^[10]。
• 手环交通卡：2015年11月24号，帮凤凰云科技（北京）有限公司合作推出，除开做交通卡，还好记录运动、检测睡眠、显示辰光^[11]。
• 手机交通卡：通过手机里向个芯片，拿交通卡功能集成到有NFC功能个智能手机丄，刷手机就好刷卡。另外还好通过手机自家个支付程序，或者上海公交卡app开通虚拟公交卡^[12][13]。老底子还推出过2.4G手机钱包卡，现在停用哉^[14]。
• 手机乘车码：是交通卡公司帮腾讯公司、支付宝、中国银联合作推出个乘车码，通过微信小程序“腾讯乘车码”、支付宝“上海公交”、银联云闪付乘车码，扫码付钞票，享受公交换乘优惠。当中微信乘车码勒垃2018年6月份就推出哉，支付宝乘车码2018年11月份推出个，同年12月份开通云闪付乘车码^[15][16][17]。中国建设银行、中国工商银行咾啥个也帮上海公共交通卡合作推出乘车码产品。乘车码好用来乘公交（含张江有轨电车、临港中运量1号线）、摆渡（含崇明三岛轮渡）、上海地铁（含金山铁路、磁浮；2022年12月3号前，乘上海地铁、磁浮要用Metro大都会）。2022年12月3号开始，乘车码覆盖上海地铁系统，勒垃随申办里向出来了隻集成上海公共交通卡乘车码个“随申码”。2023年开始，上汽集团、上海久事、申通地铁咾啥上海国企设立“随申行”公司，除开提供乘车码“随申码”，还提供19.8块一张个日票，24小时里向乘上海地铁、公交、摆渡无限趟^[18]，当中同一部公交车30分钟里向只好用一趟，地铁要间隔5分钟，黄浦江摆渡乘坐间隔10分钟以上，每2個钟头旁顶乘2趟^[19]。2024年1月20号推出47块8个联程日票三日票、85块8个联程日票七日票^[20]。

实体卡方面，上海都市旅游卡也有交通卡功能，优惠政策同交通卡。

透支

当卡里向钞票还是正数，必过比要付个钞票少个辰光，好透支一趟。^[21]

买卡充钞票

上海地铁上海火车站站个交通卡服务站（图左面）

交通卡自助充值机

乃朝，九江路服务中心、陆家浜路服务中心、上海地铁17隻自营人工服务网点有得上海公共交通卡全业务人工服务。另外勒垃全上海好德、可的、良友咾啥个1300多家便利店、中国邮政500多隻服务网点、大部分浦发银行、部分公交公司、差头公司、摆渡站头咾啥个有代理人工服务网点，提供交通卡现金售卡、充值业务个人工服务^[22][23]。2018年1月25号，上海个来伊份门店正式提供交通卡购卡、充值业务^[24]。

2016年12月25号，上海地铁全网络100多座车站新增加公共交通卡自助充值机155台，原本个客服中心人工购卡、充值服务也取消哉，只支持银行卡、支付宝（後来新增加微信支付）付钞票，部分市民，特谓是对自助充值方式弗熟悉个中老年人，邪气弗满意，认为增加交通卡冲钞票个困难，上海市人大代表史秋琴还提出书面意见^[25][26]。故咾，上海公共交通卡公司组织技术力量，优化自助服务设备个操作界面、操作流程，勒垃地铁站头发操作手册，提供相关个服务指南^[22]。2017年12月份，经交通卡公司、申通地铁集团共同协商，上海地铁恢复50隻车站个交通卡人工服务^[27]。

2017年12月28号，上海交通卡公司勒垃71路支线丄头一趟试点交通卡乘车二维码支付^[28]。

2018年3月29号，Apple宣布Apple Pay支持上海交通卡，大多数iPhone、Apple Watch用户好直接勒垃钱包app里向开通上海公共交通卡虚拟卡，望里向头冲钞票咯直接用。^[29]

2018年6月15号，上海久事集团宣布帮腾讯公司达成战略合作，上线“上海公共交通乘车码”，乘客好通过微信小程序打开乘车码，扫乘车码乘公交车，享受公交换乘优惠。到10月底中国国际进口博览会开幕前，上海市公交车辆全覆盖^[15]。

除开自助充值机，用户还好勒垃“上海交通卡”手机App或者支付宝里向直接畀交通卡冲钞票。

用卡范围

公交车丄“交通一卡通，潇洒一挥”标志（老标志）

装有二维码扫描区个新式公交车刷卡器

好用上海公交卡搭仔银联云闪付个自动售货机

勒垃上海，交通卡好用垃地铁、公交、差头、摆渡、P+R停车、加油站、高速公路高头，甚至好勒部分自动售货机丄买饮料。

除开箇眼勒垃上海个用法，上海公共交通卡也好勒垃外地用，必过弗同辰光个卡分两隻标准，使用范围也弗一样。

城市一卡通互联互通

主文章：全国城市一卡通互联互通

交通卡丄有City Union标识个，就表示箇卡参加住建部一卡通互联互通工程。所有紫颜色个上海公共交通卡，外加U开头个11位纪念卡侪符合一卡通互联互通工程标准，理论丄好勒垃几十座城市用，实际浪向只好勒垃长三角部分城市用。

2002年10月1号，上海公共交通卡帮无锡太湖交通卡正式联网，上海、无锡成为中国头一批公共交通卡城际互联个城市。2017年5月1号开始，上海全面关脱对原有无锡交通卡互联互通个应用支持。

2003年4月份，上海公共交通卡好垃杭州出租车浪用；2003年10月份，上海公共交通卡帮无锡太湖交通卡好勒垃苏州用；2009年，改造仔个上海交通卡收费系统兼容符合建设部最新标准个非接触式CPU卡；2009年11月份，上海公共交通卡好勒垃大丰个差头丄用，还勒垃大丰推出上海公共交通卡大丰卡，使用范围帮上海公共交通卡基本丄一模一样^[30]

2012年7月份，上海公交卡公司宣布，新发行个紫色普通卡帮卡号U开头个11位纪念卡是CPU卡，好勒垃建设部互联互通协议个宁波、绍兴、湖州、台州、常熟等地方用，必过弗好勒垃现有第一代逻辑加密卡互通城市用，反过来也一样^[31]。

2012年7月27号，全国城市一卡通互联互通开通仪式勒垃绍兴举行，头一批互通城市是上海、宁波、绍兴、湖州、台州、常熟、兰州、白银，需要调成新个CPU卡才支持互联互通^[32]。

异地使用说明

• 第一代逻辑加密卡（M1卡）：绿色、黄色、红色交通卡，卡号是数字开头个纪念交通卡、异形交通卡，已停售。2018年12月31号前，好勒垃无锡、昆山、常熟、阜阳、苏州（公交）、杭州（部分出租车）、南宁（海博差头）、大丰（车头）、舟山用；2019年1月1号开始，交通卡公司只承诺保留苏州个单向互联互通，帮其他城市个逻辑加密卡互联互通侪关脱^[33]。生怕两种互联互通模式（CPU卡搭仔M1卡）对城市通卡管理产生影响，淮南停脱M1卡个互联互通。2017年6月30号开始么，无锡、淮南、阜阳个M1卡也勿好勒垃上海用哉。^[34]
• 过渡卡：蓝色交通卡搭仔字母“C”开头个纪念卡、异型卡。只好垃上海、昆山用。
• 第二代CPU卡：紫色交通卡、11位卡号是字母“U”开头个纪念交通卡、异形交通卡。理论丄好勒垃太仓（公交）、金华城区（公交）、宜兴（公交）、宁波（公交）、绍兴（公交）、湖州（公交）、台州（公交）、常熟（公交）、昆山（公交）、江阴（公交）、淮安（公交）、启东、无锡（公交）、南通（公交）、泰州（公交）、长兴（公交）、舟山（公交）、嘉兴（公交）、义乌（公交）、温州（公交、轮渡）用（注：部分城市完全切换到交通联合仔么，City Union协议停脱哉，上海第二代CPU卡就呒办法垃伊边壗用哉）^[35]。

交通卡只好异地使用，弗允许异地充卡。

全国交通一卡通互联互通

2019年1月1号开始，全国所有带“交通联合”标识个卡（包括先前发行个“申城通”卡）好勒垃上海所有支持刷上海公共交通卡个公交汽电车丄用^[33]。同年9月28号，勒垃陆家浜路服务中心，正式发行头一款非试运行个交通联合版上海公共交通卡。2019年12月26号，上海公共交通卡公司推出交通联合首发纪念试运行卡，同时享受上海公交换乘优惠。2020年1月1号开始，全国所有带“交通联合”标志个公共交通卡好勒垃上海公交、地铁、轮渡丄用，必过弗好勒垃上海充卡咯享受换乘优惠^[36]，同年6月底发布交联版普通卡^[37]。

2021年5月10号，上海公共交通卡公司勒垃Apple Pay上线全国交联版上海交通卡^[38]，必过弗好刷差头搭仔高速公路丄付钞票。

2023年6月20号开始，松江有轨电车完成对闸机个改造，支持外地个带“交通联合”标志个交通卡^[39]。

优惠政策

• 上海公交：勒垃乘公交或轨道交通刷卡个120分钟里向换乘公交，搭仔乘公交刷卡120分钟以後乘轨道交通个，优惠1块，勒垃公交车读卡器丄，享受换乘优惠个辰光会得发出“滴滴”声，弗是一般性个“滴”一声；必过轨道交通换乘轨道交通、磁浮线、旅游线、机场线、定制公交、部分社区巴士弗参与优惠。公交换乘轨道交通，基准辰光是轨道交通进站辰光搭仔公共交通阿末一趟刷卡个辰光；轨道交通换乘公交，基准辰光是轨道交通出站辰光搭仔公共交通刷卡个辰光。2022年12月3号开始么，随申码、乘车码实现对上海公交、地铁、轮渡个全覆盖，也好享受轨道交通帮公交间个优惠^[40]。
• 上海轨道交通（参见上海地铁车票与票价#优惠）：每個自然月里向用同一张上海公共交通卡、同一只Metro大都会账号或同一渠道同一账号个上海公共交通乘车码乘上海地铁实际累积消费满70块，箇只号头里向，满70块个箇笔搭挺下来个消费侪打九折，第二个号头重置。另外，持上海公共交通卡个乘客来勒虚拟换乘站好来勒30分钟里向出站换乘，里程连续计算。^[41]
• 上海轮渡：对非空调摆渡船（上海轮渡已取消非空调轮渡），每個自然月里向，以60趟为一周期，後40趟打8折。乘空调船么，次数累计必过没箇优惠，但是同一天里向乘多埭个，第二埭开始么每趟优惠一块。
• 上海磁浮示范运营线：用公共交通卡乘磁浮列车，普通舱是40块个优惠票价。
• P+R停车换乘：勒垃地铁车站个公共换乘停车场（库），每日天5点30分到23点30分里向停车子，而且卡里向当天又勒垃箇站换乘轨道交通个记录，就好享受每趟5-10块个停车收费优惠^[42][43]。