二条城

元離宮二條城(假名：もとりきゅうにじょうじょう）是一座立在日本畿內山城國（現代日本行政區中個近畿地方京都府京都市中京區）個和城。迭個城堡頂早辰光是鎌倉幕府六波羅探題個大本營，後勢來成為室町幕府個將軍駐地。到江戶幕府之後，轉變成德川氏監督天皇個城堡。德川家康到德川家光個三代人，儕親自到此地來居住過，一來朝拜天皇，增加自家個威望，二來顯示將軍壓過天皇個權威。之後一百多年，因為天下太平，此地朆有另外將軍居住。一直到幕末辰光，成為幕府搭朝廷角力個焦點。1862年德川家茂上洛辰光居住此地，拿本身頹廢個宮殿全面修復；1865年，德川家茂第二趟上洛，立在此地決定對長州藩討伐。1867年10月，末代德川幕府個將軍德川慶喜立在二條城宣布大政奉還，拿幕府個權力轉交把朝廷。之後，二條城成為日本天皇個財產，後勢來對公眾開放，並因為獨特個文化搭建築意義，位列日本國寶搭世界文化財。