凌桥水厂

凌桥水厂是上海市浦东新区北部一座自来水厂，乃朝用个是青草沙水库个原水，主要保障浦东北部、外高桥保税区个自来水供应。勒垃水厂建设初期，为咾募集资金，曾成立股份制公司上海凌桥自来水股份有限公司，1994年勒垃上海证券交易所挂牌，股票代码600834，简称凌桥股份。2000年到2001年，经过一系列运作，凌桥股份拿水厂卖脱，买进地铁公司相关资产，改名申通地铁股份公司，上海轨道交通1号线实现“借壳上市”。凌桥水厂则成为上海市自来水浦东有限公司（乃朝叫上海浦东威立雅自来水有限公司）个资产。

建设

凌桥水厂是畀外高桥保税区自来水个主要水厂。1991年8月份，上海市自来水公司上报项目建议书，1992年1月份上海市政工程设计院完成可行性报告^{[1]:凌桥水厂}。个个辰光，自来水公司除开凌桥水厂任务，还同时急需黄浦江上游引水工程、长江水源工程两只项目，建设资金缺口大唻野花花。同年5月15号，国家体改委、国家计委等多部门印发《股份制企业试点办法》，18号上海市人民政府跟进颁布《上海市股份有限公司暂行规定》。市建委、市公用局决定拿个三只工程从自来水公司里向切分出来，两只水源项目成立股份制公司“原水供应股份有限公司”（600649，乃朝城投控股），凌桥水厂项目成立“凌桥自来水股份有限公司”，通过公开发行股票募集建设资金。6月份，凌桥股份获得全部所需批复，成功进入股票一级市场公开募股集资^[2]，同时也获得2500万美金个西班牙政府贷款^[3]。

1993年初，凌桥水厂一期工程动工，投资2.2亿人民币，设计供水规模每日天20万立方米，同年12月份半数投产，1994年6月份一期完工。1995年8月份，二期工程动工，投资1.4亿元人民币，形成跟一期工程平行个第二条处理线，1996年6月17号全部完工投产，占地面积46434平方米，建筑面积45680平方米，绿化面积43072平方米，沉淀池面积10560平方米。^[4]水厂主要设备侪是国外进口个，采用“V”型滤池，气水反冲工艺，每日天好供应40万立方米规模个自来水，满足浦东用水需求，还好向浦西提供部分自来水。伊个辰光，凌桥水厂用个是陈行水库个水源^{[1]:凌桥水厂}。

资产变动

原水股份

1999年12月15号，原水股份同凌桥股份发布联合公告，宣布双方已经开启合并磋商。假使讲伊成功仔么，就是中国内地建立股票市场以来，第一桩上市公司间个合并案，故咾证券市场对伊个关注邪气大。因为两家公司侪是上海自来水公司控股，合并案是关联交易，大股东作为关联方必须回避，流通股虽然持股比例弗大，但是勒垃个桩事体丄反而成为关键因素。因为两家公司个股价、净资产比例差唻蛮多个（1999年凌桥公司每股净资产1.84元，原水公司每股净资产2.57元^{[1]:股份制公司}），磋商来磋商去也谈弗出一个合理个换股方案，阿末失败哉，2000年上半年宣布取消^[5]。虽然合并取消哉，城投总公司还是拿部分国有股划转畀原水股份，让伊成为凌桥股份第二大股东^[6]。

申通地铁

2000年，凌桥股份先后买仔多家自来水以外企业个股权，当年9月份又买仔上海东方交通卡公司（上海公共交通卡个运营公司）两千余万元股权，市面丄侪预测凌桥股份可能会得调整产业结构^[7]。到当年年底，正式明确申通地铁入主凌桥股份、凌桥股份收购地铁资产，申通地铁“借壳上市”。2001年1月10号、11号，凌桥股份碰着亿安事件，股价暴跌^[8]。6月29号，凌桥股份正式改名上海申通地铁股份有限公司，原先城投手里个国有股划转畀申通集团，买进地铁公司相关资产，水厂则卖畀上海市自来水浦东有限公司^[9]。

水厂更新

2010年，凌桥水厂拿伊个消毒工艺升级换代，废除脱原有个氯气、氨气消毒剂，拆脱对应设备，改用计量泵厾次氯酸钠、硫酸铵，好根据原水水质精确调节消毒剂个量^[10]。2011年，青草沙水库造好以后，凌桥水厂勒垃4月25号中午正式拿主要水源切换到青草沙水库^[11][12]，当势水厂原进水管道增加到两路，拿原有个德国进口VAG阀调成调流阀，陈行水库一路变成备用^[13]。2020年12月份开始，凌桥水厂启动深度处理改造，通过臭氧-生物活性碳吸附工艺进一步提高出水水质，改善出水个味道^[14]，2023年4月份完工并网^{[注 1]}。

注释

1. 官方对外发布为2022年12月^[15]。凌桥水厂分两条处理线。因为个趟改造弗停水，故咾实际丄向两条处理线弗可能同时施工，工程丄直到2023年4月份才完成全部两条处理线个改造并网^[16]。