上海轨道交通2号线

上海軌道交通2號線是上海第二條地下鐵路，勒垃1999年9月20號通車，2000年6月11號正式開始運營。2號線從青浦區國家會展中心站，穿越黃浦江，到達浦東新區陸家嘴、世紀公園、張江高科，並最終抵達浦東1號2號航站樓站。2號線全長64公里，共有30個車站。

上海地鐵2號線

線路數據

車站列表

歷史

• 1995年12月28號，2號線一期工程（中山公園站（上海市）—龍陽路站）開工建設。設計浪全長16.3公里，總投資差弗多124億元，設計流量是每個鐘頭7.27萬人次（高峰）。
• 1996年3月18號，一期工程報建^[1]。
• 1999年1月15號，東延伸段工程報建^[2]。
• 1999年9月20號，（中山公園站—龍陽路站）開始觀光試運行。
• 2000年4月19號，浦東中央公園站正式更名為世紀公園站。
• 2000年6月11號，（中山公園站—龍陽路站）勒拉日中心12點鐘正式通車^[3]。勒拉過江區間（可以乘3站）搭仔其它區間（可以乘2站）臨時採取1塊洋鈿個票價。
• 2000年12月26號，東延伸段（龍陽路站—張江高科站）開通運營^[4]。
• 2001年8月15號，西延伸段（中山公園站—淞虹路站）工程報建^[5]。
• 2001年11月1號，取消仔1塊過黃浦江個優惠措施，恢復2塊個起步價^[6]。
• 2002年12月12號，楊高南路站更名為上海科技館站。
• 2003年12月28號，西延伸段（淞虹路—中山公園）開工
• 2005年10月22號，為仔配合6號線搭仔9號線個建設，東方路站開始封站一年。
• 2005年11月18號，東延伸段（張江高科站—浦東國際機場站）工程報建^[7]。
• 2006年6月26號，西延伸段里向，地鐵列車開始試運行。
• 2006年6月30號，東延伸段個高架區間開工。
• 2006年10月19號，河南中路站更名為南京東路站，石門一路站更名為南京西路站。
• 2006年10月28號，東方路站改造結束，更名為世紀大道站後重新開放^[8]
• 2006年12月30號，西延伸段（淞虹路站—中山公園站）開通營運。
• 2007年1月30號，東延伸段（龍陽路站—浦東國際機場站）全線開工。
• 2008年5月19號，14點28分，2號線全線停運3分鐘，拉響列車浪個汽笛，為勒拉汶川大地震當中不碰巧死脫個人默哀。
• 2008年7月17號，西西延伸（徐涇東站—淞虹路）開工。
• 2008年12月31號，單日客流首次突破100萬人次。
• 2009年2月28號，申通集團里向進行內部改組，2號線交畀新成立個「上海地鐵第二運營有限公司」管理。
• 2009年4月30號，北翟路車輛段正式投入使用。
• 2009年5月21號，阿末一列AC02型車6節擴編8節完成。
• 2009年5月28號，215號列車上線運行，實現全線列車8節編組運營。
• 2009年7月1號，人民廣場站開始用屏蔽門^[9]。
• 2010年2月14號，為仔東延伸段個改造，龍陽路站—張江高科站一段停運。
• 2010年2月24號，東延伸部分（龍陽路站—廣蘭路站）開通試運營。
• 2010年3月16號，西西延伸（徐涇東站—淞虹路站）開通運營，當中虹橋火車站站會得跳過弗停站。
• 2010年4月8號，東延伸段（廣蘭路站—浦東國際機場站）開通運營，採用非高峰運營模式。
• 2010年7月1號，虹橋火車站站開放。
• 2011年9月1號，東延伸段（廣蘭路站—浦東國際機場站）運營時間調整為全天。
• 2012年5月7號，威寧路站啟用簡易屏蔽門，箇個系統也勒拉2號線搭仔其他裝弗了屏蔽門個站頭使用。
• 2015年9月29號，東延伸改造工程報建^[10]。
• 2016年4月25號，早高峰個辰光，部分8節編組列車會得延伸到唐鎮站載客。
• 2016年8月12號，夜高峰個辰光，部分8節編組列車會得延伸到唐鎮站載客。
• 2017年1月21號到2月10號，張江高科站實施臨時停運改造，箇段辰光，列車會得跳過箇站弗停站^[11]。
• 2017年4月28號，箇天開始，禮拜五、禮拜六搭仔重大節假日前頭個一個工作日腳會得延時運營70分鐘。
• 2017年12月30號，虹橋2號航站樓站正中心個共用站台啟用。
• 2018年12月28號，東延伸改造工程階段性完工，平峰時段部分8節編組列車可以貫通運營到浦東國際機場站。
• 2019年4月19號，全天常態化8節編組列車貫通運營開始，同時保留工作日早高峰個辰光，廣蘭路站—浦東國際機場站當中4節編組列車個運營，取消廣蘭路—遠東大道之間深夜單向定點加班車^[12]。
• 2019年10月23號，取消工作日早高峰個辰光，廣蘭路站—浦東國際機場站當中4節編組列車個運營，全時段全區間運行8節編組列車^[13]。
• 2020年1月23號到2月2號，因為徐涇東站—淞虹路站區間雙向隧道進行整修施工，徐涇東站-淞虹路站區間暫停營運^[14]。
• 2021年5月24號，西延伸段工程（蟠祥路站—徐涇東站）個可行性研究報告批覆^[15]
• 2022年4月1號，為仔配合新型冠狀病毒疫情防控，徐涇東站-淞虹路站區間暫停營運。
• 2022年7月4號，徐涇東站-淞虹路站區間恢復運營^[16]。
• 2023年1月22號到1月27號，為仔配合線路設施改造搭仔安全整治，徐涇東站-淞虹路站區間臨時停運施工^[17]。
• 2024年9月21號，徐涇東站、東昌路站搭仔浦東國際機場站分別拿名字改成功國家會展中心站、浦東南路站、浦東1號2號航站樓站^[18]。

事故

• 2014年7月26號搭7月31號，勒拉一列LoveLive!主題塗裝個列車開進站頭以後，有幾名身着動漫衣裳個男性粉絲當場「跪下來膜拜」，引發仔爭議^[19]。碰巧第十二屆中國國際數碼互動娛樂展覽會（ChinaJoy）勒拉上海開展，盛大搭美娛兩家企業包下上海地鐵2號線個207號列車，畀伊塗上LoveLive!主題塗裝，纔出現箇情況^[19]。7月31號，上海地鐵勒拉澎湃新聞內講，箇部列車運營到8月20號以後會得拿廣告去脫。勒拉廣告去脫前，箇部「痛列車」每天只會得開一個來回^[19]。

• 2015年3月10號11點26分，243號列車勒拉張江高科站上行站外觸網跳閘、列車迫停，故障列車個受電弓嚴重損壞，事故導致2號線上海科技館到廣蘭路站方向個電跳脫，箇一段車子停脫差弗多5個鐘頭^[20][21]。

• 2018年4月25號，早高峰上海科技館—廣蘭路區間信號故障，龍陽路—創新中路區間實施公交接駁，沿線各個換乘站對本2號線換乘實施限流，影響時間差弗多又是5個鐘頭^[22]。

• 2021年4月26號上半天11點05分左右，2號線龍陽路站有乘客翻過站台個屏蔽門翻進軌道里向，工作人員連忙啟動站台緊急停車裝置並同步報告，及時撥打120、119。經急救人員確認，伊已經死脫。中午12點整，上海地鐵表示2號線全線運營恢復正常^[23]。

未來個規劃

為仔疏導國家會展中心個客流壓力，根據《上海市城市軌道交通近期建設規劃（2010～2015年）調整方案》，會得新增2號線西延伸段^[24]。箇個工程勒拉青浦區，向西延伸到蟠祥路站，線路正線長約1.7km，儕是地下線，投資22.3億元，勒拉2021年6月28號開工建設^[25]，計劃勒拉2024年底造好。

另外，還有從浦東國際機場站南延伸到浦東機場第3航站樓個規劃。